Փաստ ինֆո

Երբ կորոնան տարածվեց և սահմանափակումներ մտցվեցին, մտահոգ քաղաքացիներից մեկն ինձ դիմեց և ասաց, որ պետությունը պետք է անհապաղ միջոցներ ձեռնարկի՝ կանխելու և կառավարելու այն տագնապային իրավիճակը, որն առաջանում և հետագայում էլ անխուսափելիորեն արտահայտվելու էր մեր հայրենակիցների մոտ՝ համավարակով պայմանավորված սահամանափակումներից ու տարատեսակ վախերից: Այս մասին ֆեյսբուքյան իր էջում գրում է նախկին ԱԺ «Լուսավոր Հայաստան» խմբակցության պատգամավոր Աննա Կոստանյանը:

«Նախորդ տարվա ապրիլին պարետ Տիգրան Ավինյանին առաջարկել էի ստեղծել ՊԵՏԱԿԱՆ ՄԻԱՍՆԱԿԱՆ ՀՈԳԵԲԱՆԱԿԱՆ ԿԵՆՏՐՈՆ, որն օգնություն կցուցաբերեր խոցելի խմբերին և անձանց, որովհետև կանխատեսելի էր, որ կունենանք նևրոզների, տագնապային ֆոնի աճի և նմանատիպ հոգեբանական ծանր վիճակների` դեպրեսիաների, միջանձնային` ընտանեկան կոնֆլիկտների աճի բազմաթիվ դեպքեր: Ցավոք Հայաստանում հոգեբանական առողջության հարցերին պատշաճ ուշադրություն այդպես էլ չդարձվեց:

Իսկ այսօր արդեն երկու շաբաթում 44-օրյա պատերազմի մասնակիցների շրջանում երկու ինքնասպանության և մեկ ինքնասպանության փորձի դեպքեր են գրանցվել։ Պատերազմից 8 ամիս անց պետությունը դեռ համակարգային մոտեցում չի ցուցաբերել պատերազմի արհավիրքները տեսածների ու վերապրածների, փրկվածների հանդեպ, հատկապես այն անձանց, ովքեր ականատես են եղել և՛ դավաճանության դեպքերի, և՛ տեսել են, թե ինչպես է բանակը բարոյալքվել, կազմաքանդվել, իսկ հայրենիքի մի մասը կորսվել։ Այն մարդիկ, ում համար հայրենիքը մեծ արժեք է, չէին կարող ու չեն կարող ֆիզիկական ու հոգեկան ուժերի ամենամեծ մոբիլիզացիայի պարագայում անգամ հանգիստ շարունակել ապրել, քանի որ այդ մարդկանց մոտ կյանքի իմաստն է կորել։

Հիմա առավել, քան երբևէ շարունակում է ակտուալ մնալ պետական միասնական հոգեբանական կառույց ստեղծելու անհրաժեշտությունը, որը կաջակցի պատերազմի հետ առնչություն ունեցած բոլոր քաղաքացիներին։ Ճիշտ է՝ հոգեբանները կամավոր օգնություն են ցուցաբերում պատերազմի զինծառայողներին, բայց սա բավարար չէ։ Անհրաժեշտ է պրոֆեսիոնալ ու համակարգված, պետական մոտեցում»,- գրել է Կոստանյանը։

Աղբյուր` Փաստինֆո