Փաստ ինֆո

Իսրայելական կործանիչները կիրակի լույս գիշերը հարվածներ են հասցրել Գազայի հատվածում պաղեստինյան ՀԱՄԱՍ արմատական շարժման հրթիռային կայանին՝ ի պատասխան հրկիզման նպատակով ամրացված վառելանյութերով եւ պայթուցիկով օդապարիկների արձակման, հաղորդում է «ՌԻԱ Նովոստին»: Այս մասին ՏԱՍՍ-ի փոխանցմամբ կիրակի հայտնել է բանակի մամուլի ծառայությունը։

«Գիշերը Իսրայելի պաշտպանության բանակի կործանիչները հարվածներ են հասցրել զենքի արտադրության համար օգտագործվող օբյեկտին, ինչպես նաեւ ՀԱՄԱՍ ահաբեկչական կազմակերպությանն պատկանող հրթիռային կայանին։ Հարվածները հասցվել են ի պատասխան իսրայելական տարածքի ուղղությամբ պայթուցիկով օդապարիկների արձակման»,-ասված է մամուլի ծառայության հայտարարության մեջ: «Իսրայելի պաշտպանության բանակը կշարունակի վճռականորեն հակազդել Գազայի հատվածի կողմից ահաբեկչության փորձերին», - հավելել են զինվորականները:

Kan պետական ռադիոն հայտնում է, որ Գազայի հատվածից հարվածներ հասցնելու ժամանակ հրաձգային զենքից կրակ է բացվել Իսրայելի սահմանին հարող բնակավայրերից մեկի ուղղությամբ։ Ռադիոկայանի տվյալներով՝ տուժածների մասին տեղեկություններ չկան: Kan-ը նշում է, որ Գազայի հատվածից Իսրայելի տարածք պայթուցիկ նյութերով օդապարիկների բացթողման հետեւանքով սահմանամերձ շրջաններում գյուղատնտեսական դաշտերում ուրբաթ եւ շաբաթ օրերին մի քանի հրդեհ է բռնկվել, վնաս է հասցվել: Նախորդ անգամ Իսրայելը հարվածներ էր հասցնում անկլավի ՀԱՄԱՍ - ի ռազմական թիրախներին՝ ի պատասխան հուլիսի լույս 2-ի գիշերը հրկիզումների:

Մայիսի 21-ին ուժի մեջ է մտել Գազայի հատվածում Իսրայելի եւ պաղեստինյան խմբավորումների միջեւ հրադադարի ռեժիմը, որոնք դրանից 11 օր առաջ հարվածներ Էին հասցնում միմյանց:: Գազայից իսրայելական քաղաքների ուղղությամբ արձակվել է ավելի քան 4 հազար հրթիռ, բանակը հարյուրավոր թիրախներ է խոցել հատվածում։ Դիմակայության զոհ են դարձել ափամերձ անկլավի 257 բնակիչներ, շուրջ 2 հազար մարդ վիրավորվել է: Իսրայելական կողմից զոհվել է 13 մարդ։

Աղբյուր` Փաստինֆո