Փաստ ինֆո

Կորոնավիրուսի հնդկական շտամը, որը ստացել է «Դելտա» անվանումը, կարող է դրսեւորվել աղեստամոքսային տրակտի խանգարման տեսքով։ Այս ախտանիշից վերջին ժամանակներս սկսել են բողոքել կորոնավիրուսով վարակված շատ ռուսաստանցիներ, ՏԱՍՍ-ին հայտնել է թոքաբան Ալեքսեյ Նիկիշենկովը:

«Սովորաբար մենք չգիտենք, թե որ շտամն է մեր առջեւ, քանի որ մեր ամենօրյա տաժանակիր պրակտիկայում կորոնավիրուսի ենթաբաժնի ուսումնասիրություն չի կատարվում: Սակայն կարող եմ նշել, որ վերջերս, երբ «Դելտա» շտամը սկսեց տարածվել, կորոնավիրուսային հիվանդները ավելի ու ավելի հաճախ բողոքում են աղեստամոքսային տրակտի խանգարումից՝ փորլուծություն, որովայնային ցավեր։ Այս ախտանիշը ավելացավ նրան, ինչ նախկինում կար, մասնավորապես' հազ, թուլություն, միալգիա (մկանային ցավ)», - ասել է նա:

«Դելտա» շտամով վարակված հիվանդների մոտ «ստամոքսի կովիդի» առաջացումը հաստատել է նաեւ բժիշկ-իմունոլոգ Վլադիմիր Բոլիբոկը: «Կովիդի համար, որն այժմ հարձակվել է՝ «Դելտա» շտամը, բնորոշ է այսպես կոչված «ստամոքսի սինդրոմը» կամ «ստամոքսի կովիդը»: Բավական հաճախ՝ արդեն հայտնի ախտանիշներին, ավելանում են որովայնի ցավերը, փսխումը եւ լուծը», - պատմել է նա։

Ընդ որում, վիրուսաբան-բժիշկ Վիկտոր Լարիչեւը, իր հերթին, վստահ է, որ բոլոր ախտանշանները, որոնք նախկինում դրսեւորվել են կորոնավիրուսի ուհանյան շտամով վարակված հիվանդների մոտ, արդիական են մնացել նաեւ հնդկական շտամի դեպքում:«Ախտանշանները նույնն են մնացել։ Բոլոր վարակիչ հիվանդությունների դեպքում առաջին հերթին ջերմություն է բարձրանում, դա ինչպես եղել է, այնպես էլ մնացել է», - ընդգծել է նա։

Կորոնավիրուսի տարբերակը, որը ստացել է «Դելտա» պաշտոնական անվանումը, Հնդկաստանում առաջին անգամ հայտնաբերվել է անցյալ տարվա հոկտեմբերին, հաճախ այդ շտամը անվանում են հնդկական: Ավելի վաղ Հնդկաստանի բժշկական հետազոտությունների ինստիտուտը հայտնել էր, որ վիրուսի այս տարբերակը կարող է մարդկանց վարակել նույնիսկ այն բանից հետո, երբ նրանք պատվաստվել են Հնդկաստանում կիրառվող Covaxin եւ Covishield պատվաստանյութերով: Այս շտամի «Դելտա պլյուս» տարբերակը համարվում է ավելի վարակիչ։

Աղբյուր` Փաստինֆո