Փաստ ինֆո

Ես աշխատանքից չեմ հեռացվել, ոչ էլ եղել է նման պահանջ։ Պահանջել են ազատել այն տարածքը, որտեղ ես աշխատում եմ։ Այս մասին ֆեյսբուքյան ուղիղ եթերի ժամանակ ասաց պլաստիկ վիրաբույժ, ՀՀ գլխավոր միկրովիրաբույժ Արտավազդ Սահակյանը։

«Այս տարածքը լքելու և որևէ այլ տեղ տեղափոխելու պահանջ եղել է միայն ռեկտորի կողմից սկսած 2017 թվականից, որին ես ընդդիմացել եմ, քանի որ իր ռեկտոր նշանակվելուց առաջ իմ, բժիշկների և անձնական կապերի շնորհիվ վերանորոգել ենք այս տարածքը։ Երկու հարկ կապիտալ վերանորոգվել է, բոլոր ծախսերն արվել են իմ և բժիշկների կողմից։ ԵՊԲՀ-ն ոչ մի հարցում մեզ չի օգնել բացառությամբ Գոհար Քալյանից»,-ասաց Արտավազդ Սահակյանը։

Վիրաբույժը նշեց, որ այս ընթացքում բազմաթիվ անգամ նրա առջև դրվել է տեղափոխվելու պահանջը։ Արտավազդ Սահակյանի խոսքով փորձել է միշտ կոնսեսուսի գալ և ապահովել իր կողմից ղեկավարած մարդկանց անվտանգությունն ու աշխատունակությունը։

«Պատերազմի ավարտից հետո ինձ այցելեց ներկայացուցիչը՝ պահանջելով ազատել բաժանմունքը։ Զգուշացրել էի, որ մոտ 1000-2000 հիվանդ կա, որոնք որակյալ օգնության կարիք ունեն և դեռ բուժվում են մեր բաժանմունքում և չեմ կարող ազատել։ Այդ փաստից հետո նշեցին, որ իբր այստեղ պետք է վերանորոգեն, որից հետո այստեղ նոր միկրովիրաբուժության բաժանմունք ստեղծվի։ Պատկերացրեք՝ ես բժշկական համալսարանի ստորաբաժանման ղեկավար եմ, ամբիոնի վարիչ և բացարձակապես մտադրություն չունեմ որևէ այլ մասնավոր կամ հասարակական հիմնարկ տեղափոխվելու։

Իմ ռեկտորը փոխանակ պաշտպանի իմ շահերը, պարտադրում է, որ ես դուրս գամ այստեղից։ Մենք պատերազմի տարիներին հսկայական աշխատանք կատարեցինք և դա մեր պարտքն է։ Այսօր էլ ամեն րոպե կարող է «հրդեհ» բորբոքվել Սյունիքում կամ որևէ այլ տեղում և այս պահին ինձ պարտադրում են հեռանալ այս մասնաշենքից՝ հաշվի առնելով կառավարության որոշումը, որն ընդունվել է առանց այս ստորաբաժանման կարծիքը հաշվի առնելու»,-նշեց Արտավազդ Սահակյանը։

Վերջինս նշեց, որ 66 աշխատող ունեն, իսկ իրեն Միքայելյանում 2 սենյակ են առաջարկել և չի կարող աշխատակիցներին տեղավորել։

«Ես հակված չեմ պահանջել այն հսկայական ծախսերը, որը ես ու ընկերներս ենք արել, ես սա նվիրել եմ մեր հարազատ համալսարանին և որ մեր հիվանդներն ու վիրավորները բարեկեցիկ պայմաններում լինեն։ Ո՞վ է իրենց իրավունք տվել խաղալ ամենահզոր կենտրոններից մեկի ճակատագրի հետ։ Մենք արարել ենք, ստեղծել ենք, քանդելու քաղաքականություն է այս դեպքում լինում»,-ասաց Արտավազդ Սահակյանը։

Աղբյուր` Փաստինֆո