Փաստ ինֆո

Եթե Հայաստանն ինքը չի արձանագրում, որ իր տարածքի նկատմամբ իրականացրել են ագրեսիա և որոշակի տարածքի օկուպացիա է եղել, ՀԱՊԿ-ը կարո՞ղ է քննարկել այդ հարցը։ Չի քննարկի, եթե Հայաստանը չի էլ դիմել այդ հարցով։ «Փաստինֆո»-ի հետ զրույցի ժամանակ ասաց ռազմական փորձագետ Հայկ Նահապետյանը՝ անդրադառնալով ՀԱՊԿ գլխավոր քարտուղար Ստանսիլավ Զասի հայտարարությանը։

Նշեն, որ վերջինս Հայաստանի հարավում իրավիճակը համարել է «սահմանային միջադեպ», որը չի մտնում ՀԱՊԿ հավաքական պաշտպանության կանոնակարգային դրույթների մեջ։

Հայկ Նահապետյանը հստակեցրեց՝ եթե ՀԱՊԿ անդամ երկրներից որևէ մեկի այս դեպքում Հայաստանի նկատմամբ ագրեսիա է եղել, ապա Հայաստանը ՀԱՊԿ-ին պետք է դիմի կանոնադրության 4-րդ հոդվածով, որտեղ ապացուցի, որ ՀՀ-ի նկատմամբ իրականացվել է ագրեսիա և որոշակի տարածքներ են օկուպացվել, մինչդեռ Հայաստանը ՀԱՊԿ-ին դիմել է 2-րդ հոդվածով։

«Հայաստանը դիմել է սահմանային միջադեպի հետ կապված, որտեղ խորհրդատվություններ պետք է անցկացնեն, որից հետո հետևություն կատարեն։ ՀԱՊԿ-ից պահանջելուց առաջ մենք պետք է պահանջենք մեր երկրի իշխանություններից, որոնք համարժեք չեն գնահատում իրավիճակը։ Սև լճի հետ կապված, երբ հակառակորդն ուղղակի ՀՀ տարածքն օկուպացրեց, Նիկոլ Փաշինյանն ինչպե՞ս բնութագրեց Ադրբեջանի զինված ուժերի որոշ ստորաբաժանումների առաջխաղացումը ՀՀ տարածքում։ Նա չէր գնահատում որպես Հայաստանն ագրեսիայի ենթարկված երկիր, ուստի ՀԱՊԿ-ը չի դիտարկի։ Սահմանային միջադեպեր եղել են և կլինեն, քանի դեռ Հայաստանի և Ադրբեջանի միջև Ադրբեջանի ու Թուրքիայի պահանջով չի կնքվել վերջնական խաղաղության համաձայնագիր։ Այս ամենը գնում է խաղաղության համաձայնության գործընթացներին»,-նշեց փորձագետը։

Վերջինս հավելեց՝ Ադրբեջանն իր առավելություններն է օգտագործում՝ հաշվի առնելով, որ Հայաստանի իշխանությունները համարժեք չեն գնահատում և չեն էլ կարողանում արագ արձագանքել Ադրբեջանի կողմից նետված ցանկացած մարտահրավերի։ Ադրբեջանը գտնում է, որ Հայաստանի իշխանությունները թույլ վիճակում են և կամային որակներ չունեն՝ քաղաքական կամք դրսևորելով համարժեք պատասխան տալ Ադրբեջանին։

«Սա Ադրբեջանի համար նվեր է և բնականաբար Հայաստանի ու Ադրբեջանի սահմանային շատ հատվածներում նման սադրանքների կրկին դիմելու է։ ՀԱՊԿ-ի կեցվածքը համարժեք է Հայաստանի իշխանությունների կողմից դրսևորված գնահատմանը։ 44-օրյա պատերազմում Հայաստանը նույնպես ՀԱՊԿ-ին չդիմեց ագրեսիայի պահով, երբ Ադրբեջանի անօդաչու թռչող սարքերն ագրեսիայի ենթարկեցին, մտան ՀՀ տարածք և ավելին խոցեցին ՀՀ զինված ուժերին պատկանող մի քանի ՀՕՊ միջոցներ»,-ասաց Հայկ Նահապետյանը՝ ընդգծելով, որ մեր իշխանություններից պետք է պահանջենք համարժեք գնահատել իրավիճակը։

Հայկ Նահապետյանի խոսքով գնահատականները տարբեր են, թե ինչու իշխանությունները համարժեք չեն գնահատում իրավիճակը։ Կան գնահատակններ, որ նրանք ՀՀ ազգային, պետական շահին դեմ գործողություններ են անում, ինչպես նաև իրենց գործառույթներն ամբողջովին չեն կատարում ևա դյ անփութության հետևանքով ծանր կորուստներ ունենք, ինչը քրեորեն պատժելի է։

«Փաստացի իրավիճակի ոչ համարժեք գնահատումը բերում է մեր ազգային, պետական շահերի ոտնահարմանը։ Ադրբեջանցիները եթե գրավում են քո երկրի տարածքը, պետք չէ, որ Պաշտպանության նախարարը և ԳՇ պետը հրաման տան, որ սահմանում կանգնած զինվորը պաշտպանի մեր տարածքային ամբողջականությունը։ Ինքն իր պարտականությունների տիրույթում պարտավոր է կրակել։ Իսկ քանի որ այդ սադրանքների ժամանակ ՀՀ կողմից որևիցե կրակոց չի եղել, դա նշանակում է, որ չկրակելու հրաման կա։ Եթե մենք մեզ չենք պաշտպանում, պետք չէ այլոցից պաշտպանություն մուրալ։ Մեր խնդիրները ներսում են, ոչ թե դրսում»,-հավելեց Հայկ Նահապետյանը։

Աղբյուր` Փաստինֆո