Փաստ ինֆո

Հայաստանում կրթական մակարդակը միջին մակարդակի է: «Փաստինֆո»-ի հետ զրույցում ասաց պատգամավոր Սոֆյա Հովսեփյանը՝արձանագրելով, որ կրտսեր դպրոցում մակարդակում կրթության մակարդակը բարձր է՝ ի տարբերություն միջին և ավագ դպրոցների:

Նշենք, որ վերջերս Համաշխարհային բանկը հետազոտության արդյունքներ էր հրապարակել, համաձայն որի՝ Հայաստանում տարրական դպրոցի բարձր դասարաններում սովորող երեխաների մոտ 35%-ը չի կարողանում վարժ կարդալ,մինչդեռ տարածաշրջանային այլ երկրներում պատկերը հետևյալն է՝ Ադրբեջանում 23,3%, Վրաստանում 13,8%:

ԱԺ պատգամավորը այս հետազոտությունը խնդրահարույց է համարում ու անհասկանալի՝ նշելով, թե պետք է պարզել, թե ովքեր են դրանք կատարել, քանզի համոզված է՝ Հայաստանում կրտսեր դպրոցում կրթության մակարդակը բարձր է եղել, շատ քիչ ենք ունեցել անտառաճանաչ երեխաներ։

«Ես, որպես կանոն, նման հետազոտությունների առհասարակ ուշադրություն չեմ դարձնում և չեմ կարևորում դրանք: Տվյալներին ծանոթ եմ, բայց չեմ ուսումնասիրել, մենք այս պահին խնդիր ունենք ուսուցիչների մակարդակի և որակի փոփոխության, որի արդյունքը կլինի կրթության որակի բարձրացումը»,-ասաց նա և ավելացրեց.«Եկել էր մի փուլ, երբ որակյալ մանկավարժները, որոնք իսկապես անհրաժեշտ էին դպրոցներին, ֆիզիկապես ի վիճակի չէին հայտնվել դպրոցում: Նմանատիպ խնդիրները բերել են նրան, որ դպրոցում 50% կարող էին լինել իսկապես շատ լավ մանկավարժներ, իսկ մյուս մասն էլ արկածախնդիր, սրա արդյունքում բնականաբար կրթության որակը իջնում է»,-ասաց Հովսեփյանը:

Նա նաև նշեց, որ մի քանի պատգամավորներով քննարկելու և ուսումնասիրելու են Համաշխարհային բանկի հետազոտության արդյունքները, որպեսզի հասկանան՝ ի՞նչ հետազոտություն է, ո՞վ է պատվիրել և ի՞նչու է հենց այս երկրներում արվել.

«Մենք պետք է հասկանանք նման ցուցանիշի պատճառը, ի՞նչն է հանգեցրել նման ցուցանիշի»,-ասաց Սոֆյա Հովսեփյանը:

Նրա գնահատմամբ՝ Հայաստանում կրթական մակարդակը միջին մակարդակի է:

Իսկ թե ի՞նչ պետք է անել կրթական մակարդակը խթանելու ուսուցիչներին, աշակերտներին մոտիվացնելու համար, պատգամավորն ասաց.

«Պետք է ԲՈՒՀ-երում լավ մանկավարժներ պատրաստվեն, այդ մանկավարժները դպրոցում անընդհատ որակի բարձրացման դասընթացներ անցնեն: Պետք է նաև դպրոցական ծրագիրը թեթևացվի՝երեխայի կարիքին և կարողությանը համապատասխան: Ուսուցիչն անընդհատ ինքն իր վրա պետք է աշխատի և կարողություններ զարգացնի, այս դեպքում մենք բախվում ենք մի խնդրի, որ 5 տարի սովորում են, մտնում են դպրոց և վերջ, այլևս ցանկություն չեն ունենում իրենց վրա աշխատելու: Քանի որ հիմա տեխնոլոգիայի դար է, երեխաները կապված են հեռուստացույցին, համակարգչին, պետք է նաև կարգի բերել հեռուստաեթերը, որը կրթության բաղադրիչներից մեկն է, այն դարձել է հասարակության դեգրադացիայի հիմնական խնդիրներից է»,-ասաց Հովսեփյանը:

Աղբյուր` Փաստինֆո