Փաստ ինֆո

Վերաքննիչ քրեական դատարանում՝ դատավոր Լուսինե Աբգարյանի նախագահությամբ, մեկնարկել է «Իզմիրլյան» ԲԿ տնօրեն, «Հայրենիք» դաշինքի պատգամավորի թեկնածու Արմեն Չարչյանին կալանավորելու որոշման դեմ պաշտպանների բողոքի քննությունը։

Ինչպես արդեն տեղեկացրել ենք՝ Երևանի ընդհանուր իրավասության դատարանը՝ դատավոր Արմինե Մելիքսեթյանի նախագահությամբ, մասնակի բավարարել է «Իզմիրլյան» ԲԿ տնօրեն, պրոֆեսոր Արմեն Չարչյանի նկատմամբ կալանավորումը որպես խափանման միջոց ընտրելու մասին քննիչի միջնորդությունը՝ նրան մեկ ամսով կալանավորելու որոշում կայացնելով։

Մինչ դատարանը կհրապարակեր խափանման միջոցի վերաբերյալ որոշումը, պրոֆեսոր Չարչյանը շտապ օգնության միջոցով տեղափոխվել է հիվանդանոց, որտեղ հետագայում վիրահատվել է։

Պաշտպանները կալանավորման որոշման դեմ բողոք են ներկայացրել, որը քննվում է՝ առանց Չարչյանի մասնակցության, քանի որ վերջինիս վիճակում դեռևս որևէ փոփոխություն չի նկատվում։ Ի դեպ, Չարչյանի առողջական խնդիրների մասին պաշտպանները բարձրաձայնել էին դեռևս Չարչյանի ձերբակալման ժամանակ, իսկ հարցը քննարկման առարկա է դարձվել նաև խափանման միջոցի քննության ժամանակ, սակայն դատարանը՝ դատավոր Արմինե Մելիքսեթյանի նախագահությամբ, այդուհանդերձ, որոշել է կալանավորել պրոֆեսորին։

«Փաստինֆո»-ի թղթակցի հաղորդմամբ՝ այս պահին դատարանի բակում են գտնվում բժշկական համայնքի ներկայացուցիչներ, հասարակական֊քաղաքական գործիչներ, որոնք իրենց աջակցությունն են հայտնում Արմեն Չարչյանին։

Հիշեցնենք, որ տելեգրամյան մի ալիքում հրապարակվել է ձայնագրություն, համաձայն որի՝ «Իզմիրլյան» բժշկական կենտրոնի տնօրեն Արմեն Չարչյանը հունիսի 18-ի առավոտյան աշխատակիցների հետ հանդիպմանը հորդորել է, որ աշխատակիցները պարտադիր կարգով մասնակցեն ընտրություններին։ Չարչյանը նշել է, որ եթե որևէ մեկը չմասնակցի ընտրություններին, ապա կիմանա այդ մասին։

Ձայնագրության հրապարակումից հետո հաշված ժամերի ընթացքում ՀՀ ՀՔԾ-ում հարուցվել է քրեական գործ՝ ՀՀ քրեական օրենսգրքի 154.2-րդ հոդվածի 4-րդ մասի 2-դ կետի հատկանիշներով, որի շրջանակներում նախ բերման են ենթարկել Չարչյանին և տեղափոխել ՀՔԾ, ապա ձերբակալելու որոշում կայացրել։

Պաշտպանները բողոք են ներկայացրել Չարչյանին ձերբակալելու մասին որոշման դեմ, ինչը բավարարվել է քվեարկության օրը և նա դատարանի որոշմամբ ազատ է արձակվել։

Հունիսի 21-ին դատախազությունը հաղորդագրություն տարածեց՝ նշելով, որ ԿԸՀ-ն բավարարել է Արմեն Չարչյանի նկատմամբ հետապնդում իրականացնելու և նրան ազատությունից զրկելու համաձայնություն տալու վերաբերյալ միջնորդությունները։ ԿԸՀ համաձայնությունը ստանալուց հետո ՀՔԾ֊ն մեղադրանք է առաջադրել Արմեն Չարչյանին՝ ՀՀ քրեական օրենսգրքի 154.2-րդ հոդվածի 4-րդ մասի 2-դ կետի հատկանիշներով և նրա նկատմամբ կալանավորումը որպես խափանման միջոց ընտրելու մասին միջնորդություն ներկայացրել դատարան։

Հեղինակ՝ Իզաբել Սահակյան

Աղբյուր` Փաստինֆո