Փաստ ինֆո

«Ոնց կարող է դատախազը այդքան անպատասխանատու վերաբերվել մարդու ճակատագրին, կյանքին, առողջությանը»,- այս մասին Վերաքննիչ դատարանի բակում լրագրողների հետ զրույցում նշեց «Իզմիրլյան» ԲԿ տնօրեն, «Հայրենիք» դաշինքի պատգամավորի թեկնածու Արմեն Չարչյանի փաստաբան Արամ Վարդևանյանը։

Ըստ Փաստաբանի՝ դատախազությունը 2018-ից ապօրինության անգերազանցելի բարձունքներ է սահմանում, մարդու իրավունքների նկատմամբ անհարգանք դրսևորում, բայց անգամ փաստաբանն է զարմացած.

«ՀՔԾ-ն ևս նման պրակտիկա է ցուցաբերել, բայց ավելի պարկեշտ է իրեն դրսևորում, քան դատախազությունը։ Ու ես կարծում եմ, որ այստեղ նաև կոնկրետ դատախազ Ազատ Մարգարյանի վարքագիծն է։ Չգիտեմ, կարող է ժամանակին լսել է, թե ինչքան լավ վիրահատություն է արել պրոֆեսոր Չարչյանը, կամ լսել, թե ինչ մեծ համբավ ունի պրոֆեսորը, միգուցե սուբյեկտիվ նեղսրտել է կենսագրական տվալներից, միգուցե բոլոր այն պետական պարգևները, որը ստացել է պրոֆեսորը, իսկ ինքը չի ստացել, իրեն կաշկանդում ու կոմպլեքսավորում է»։

Ըստ Վարդևանյանի, նախաքննության ավարտը հայտարարվել էր, դատախազը լավ գիտեր, որ պրոֆեսոր Չարչյանը այլևս կենտրոնի տնօրեն չէ, բայց լավ իմանալով, որ խափանման միջոց կալանավորումը անխուսափելի է, որոշել է միջնորդել նիստը հետաձգել։

«Թող հանկարծ չլինի էնպես, որ բժիշկներից մի օր նման վերաբերմունքի արժանանան, իսկապես չեմ ցանկանա, որ դա լինի, բայց մարդու ճակատագիրը բումերանգի էֆեկտ է ունենում բոլոր դեպքերում»։

Վարդևանյանը նշեց, որ հուլիսի 5-ին՝ սահմանադրության օրը նշելու են սահմանադրական մի շարք խախտումները տեսնելով, հաջորդ օրը, երեքշաբթի՝ 14։00-ին կշարունակվի Արմեն Չարչյանին կալանավորելու որոշման դեմ բողոքի քննությունը։

Պաշտպանները հայտարարեցին նաև, որ դատավորի վարքագծի հետ կապված աս պահին մտահոգություն չունեն, արձանագրեցին՝ դատարանը օբյեկտիվ է գործում։

Աղբյուր` Փաստինֆո