Փաստ ինֆո

1 մլն 280 հազար ընտրողների պայմաններում 109 հազարի անձնագրեր չեն աշխատել։ Ընտրական օրենսգիրքն ընդհանուր կանոն է սահմանել, որ անձնագրերը պետք է աշխատեն, որ վերիֆիկացման մեխանիզմը պետք է պատշաճ լինի, որ վստահված անձինք կարողանան իրենց պարտականությունները պատշաճ կատարեն։ Այս մասին հրավիրված մամուլի ասուլիսին ասաց «Հայաստան» դաշինքի ներկայացուցիչ Արամ Վարդևանյանը։

«Այդ իրավիճակներից հատուկենտ բացառությունների հնարավորություն ԸՕ-ն ևս նախատեսում է, որ ենթադրենք անձնագիրը չի աշխատում, բայց նորմալ չէ, որ ընտրողների մոտ 10 տոկոսի մոտ անձնագիրը չի աշխատում»,- նշեց Վարդևանյանը։

Նրա փոխանցմամբ՝ 2017թ չաշխատող անձնագրերի թիվը եղել է 230.000, բայց համակարգը՝ վերիֆիկացման, անձանց ինքնության ստուգման ներդրվել էր 2016թ, ԸՕ-ն ընդունվել էր 2016թ և 2018թ ընտրությունների ժամանակ այդ թիվն արդեն հասել էր 130.000-ի։

«Երեք տարում 130.000 դարձավ 109.000։ Այդ ինչպե՞ս այդպես կտրուկ նվազեց դրանց նվազման տեմպը։ Այդ 109.000 անձնագրից յուրաքանչյուրը կասկածի տակ է, յուրաքանչյուրը կարող է մտածել, որ այդ քվեն կեղծված է»,- նշեց Վարդևանյանը։

Նա նաև հայտնեց, որ շուրջ 23.000 դեպքով անձնագրերում լուսանկարը դուրս չի եկել, այսինքն՝ հին անձնագրեր են, բայց խնդիր է առաջանում, թե պետություն չէ՞ր կարող լուծել այդ խնդիրը։

«Պետությունը չունե՞ր այդ ռեսուրսը, բայց չէ՞ որ պետությունը պետք է շահագրգռված լինի, որ ընտրությունները լինեն վստահելի, արդար, հավասար։ Սա պետության պարտականությունն է, որը պետությունը չի կատարել և այդ կերպ կասկածի տակ դրել այդ քվեները։ Նույնը նաև՝ զինծառայողների վերաբերյալ քվեները, կրկին ստիպված ենք չակերտներում նշել՝ 10-11 հազար քվեն, որովեհտև մենք չգիտենք արդյոք դա է ճիշտ թիվը, թե ոչ, ամբողջ գործընթացը գաղտնի է եղել քաղաքական ուժերի համար»,- նշեց Վարդևանյանը։

Աղբյուր` Փաստինֆո