Փաստ ինֆո

ՀՀ երրորդ նախագահ Սերժ Սարգսյանի և մյուսների գործով դատական նիստի ժամանակ Սերժ Սարգսյանի պաշտպան Ամրամ Մակինյանն ասաց, որ պատրաստվում է ներկայացնել փաստական հանգամանքներ այն մասին, որ քրեական այս գործն ապօրինի է։ 

Ամրամ Մակինյանն անդրադարձավ քրեական գործով նախկին մեղադրյալ Սերգո Կարապետյանի ցուցմունքներին, նկատելով, որ վերջինս երկու անգամ հարցաքննվելուց ամիսներ անց դիմում է ուղարկել ՀՔԾ՝ իր ցուցմունքը լրացնելու նպատակով, իսկ մինչ այդ՝ հոկտեմբերի 4-ին հարցաքննվել է, սակայն այդ հարցաքննության արձանագրությունը քրեական գործում չկա։ Պաշտպանը կասկած հայտնեց, որ հնարավոր է Սերգո Կարապետյանի նկատմամբ հարկադրանք է կիրառվել։

«Երբ Սերգո Կարապետյանը 2019թ․-ին հարցաքննվել է, տվել է այս քրեական գործը փշրող, հերքող ցուցմունք։ Առերես հարցաքննությունից հետո Սերգո Կարապետյանը նույն օրը՝ հոկտեմբերի 4-ին, Սերգո Կարապետյանը ծանուցագիր է ստանում՝ հարցաքննության ներկայանալու և այդ ժամանակ գործողություններն ավարտվում են։ Հոկտեմբերի 4-ի Սերգո Կարապետյանի հարցաքննության արձանագրությունը մեր գործում չկա։ Այսինքն` հոկտեմբերի 4-ին տեղի է ունեցել քննչական գործողություն, որի արձանագրությունը քրեական գործում չկա։ Ասում ենք, որ հոկտեմբերի 4-ից առաջ Սերգո Կարապետյանը երկու անգամ հարցաքննվել է այս գործով և տվել այս քրեական գործը ջախջախող ցուցմունք։ 2019թ․-ի հոկտեմբերի 7-ին Սերգո Կարապետյանի անունից ձեռագիր դիմում են ուղարկում ՀՔԾ, որտեղ նշվում է, որ ինքը նախկինում ցուցմունք է տվել և հիմա ուզում է լրացնել։ Հունիսից մինչև հոկտեմբեր Սերգո Կարապետյանը, եթե հայտնելու բան ուներ, թող հայտներ»,-նշեց Ամրամ Մակինյանը։

Գործով մեղադրող դատախազ Արսեն Մարտիրոսյանը նշեց, որ Ամրամ Մակինյանն իր խոսքում նշել է, որ հարկադրանք է կիրառվել Սերգո Կարապետյանի նկատմամբ։ Դատախազի խոսքով պաշտպանը դատարանում հայտարարություն է անում, որն իր մեջ կարող է ենթադրյալ հանցագործության մասին տեղեկություններ պարունակել։

«Եթե նման բան կա, թող կոնկրետ տեղեկություններ հայտնի կամ պարզաբանի՝ սա ինչ է նշանակում»,-ասաց դատախազը։

Ամրամ Մակինյանը շարունակեց պնդել, որ Սերգո Կարապետյանն ունեցել է այցելություն ՀՔԾ, որի մասին քրեական գործում համապատասխան փաստաթուղթ չկա։ Պաշտպանը դատարանին միջնորդեց ՀՔԾ-ից և ՀՔԾ շենքի պահպանություննն իրականացնող ծառայությունից տեղեկություններ պահանջել Ս.Կարապետյանի հետ 2019 թվականի հոկտեմբերի 5-ին կատարված քննչական գործողության վերաբերյալ, ստանալ այդ արձանագրության պատճենը և հնարավորություն տալ նրանց ծանոթանալ այդ փաստաթղթին։

Աղբյուր` Փաստինֆո