Փաստ ինֆո

Մենք խիստ անհանգստացած ենք ստեղծված իրավիճակով։ Այս տարվա հունիսը ռեկորդային շոգ ամիս է եղել, մոտ 3 աստիճանով նորմայից շոգ է եղել, ինչի պատճառով առաջացել է այսպիսի աննախադեպ դժվար իրավիճակ։ Լրագրողների հետ զրույցի ժամանակ ասաց ՀՀ էկոնոմիկայի նախարարի պաշտոնակատար Վահան Քերոբյանը՝ անդրադառնալով ոռոգման խնդրին։

«Ջրային կոմիտեն աշխատում է նորմալ հունով։ Այստեղ հիմնական խնդիրը կապված է նրա հետ, որ անջրդի հողատարածություններում ջրելու կարիք է առաջացել, ինչը վտանգել է անջրդի հողատարածությունների բերքը։ Ֆերմերներն ըստ էության երբեմն սխալ տեղեկատվություն են փոխանցում ջրային կոմիտեին, և մի բույսի փոխարեն ցանում են այլ բույս, որի ջրի պահանջարկն այլ է։ Օրինակ կարտոֆիլին ավելի շատ ջուր է պետք, քան այլ մշակաբույսերի։ Այս խնդիրը պահանջում է ֆունդամենտալ լուծում։ Երկու օր առաջ պայմանավորվել ենք, որ պետք է սկսենք ջրային ռեֆորմը, այսինքն համակարգն այնպես փոխենք, որ անցնենք նոր, արդյունավետ համակարգի»,-ասաց Վահան Քերոբյանը։

Դիտարկմանը, որ կաթիլային ոռոգման համակարգը թանկ է և ոչ բոլոր գյուղացիները կարող են ձեռք բերել, Վահան Քերոբյանն ասաց, որ կառավարությունն ամեն կերպ կաջակցի, որ հարցը լուծվի, քանի որ կլիմայի փոփոխությունն այնպիսին է, որ հետընթաց չկա։ Նախարարը նշեց, որ առաջիկա 10 տարվա ընթացքում ամենալավ սցենարով երկրագունդը տաքանալու է ևս 1.5 աստիճանով, ինչը վատ է և դրան պետք է պատրաստվել։

Անդրադառնալով այն դիտարկմանը, որ հիմնականում ոռոգման խնդիրը պատճառաբանում են ջրամբարում բավարար քանակով ջրի բացակայությամբ, Վահան Քերոբյանը նշեց, որ տեխնիկական հարցերին չի կարող պատասխանել և դրանց հասցեատերը Ջրային կոմիտեն է։

Աղբյուր` Փաստինֆո