Փաստ ինֆո

Թուրքիայի և Ադրբեջանի համատեղ զորավարժությունները թուրք-ադրբեջանական տանդեմի ռազմավարական պլանավորման արդյունք են, դրանք նպատակ ունեն Հայաստանի վրա հոգեբանական ճնշում գործադրելու: «Փաստինֆո»-ի հետ զրույցում ասաց ՊՆ նախկին նախարար, գեներալ-գնդապետ Սեյրան Օհանյանը՝ հավելելով, որ սա նաև ուժի ցուցադրում է մեր ռազմավարական գործընկերոջը՝ Ռուսաստանին և տարածաշրջանային այլ երկրներին:

Սեյրան Օհանյանը նկատեց, որ կա նաև երրորդ երկրի՝ Պակիստանի ուժերի կիրառում, ինչը, ըստ նրա, երկու նպատակ կարող է ունենալ. Առաջին՝ հատուկ նշանակության ստորաբաժանումների համատեղ գործողությունների փորձարկում ժամանակակից օպերացիաներում, երկրորդ՝ Պակիստանի հատուկ ստորաբաժանումները, կարող են այլ երկրի անվան տակ գործողություններ իրականացնել և հետախուզական տվյալներ հայթայթեն ՀՀ տարածքում.

«Այս առումով մեր ԱԱԾ-ն և սահմանապահ ուժերը պետք է համատեղ պլանավորում իրականացնեն՝ արտաքին և ներքին սպառնալիքներին դիմակայելու համար»,-ասաց Օհանյանը:

Իսկ թե զորավարժությունները կարո՞ղ են վերածվել լայնամասշտաբ պատերազմի՝ զրուցակիցը քիչ հավանական համարեց դա.

«Սրանք հոգեբանական ճնշման և ուժի ցուցադրման զորավարժություններ են և լայնամասշտաբ պատերազմի չեն վերածվի՝ հաշվի առնելով այն հանգամանքը, որ մեր տարածաշրջանում ուժային կենտրոնների շահեր գոյություն ունեն, հատկապես՝ մեր ռազմավարական գործընկերը՝ ՌԴ-ն և նրա խաղաղապահ ստորաբաժանումները, որոնք տեղակայված են Արցախում»:

ՊՆ նախկին նախարարն ընդգծեց, որ ՀՀ զինված ուժերը պետք է վեր հանեն ՌԴ-ի և ՀԱՊԿ-ի հետ համատեղ բոլոր ռազմական փաստաթղթերը և նրանց հետ համատեղ կատարելագործեն ռազմական ունակությունները.

«Պետք է նաև դիվանագիտական և ռազմադիվանագիտական ճանապարհով միջազգային հանրությանը ներկայացվի , արդյո՞ք թուրք-ադրբեջանական զորավարժությունները պլանավորված են, թե՞ արտապլանային»,-ասաց Օհանյանը և ավելացրեց.«Մեր երկրի ղեկավարությունը, հատկապես ՝ ռազմաքաղաքական ղեկավարությունը, պետք է թույլատրելիության սահմաններում մեր հասարակությանը հասանելի դարձնել որոշակի տեղեկություններ, որպեսզի մեր հասարակության մոտ մտավախություններ չլինեն և հասարակությունը վստահ լինի, որ մեր բանակը մնում է անվտանգության հիմնական երաշխավորը»:

Աղբյուր` Փաստինֆո