Փաստ ինֆո

Արմավիրի նախկին քաղաքապետ, «Պատիվ ունեմ» դաշինքի պատգամավորի թեկնածու Ռուբեն Խլղաթյանի նկատմամբ ընտրված խափանման միջոց կալանավորումը մնացել է անփոփոխ։ Վերաքննիչ քրեական դատարանը՝ դատավոր Ռուզաննա Բարսեղյանի նախագահությամբ, մերժել է Խլղաթյանին կալանավորելու որոշման դեմ փաստաբանների բողոքը՝ առաջին ատյանի դատարանի որոշումը թողնելով անփոփոխ։ Այս մասին «Փաստինֆո»-ի հետ զրույցում հայտնեց փաստաբան Գայանե Պապոյանը։

Ինչպես արդեն տեղեկացրել ենք՝ Ռուբեն Խլղաթյանը ձերբակալվել է հունիսի 10-ին՝ ՀՀ քրեական օրենսգրքի 34-154.2-րդ հոդվածի երկրորդ մասի հատկանիշներով՝ ընտրակաշառք բաժանելու փորձի կասկածանքով։ Նրան ձերբակալելու որոշման դեմ բողոք է ներկայացվել, որն ի սկզբանե մակագրվել էր Արմավիրի մարզի ընդհանուր իրավասության դատարանի դատավոր Արթուր Ադամյանին, սակայն վերջինս ինքնաբացարկ է հայտնել՝ բավարարելով քննիչի միջնորդությունը, իսկ դատավոր Վահե Ջիվանյանը բարձրացրել է ընդդատության հարցը՝ բողոքը փոխանցելով Երևանի ընդհանուր իրավասության դատարանին, սակայն մինչ ձերբակալման իրավաչափության հարցը կքննարկվեր, վարույթ իրականացնող մարմինը շտապել է մեղադրանք առաջադրել Խլղաթյանին և նրա նկատմամբ կալանավորումը որպես խափանման միջոց ընտրելու մասին միջնորդություն ներկայացրել դատարան, որը բավարարվել է:

Պաշտպանները վերաքննիչ բողոք են ներկայացրել դատարանի որոշման դեմ՝ վիճարկելով թե՛ հիմնավոր կասկածի, թե՛ կալանավորման հիմքերի առկայությունը։

Հունիսի 25-ին պետք է կայանար բողոքի քննությունը, սակայն դատական նիստը հետաձգվել էր՝ Խլղաթյանի առողջական խնդիրների պատճառով։ Դատական նիստը կայացել է այսօր, որի ընթացքում բողոքը, ըստ էության, քննվել է, ինչից հետո դատարանը հեռացել է խորհրդակցական սենյակ, ապա՝ հրապարակել որոշումը։

Վերաքննիչ դատարանի որոշումը պաշտպանության կողմը դեռևս չի ստացել, ուստի՝ դեռևս վաղ է խոսելը, թե կբողոքարկվի այն արդյոք, թե ոչ։
Նշենք, որ Ռուբեն Խլղաթյանի առողջական խնդիրների մասին հայտնի է դարձել դեռևս նրա ձերբակալման օրերին, երբ պաշտպանության կողմը հայտնել էր, որ Խլղաթյանն ունի խրոնիկ հիվանդություններ։ Այս պահին նա գտնվում է «Արմավիր» ՔԿՀ-ում։
Պաշտպանության կողմը բարձրացրել է Խլղաթյանի՝ քաղաքացիական հիվանդանոցում բուժզննում անցնելու հարցը, սակայն պատասխան դեռևս չի ստացվել։

Հիշեցնենք՝ վարույթ իրականացնող մարմինը հունիսի 12-ին մեղադրանք է առաջադրել Ռուբեն Խլղաթյանին և Գ. Պ.-ին՝ ՀՀ քրեական օրենսգրքի 34-154,2-րդ հոդվածի 4-րդ մասի 1-ին և 2-րդ կետերով՝ մի խումբ անձանց կողմից ենթադրյալ ընտրակաշառք տալու փորձի հատկանիշներով, որն իրականացվել է երկու կամ ավելի անձի նկատմամբ: Ռ. Խլղաթյանը մեղադրանքը չի ընդունել՝ նշելով, որ այն շինծու է։

Հեղինակ՝ Իզաբել Սահակյան

Աղբյուր` Փաստինֆո