Փաստ ինֆո

Չեմ ուզում, որ պետությունների, քաղաքական ուժերի կամ անհատների միջև մրցակցություն լինի, թե ում աշխատանքի շնորհիվ են վերադարձվել գերիները։ Պարզ է մի բան, որ հայ ռազմագերիներն անօրինական ձևով են գտնվում Ադրբեջանում։ ԵԽԽՎ ԱԺ պատվիրակության մամուլի ասուլիսի ժամանակ այս մասին ասաց «Իմ քայլը» խմբակցության պատգամավոր Հովհաննես Իգիթյանը՝ անդրադառնալով հարցին, թե ում ջանքերի շնորհիվ են մինչ այս վերադարձվել հայ գերիները։

Վերջինս նշեց, որ անընդհատ պետք է նշեն այն պատճառը, թե ինչու են ռազմագերիները հայտնվել այնտեղ։ Պատգամավորի կարծիքով, երբ ճիշտ ներկայացնեն հայ ռազմագերիների այնտեղ հայտնվելու պատճառը, այդ ժամանակ կկարողանանք հնարավորինս շուտ վերադարձնել գերիներին։

«Մենք պետություն ենք և բոլոր ուժերը, որոնք պայքարում էին ընտրությունների ժամանակ, գտնվում են խորհրդարանում և ինձ թվում է՝ ժամանակն է, որ խորհրդարանական բոլոր ուժերն այդ հարցում ունենան մեկ մոտեցում»,-ասաց պատգամավորը։

«Իմ քայլ»-ի պատգամավոր Տաթևիկ Հայրապետյանն էլ նկատեց՝ ՀՀ կառավարությունը հսկայական աշխատանք է տարել գերիներին վերադարձնելու ուղղությամբ, քանի որ միջազգային ճնշումներն օդից չեն հայտնվել. «Դրանք շատ համառ, երկարատև աշխատանքի արդյունք են։ Երբ Մարալ Նաջարյանն ազատ արձակվեց, այդ ժամանակ ես և խորհրդարանի բոլոր խմբակցությունների կանայք հանդես էինք եկել Մատվիենկոյին դիմելու նախաձեռնությամբ»,-ասաց պատգամավորը։

Հարցին՝ ի՞նչ խաղաղության պայմանագրի մասին է խոսում Ալիևը, Տաթևիկ Հայրապետյանն ասաց. «Հնարավոր չէ կառուցել կայուն խաղաղություն, երբ մեր քթի տակ զորավարժություններ են անում, երբ առավոտից երեկո սպառնում են մեզ, երբ վիրավորում են հայ ժողովրդին և ամեն կերպ փորձում ոտնահարել արժանապատվությունը, երբ խոսում են, որ Լեռնային Ղարաբաղի խնդիր գոյություն չունի, մինչդեռ միջազգային գործընկերներն էլ ասում են, որ հակամարտությունը լուծված չէ։ Ես խաղաղության որևէ փաստաթղթի մասին տեղյակ չեմ։ Գիտեմ, որ Ալիևն այդ խոսակցությունը տանում է, կոմունիկացնում է տարբեր գործընկերների հետ և փորձում տարբեր մեսիջներ ուղարկել, բայց անձնապես չգիտեմ»։

Աղբյուր` Փաստինֆո