Փաստ ինֆո

Մեր հիմնական խնդիրն այսօր ոչ թե կառավարման համակարգն է, այլ այն, որ չենք ձևավորել արժեքային համակարգ: Այս մասին «Փաստինֆո»-ի հետ զրույցում ասաց Մարդկային զարգացման միջազգային կենտրոնի նախագահ Թևան Պողոսյանը՝ նշելով, որ հանրության մեծ մասը անհասկանալի ընտրություն կատարեց՝ ի վնաս մեր անվտանգության

«Այսինքն կարևոր չէ՝ Հայաստանում կլիներ նախագահական, թե խորհրդարանական համակարգ, քանի որ ընտրությունը միևնույն է լինելու էր հօգուտ Փաշինյանի: Երկիրը պետք է նախ և առաջ արժեքներ ձևավորի: Խորհրդարանական համակարգը տալիս է շատ լավ հնարավորություն բազմակարծության համար, իսկ նախագահական համակարգի ժամանակ մենք մեղադրում էինք երկրի ղեկավարին, որ ամեն ինչը մեկ մարդու ձեռքում է», - շեշտել է նա:

Պողոսյանի խոսքով՝ նույն մեղադրանքները հնչեցին, երբ անցում կատարեցինք խորհրդարանական համակարգին, քանի որ այդպես էլ չձևավորվեցին կուսակցական և արժեքային համակարգերը:

«Մենք լուծարեցինք այն խորհրդարանը, որի մեջ կար երկխոսության հնարավորություն, որը ընտրվել էր 2017 թվականին: Իսկ 2018 թվականին ընտրեցինք մի խորհրդարան, երբ ամբողջ իշխանությունը կենտրոնացված էր մի քաղաքական թիմի ձեռքերում: Այստեղ այլևս երկխոսության հնարավորությունը չկա»,- նկատեց նա՝ ավելացնելով, որ այսօրվա Հայաստանում հանրության 1/4-րդը հայտնեց, որ չի ցանկանում Արցախ տեսնել, հետևել իր անվտանգությանը և եթե այսպես շարունակվի մի օր մենք կդառնանք թուրքական վիլայեթ: Այս Հայաստանում ոչ մի տարբերություն չկա, թե որ համակարգն է գործում երկրում:

«Բանն այն է, որ մենք այդպես էլ չկարողացանք ձևավորել խորհրդարանական իշխանության համակարգ, ձևավորվեց սուպեր-վարչապետական համակարգ: Այսօր ամենակարևորն է վերականգնել պետականության ինքնությունը, մնացածը երկրորդական հարցեր են», -եզրափակեց Պողոսյանը:

Հեղինակ՝ Անի Մշեցյան

Աղբյուր` Փաստինֆո