Փաստ ինֆո

Խորհրդարանում քննարկվում է «ՀՀ քաղաքացիական օրենսգրքում փոփոխություններ կատարելու մասին օրինագիծը» առաջին ընթերցմամբ ընդունելու մասին հարցը։  Նախագիծը վերաբերում է պետական և համայքնային հողի վրա ինքնակամ շինություն կառուցելուն։ Օրենքի նախագծի համահեղինակ Նիկոլայ Բաղդասարյանը նշեց, որ ներկա օրենսգիրքը թույլ է տալիս համայնքի ղեկավարին օրինականացնել համայնքի հողի վրա կառուցված ինքնակամ շինությունները։ Ըստ պատգամավորի` եթե անգամ համայնքի ղեկավարը չցանկանա օրինականացնել կառուցապատողի անօրինությունը, դա կարող է արվել դատական կարգով։

Օրենքի համահեղինակ Հովիկ Աղազարյանն էլ իր ելույթում շեշտեց, որ որպես իշխանության ներկայացուցիչ ինքն իրեն այդ հարցում պատասխանատու է զգում։

«Շատ տգեղ ու վիրավորական է, մանավանդ, երբ որ դու իշխանություն ես ներկայացնում։ Ես եղել եմ այն իրավիճակում, որ անցնում ես փողոցով ու մարդիկ հայացքով քեզ ցույց են տալիս այն կառույցը, որ արդեն մտել է փողոցի մեջտեղը։ Ասում են. «Դու ո՞վ ես, քեզանից ի՞նչ ես ներկայացնում»։ Ու ես մի անգամ էդ տղաներից մի քանիսին ասացի. «Մյուս անգամ ես չեմ ընտրվի, դուք իմ գլուխը էս ասֆալտի վրա կջնջխեք, ես գիտեմ։ Բայց դա ինձ չի հետաքրքրում, սա պիտի քանդվի»։

Աղազարյանը նշեց, որ ինքնակամ կառույց տերմինը հիմա այնպես է ներկայացվում, կարծես դրական երևույթ է։

«Մի հատ էլ պարոն Վարդանյանն ասում է, եթե հանկարծակի մի շենք են սարքել, սյունը հանկարծ հայտնվել է համայնքային տարածքում, ի՞նչ անի էդ մարդը։ Էդ մարդը թող բարի լինի գնա թույլտվություն վերցնի։ Եթե հանկարծ դրանից հետո էլ կադաստրի մեր գործընկերների ամբողջական աշխատանքը չավարտելու պատճառով թերություններ կլինեն, կպարզվի, որ սյունը համայնքային հողում է, թույլտվություն տվողը պետք է պատասխան տա»։

Պատգամավորը հավելեց՝ եթե իշխանության կողմից ցույց տված միջամտությունները չլինեին, ապա Երևանը կկորցնեինք կարճ ժամանակում՝ ամբողջությամբ պատվելով ինքանկամ կառույցներով։

Աղբյուր` Փաստինֆո