Փաստ ինֆո

Նվիրաբերողները Համահայկական հիմնադրամի հայտարարած դրամահավաքին գումար են փոխանցել՝ ներկայացված ծրագրերի, այսինքն կոնկրետ նպատակի համար, մինչդեռ գումարները փոխանցվել են կառավարությանը, ինչը յուրացում է։ Այսօր նման հայտարարությամբ է հանդես եկել Կոնտրա լեգեմ փաստաբանական ընկերության ավագ իրավաբան Աբգար Պողոսյանը։

Փաստաբանը պարզաբանել է, որ վերջին դրամահավաքի նպատակն էր ` Արցախյան պատերազմի ընթացքում օգնություն տրամադրելը, որի արդյունքում հավաքվել էր բավականին մեծ գումար:
«Այս փուլում, կոնկրետ ծրագրերից դուրս Համահայկական հիմնադրամը գումար է փոխանցում կառավարությանը, եւ կառավարությունը գումարներ տնօրինելու հարցում դառնում է անկաշկանդ, կարող է այդ գումարը ուղղել այլ նպատակների համար: Օրինակ` կարող է պարգևավճարներ բաժանել, կամ այդ գումարը ուղղել հայ-թուրքական բարեկամությանը», - ասել է իրավաբանն ու արձանագրել. «Այսինքն, բարեգործները գումարը տրամադրել են կոնկրետ բարեգործության համար, իսկ գումարը գնացել է կառավարություն, որը կարող է անկաշկանդ կառավարել այն»։

Պողոսյանի դիտարկմամբ՝ այստեղ առկա է յուրացման հանցակազմ: «Յուրացման հանցակազմի մեջ կարևոր է հանցավորի վստահված գույքը վատնելը կամ օտարելը: Այսինքն, տվյալ դեպքում Համահայկական հիմնադրամին վստահվել են գումարներ, իսկ վերջինս այդ գումարը փոխանցել է կառավարությանը: Այստեղ առկա է հափշտակության տեսակ: Այս մասով հաղորդում ենք ներկայացնելու Գլխավոր դատախազին»,- նշել է մասնագետն ու արձանագրել, որ նվիրաբերությունները կատարել են ոչ միայն ամերիկահայերը, այլ նաեւ Եվրոպայում բնակվող հայերը, որոնց նվիրատվությունները փաստացի յուրացվել են։

Պողոսյանը հայտնեց, որ հիշյալ հանգամանքները կարող են բացահայտվել միայն պատշաճ ընթացակարգով, հարուցված քրեական գործի շրջանակներում: Ավելին, չբացառեց նաեւ միջազգային իրավապահ մարմինների ներգրավումը՝ նկատի ունենալով նվիրատուների տարբեր երկրների քաղաքացիներ լինելու հանգամանք։

«Շատ կարևոր է պարզել նաեւ, արդյոք Համահայկական հիմնադրամը գործել է սեփական նախաձեռնությամբ, թե ստիպել են, կամ ընդհանուր խումբ է գործել: Մենք կարծում ենք, որ գործ ունենք կազմակերպված խմբի հետ: Իսկ միջազգային իրավապահ մարմինների ներգրավումը կզսպի շատ ռիսկեր, կապահովի որ պատշաճ ձևով ընթացակարգը իրականանա», - ասել է Պողոսյանը:

Աղբյուր` Փաստինֆո