Փաստ ինֆո

Մեղրիի գնդի հրամանատար, գնդապետ Արգամ Գևորգյանի նկատմամբ նշանակված ծառայողական քննությունը զայրացրել է մի շարք զինծառայողների հարազատներին, վստահեցնում են՝ մի շարք կյանքեր փրկած հրամանատարը նման վերաբերմունքի արժանի չէ։

«Փաստինֆո»-ի հետ զրույցում Արցախյան երրորդ պատերազմի մասնակից հերոս տղաներից մեկի հարազատը՝ Էմիլ Սարգսյանը նշեց, որ չնայած քաղաքացիական կյանքում Գևորգյանին չի ճանաչել, սակայն գնահատում է նրա որպես հրամանատարի գործունեությունը։

Գևորգյանի մասին տեղեկացել է այն ժամանակ, երբ հարազատը ծառայության է մեկնել Ջաբրայիլի զորամաս։

«Երեխայի մոտ գնալ-գալով եմ ճանաչել ու ընդհանուր զորքի կարծիքն է եղել՝ թե որքան լավ հրամանատար է ինքը, չի եղել մի զինվոր, որ բողոքի։ Եթե սխալ է եղել ծառայության մեջ, երեխային բացատրել է՝ ոնց կարելի է ճիշտ ծառայություն տանել, պատժելի է եղել՝ պատժել է։

Ինքը որպես սպա շատ լավ մարդ է։ Ամբողջ զորամասը մի մարդու նման նրան հարգել է որպես հրամանատար։ Ոչ մի զինվոր նրա խոսքը երբեք գետնին չի թողել»։

Սարգսյանը հիշեց հրամանատարի սխրանքները պատերազմի օրերին, երբ մինչև վերջին վայրկյանը զինվորների կողքին է եղել, նույն խրամատում իր ենթակաների հետ մնացել ու վիրավորվել է։ Հրամանատարը շատ լավ է տիրապետել պատերազմական վիճակին։

Հերոսի հարազատը տարօրինակ է համարում, որ պատերազմից ամիսներ առաջ Գևորգյանը Ջաբրայիլի զորամասից տեղափոխվել է Մեղրիի զորամաս և հրամանատարի պաշտոն ստացել։

«Ինքը կարող էր կառավարել մինչև 2,500 զորք։ Ինչի պետք է իրեն տեղափոխեին այդ զորամասից։ Իր սիրտը նաև ցավում էր, որովհետև զորամասի կարգապահությունից բացի եկեղեցիներ ու պոստեր էր կառուցել, այդ տղան էդքան չարչարանք է ունեցել։ Ինչի՞ եկավ հասավ վերջին պահը՝ նրան տեղափոխեցին Մեղրիի գունդ՝ դարձավ հրամանատար, ինչո՞ւ հեռացրեցին այնտեղից։ Բոլորի խոսքն այն էր, որ պատերազմական վիճակում Ջաբրայիլից իրեն հանելը նշանակում էր քանդել զորամասը»։

ՀՀ ՊՆ-ն նրա նկատմամբ ծառայողական քննություն նշանակելու մասին հայտարարել է հունիսի 8-ին՝ առանց նշելու պատճառները, սակայն տելեգրամյան ալիքներում տեղեկություն տարածվեց, թե նրան և Մեհրաբի զորամասի հրամանատար Ա.Թադեւոսյանին մեկուսացրել են, քանի որ հրաժարվել են Փաշինյանի օգտին ձայներ ապահովել։ Իսկ հունիսի 28-ին ՀՀ ՊՆ-ն նշեց, որ ծառայողական քննությունը երկարացվել է առնվազն մինչև հուլիսի 5-ը։

Զինվորների հարազատները այս պահին դժվարանում են գնահատական տալ, թե ինչո՞ւ է Գևորգյանի նկատմամբ քննություն իրականացվում։

«Չեմ կարող ասել քաղաքական հայացքներ են, թե զինվորական հարցեր կան, որ ինքը տեղյակ է։ Որոշակի ուրիշ բաներ էլ են խոսում, թե ինչ որ մի կին ցուցմունք է տվել, թե Գևորգյանն առաջարկել է, որ ընտրություններին ընտրի Ռոբերտ Քոչարյանին»,- ասաց մեր զրուցակիցը։

Զինվորի հարազատն արձանագրում է՝ հարյուրավոր երեխաների մահվան պատճառ դարձած սպաներից որեւէ մեկը պատասխանատվության չի ենթարկվել, թեեւ ծնողները բազմիցս են այդ մասին բարձրաձայնել, փոխարենը այսօր լավ հրամանատարին են մեկուսացնում, կադրային ջարդի ենթարկում։

«Այս ութ ամսվա մեջ այնքան ինֆորմացիա ենք ձեռք բերել, թե ինչ ձևի սպաներ կան մեր զորամասերում, ուղղակի աբսուրդ է։ Համամիտ եմ կադրային ջարդին, բայց մարդիկ, ովքեր նվիրված են հայրենիքին, ափսոս են։ Էնքան մարդիկ կան, որ նստած ալարում են իրենց քորեն», - ասել է Է.Սարգսյանը ու ավելացրել. «Այսօր մեր երեխեքը ո՞ւմ պատճառով չկան, այդ ամենը եղել է անփույթ սպաների պատճառով, որոնք ծառայության ընթացքում իրենց կյանքը պետք է դնեին։ Մենք շուրջ ութ ամիս է դիմել ենք դատախազություն, քննչական, ռազմական, բոլոր ուժային կառույցները տեղյակ են այդ ամենից, սակայն ոչ մեկի պատասխանատվության չեն ենթարկել։

Բոլորն էլ այսօր գտնվում են ազատության մեջ։ Որոշները դատարանների դահլիճից են ազատ արձակվում։ էն տականքները, որոնք թողել են մեր երեխեքին, այսօր նույն օդն են շնչում»։

Մեր զրուցակիցն արձանագրեց՝ Աստված չանի նորից պատերազմ սկսվի՝ ինքն այլեւս չի վստահի ոչ մի սպայի։

Սարգսյանը նշեց, որ եթե մեղավորները ութ ամիս անց չեն պատժվել, հզոր հրամանատարին իրավունք չունեն տեղափոխելու։ Ծնողները պատրաստ են հանդես գալ ի պաշտպանություն Գևորգյանի։

Լուսանկարում՝ Արգամ Գեւորգյանն է։

«Ծնողներով պատրաստ ենք սատար կանգնել նման հրամանատարներին, ում ճանաչում ենք, գիտենք, որ բոլորի կողքին են եղել»,- ասել է Սարգսյանը՝ նշելով, որ ըստ իրենց տեղեկությունների Ա. Գեւորգյանին պատրաստվում են Մեղրիի զորամասից տեղափոխել։ Եւ սա այն դեպքում, երբ հրամանատարը պատրաստ է եղել իր կյանքը տալ երեխաների հետ միասին, երբ հակառակորդը վախեցել է միայն այն փաստից, երբ իմացել է, որ Արգամը Ջաբրայիլի զորամասում է։

Աղբյուր` Փաստինֆո