Փաստ ինֆո

Ադրբեջանը հայ ռազմագերիներին քաղաքական առևտրի առարկա է դարձնում: Հայաստանի կառավարությունն այս հարցը պետք է բարձրացնի միջազգային դատարաններում: «Փաստինֆո»-ի հետ զրույցում ասաց ՀՀ ԱԺ «Լուսավոր Հայաստան» խմբակցության պատգամավոր, իրավաբան Տարոն Սիմոնյանը՝ արձանագրելով, որ Ադրբեջանն իր յուրաքանչյուր հայտարարությամբ ապացուցում է, որ խախտում է պատանդների հետ վարվելակերպի միջազգային կոնվենցիան, որը սահմանում է՝ չի կարելի ռազմագերիների հետ կապված որևէ առևտրային պահանջ ներկայացնել.

«Ադրբեջանն ասում է՝ տվեք ինձ ականապատ տարածքների քարտեզը, ռազմագերի կտամ, հետո էլ ասում է ՝ ճանաչեք տարածքային ամբողջականությունը, միջանցք տրամադրեք, սա քաղաքական առևտուր է: Ես ԱԺ ամբիոնից բազմիցս Կառավարությանը հորդորել եմ, որ իրավական գործընթաց սկսեն այս կոնվենցիայի շրջանակում, նաև հարցը բարձրացնեն արդարադատության միջազգային դատարանում, բայց մեր կառավարությունը չի շարժվում»,-ասաց Սիմոնյանը և ընդգծեց՝ ամեն նման հայտարարությունից հետո հայկական կողմի իրավական քայլերը պետք է ակտիվանան, որպեսզի Ադրբեջանի նմանատիպ հայտարարություններն օգտագործվեն դատարանում:

Զրուցակիցը նկատեց, որ, չնայած բազմաթիվ հորդորներին, Հայաստանի իշխանությունն որևէ քայլ չի ձեռնարկում.

«Միայն Եվրադատարանով են հայցեր ներկայացվել և սկսվել է գործընթաց՝ խտրականության բոլոր ձևերի վերացման կոնվենցիայի շրջանակում, մինչդեռ 5-ից ավելի կոնվենցիա կա, որոնց շրջանակներում կարելի է իրավական գործընթաց սկսել: Ամեն կոնվենցիա իր գործիքակազմը տալիս է, պատանդների հետ կապված կոնվենցիան տալիս է սկզբում վեճերի արբիտրաժային լուծում, հետո՝ արդարադատության միջազգային դատարան, կա վարձկանների ներգրավման արգելքի կոնվենցիա, որը երկկողմանի վավերացված է, սա էլ նույն մեխանիզմն է նախատեսում,կա նաև ահակբեկչության ֆինանսավորման դեմ ուղղված կոնվենցիա, բայց սրանցից ոչ մեկը չի օգտագործվել»,-ասաց Սիմոնյանը:

Մեր այն դիտարկմանը՝ արդյո՞ք հայկական կողմը, գերիների դիմաց ականապատ քարտեզներ տրամադրելով, գերիներին չդարձրեց քաղաքական առևտրի առարկա, Տարոն Սիմոնյանն ասաց.

«Եթե չեմ սխալվում, վարչապետը հայտարարել է, թե դա բարի կամքի դրսևորում է, և դրանով իսկ ասել է, որ դա առևտրի առարկա չէ, բայց եթե այդպես է, ուրեմն մտածելու բան ունենք»:

Նա նաև նկատեց, որ ականապատ տարածքների քարտեզներին տիրապետում է ոչ թե Հայաստանի Հանրապետությունը, այլ՝ Արցախի Հանրապետությունը և միայն Արցախի համաձայնության պարագայում կարող էին այդ տրվել Ադրբեջանին.

«Ես չգիտեմ՝ Արցախի համաձայնությունն առկա է թե ոչ: Եթե առկա չէ, ապա այստեղ խախտում կա»,-ասաց Սիմոնյանը:

Հիշեցնենք, որ անհետ կորած զինվորների և գերիների ծնողները Կառավարությունից պահանջել են ստեղծել հանձնաժողով, որտեղ ներկայացված կլինեն ԱԱԾ-ի, Կառավարության, ՊՆ-ի և ծնողների ներկայացուցիչները, ինչին Նիկոլ Փաշինյանը տվել է իր համաձայնությունը:

Հարցին՝թե ի՞նչ կտա այս հանձնաժողովի ստեղծումը և որքա՞նով կնպաստի գերիների վերադարձի գործընթացին, Տարոն Սիմոնյանը նշեց, որ այդ հանձնաժողովն ընդամենը հնարավորություն կտա, որ ծնողներն ավելի շատ ինֆորմացիա ունենան և ԶԼՄ-ներից չտեղեկանան փոփոխությունների վերաբերյալ:

Նա նաև նկատեց, որ ընդդիմադիր խմբակցությունները և անկախ պատգամավորները ևս ավելի հանդես են եկել հանձնաժողով ստեղծելու պահանջով, սակայն իշխանությունը որևէ քայլ չի ձեռնարկել.

«Շատ բան ենք պահանջել, բայց քանի որ իշխանությունն անընդհատ միանձնյա որոշումներ կայացնելու ջատագովն է, չի լսում այդ պահանջները»,-ասաց Տարոն Սիմոնյանը:

Աղբյուր` Փաստինֆո