Փաստ ինֆո

Արցախյան երրորդ պատերազմում նահատակված Ալբերտ Հովհաննիսյանի մայրը՝ Մանիկ Աճեմյանը, այսօր հրավիրվել էր ՀՔԾ՝ վկայի կարգավիճակով հարցաքննության։ Աճեմյանի փաստաբան Արթուր Նահապետյանը «Փաստինֆո»-ի հետ զրույցում հայտնեց, որ իր վստահորդը ՀՔԾ էր հրավիրվել՝ «Հայաստան» դաշինքի պատգամավորի թեկնածու, «Իզմիրլյան» ԲԿ տնօրեն Արմեն Չարչյանի վերաբերյալ քրեական գործի շրջանակներում, քանի որ հանդիսանում է «Իզմիրլյան» ԲԿ աշխատակից։

Հարցաքննությունն այսօր տեղի չի ունեցել, քանի որ, փաստաբանի փոխանցմամբ, Աճեմյանն այն հոգեվիճակում չէ, որ կարողանա մասնակցել քննչական գործողությանը։

«Պայմանավորված անցած տարի տեղի ունեցած ողբերգական դեպքերով՝ տիկին Աճեմյանը հուզական գերլարված վիճակում է գտնվում և մի շարք այլ հարակից հանգամանքներ կան, որոնք վարույթն իրականացնող մարմնին անձամբ եմ այսօր ներկայացրել, որոնց պայմաններում այս պահին նա չի կարող մասնակցել վկայի հարցաքննությանը»,- նշեց Նահապետյանը՝ հավելելով, որ դրանք ներկայացվել ՀՔԾ քննիչին, որ վերջինս գնահատի դրանց հարգելի լինելը։

Նշենք, որ Մանիկ Աճեմյանի մասնակցությամբ այլ քննչական գործողություններ նախկինում չեն իրականացվել, Աճեմյանը պետք է այսօր հարցաքննվեր՝ առաջին անգամ, հետևաբար, այս պահի դրությամբ, նրա և Արմեն Չարչյանի մասնակցությամբ ևս որևէ առերես հարցաքննություն չէր կարող իրականացվել։

Իսկ թե արդյոք «Իզմիրլյան» ԲԿ այլ աշխատակիցներ արդեն հարցաքննվել են, Նահապետյանը նշեց, որ հստակ տեղեկություններ չունի, սակայն չի բացառում, քանի որ գործով մեղադրյալի պաշտպանը հարցազրույցներից մեկում հայտնել է, որ արդեն իսկ կան հարցաքննված վկաներ, որոնք դրական են արտահայտվել պարոն Չարչյանի վերաբերյալ։

Ինչ վերաբերում է հրապարակված ձայնագրությանը, փաստաբանը նշեց, որ տիկին Աճեմյանը որևէ դիրքորոշում չի հայտնել, քանի որ չի մասնակցել վկայի հարցաքննությանը։

Դիտարկմանը, որ, թեև հարցն իսկապես զգայուն է, բայց, այդուհանդերձ, վկան՝ իր դատավարական կարգավիճակով պարտավոր է համագործակցել վարույթն իրականացնող մարմնի հետ, այդ համատեքստում արդյո՞ք քննիչը կընդառաջի, Արթուր Նահապետյանն արձագանքեց՝ նշելով, որ յուրաքանչյուր պարագայում իրենք կողմ են բազմակողմանի, լրիվ և օբյեկտիվ քննության իրականացմանը։ 

Փաստաբանի խոսքով՝ քննությունն այնպես պետք է իրականացվի, որ դրա բոլոր մասնակիցների բարձրաձայնած հարցերին սպառիչ պատասխաններ տրվեն և գործով որևէ մութ անկյուն չթողնվի։

«Այսինքն՝ այս մասով մենք այդ դիրքորոշումն ունենք և լիարժեք պատրաստ ենք մեր վրա դրված պատասխանատվության մասով աջակցելու, որ օբյեկտիվ քննություն իրականացվի»,- ընդգծեց փաստաբանը։

Հեղինակ՝ Իզաբել Սահակյան

Աղբյուր` Փաստինֆո