Փաստ ինֆո

«Իզմիրլյան» ԲԿ տնօրեն, պրոֆեսոր Արմեն Չարչյանի վերաբերյալ քրեական գործ հարուցելու մասին որոշումն ապօրինի է և ենթակա է վերացման: Այս մասին «Փաստինֆո»-ի հետ զրույցում ասաց փաստաբան Էրիկ Ալեքսանյանը` նշելով, որ դատախազություն բողոք է ներկայացրել՝ պահանջելով վերացնել քրեական գործի հարուցման և վարույթ ընդունելու մասին ՀՔԾ-ի խոշտանգումների և մարդու դեմ ուղղված հանցագործությունների քննության վարչության պետի տեղակալ Մարգարյանի որոշումը:

Ինչպես արդեն տեղեկացրել ենք՝ պրոֆեսոր Չարչյանին մեկ ամիս ժամկետով կալանավորելու որոշում է կայացվել մի քրեական գործի շրջանակներում, որը հարուցվել է թելեգրամյան ալիքներից մեկի կողմից հրապարակված ձայնագրության առթիվ:

Փաստաբան Էրիկ Ալեքսանյանը գտնում է, որ քրեական գործ հարուցելու և այն վարույթ ընդունելու մասին ՀՔԾ քննիչի որոշումն ապօրինի է և ենթակա վերացման, քանզի նախապատրաստված նյութերը քննիչի կողմից քննարկվել են բացառապես ՀՀ ՀՔԾ մամուլի քարտուղարի կազմված զեկուցագրի հիման վրա, ընդ որում՝ դա ընդունել է նաև ՀՔԾ-ն՝ իր պաշտոնական հաղորդագրությամբ, մինչդեռ՝ մամուլի քարտուղարը քրեադատավարական առումով սուբյեկտ չէ։

Մասնավորապես, ՀՀ քրեական դատավարության օրենսգրքի համաձայն՝ քրեական գործ հարուցելու առիթներն են՝

1. հանցագործության մասին ֆիզիկական և իրավաբանական անձանց հաղորդումները ՝ ուղղված հետաքննության մարմնին, քննիչին, դատախազին,

2. հանցագործության մասին լրատվության միջոցների հաղորդումները,

3. հետաքննության մարմնի, քննիչի, դատախազի, դատավորի կողմից հանցագործության մասին տվյալների, հանցագործության նյութական հետքերի և հետևանքների հայտնաբերումը՝ իրենց լիազորություններն իրականացնելիս։

Փաստաբանի դիտարկմամբ՝ ՀՀ քր.դատ օրենսգրքի 176-րդ հոդվածի 1-ին մասի 3-րդ կետով նախատեսված՝ երրորդ առիթի տեսանկյունից քրեական գործ հարուցելու օրինական առիթ է համարվում վերը նշված դատավարական սուբյեկտների ֆունկցիոնալ լիազորությունների կատարման արդյունքում հանցագործության նյութական հետքերի և հետևանքների հայտնաբերումը, մինչդեռ սույն պայմաններում ՀՀ ՀՔԾ մամուլի քարտուղարը քրեադատավարական իմաստով չի համարվում հետաքննության մարմնի աշխատակից, քննիչ, դատախազ, դատավոր, ուստի նրա զեկուցագիրը որևէ պարագայում ՀՀ քրեական դատավարության օրենսգրքի 176-րդ հոդվածի 1-ին մասի 3-րդ կետի իմաստով չէր կարող հանդիսանալ քրեական գործ հարուցելու առիթ։

Նրա խոսքով՝ միայն այն բանից հետո, երբ ՀՀ ՀՔԾ մամուլի ծառայության աշխատակիցը կազմել է նույն մարմնի պետին ուղղված զեկուցագիր ենթադրյալ հանցավոր արարքի կատարման հայտնաբերման վերաբերյալ, որն ամբողջությամբ հիմնված է եղել հիշյալ «Բաղրամյան 26» տելեգրամյան ալիքով տարածված տեղեկատվության հիմա վրա, վարույթն իրականացնող մարմինը ձեռնամուխ է եղել նյութեր նախապատրաստելու, այնուհետև քրեական գործ հարուցելու, ինչն արդեն իսկ վկայում է նրա մասին, որ փաստացի քրեական գործ է հարուցվել ոչ օրինական առիթ հանդիսացող զեկուցագրի հիման վրա, իսկ անօրինական առիթի հիման վրա հարուցված քրեական գործը չի կարող համարվել օրինական։

«Դա նույնն է, ինչ վարույթն իրականացնող մարմինը քրեական գործ հարուցելու որոշում կայացներ բացառապես հիմք ընդունելով և որպես օրինական առիթ դիտարկելով «չստորագրված» կամ «կեղծ ստորագրված» կամ «մտացածին անունից» գրված նամակը և այլ «անանուն» հաղորդումն՝ առանց այդ տեղեկատվության իսկությունը ստուգելու կամ էլ օրենսդրությամբ առհասարակ չնախատեսված առիթով»,- նշեց Ալեքսանյանը։

Ինչ վերաբերում է նրան, որ նույն օրը դատախազի կողմից վարույթն իրականացնող մարմնին քրեադատավարական կարգով նյութեր նախապատրաստելու հանձնարարությամբ ուղարկվել էր FIP-Փաստերի ստուգման հարթակում տեղ գտած՝ նշյալ իրադարձության վերաբերյալ հրապարակումը, որն առկա է քրեական գործի նյութերում, ապա Ալեքսանյանն ընդգծեց, որ պաշտպանության կողմն այդ հանգամանքը չի էլ հերքում, սակայն անժխտելի փաստ է, որ ՀՀ դատախազության հիշյալ հանձնարարությունն ի կատար ածելու փոխարեն ՀՀ ՀՔԾ կողմից դրսեւորվել շտապողականության ու օրինական առիթ չհանդիսացող զեկուցագրի հիման վրա փաստացի ապօրինի հարուցվել քրեական գործ, ինչի բացասական հետեւանքնեևը պաշտպանության կողմը չպետք է կրի:

Հիշեցնենք, որ տելեգրամյան մի ալիքում հրապարակվել է ձայնագրություն, համաձայն որի՝ «Իզմիրլյան» բժշկական կենտրոնի տնօրեն Արմեն Չարչյանը հունիսի 18-ի առավոտյան աշխատակիցների հետ հանդիպմանը հորդորել է, որ աշխատակիցները պարտադիր կարգով մասնակցեն ընտրություններին։ Չարչյանը նշել է, որ եթե որևէ մեկը չմասնակցի ընտրություններին, ապա կիմանա այդ մասին։ Ընդ որում` հանդիպլան ձայնագրությունը հրապարակվել էր մոնտաժված տարբերակով, որից հետո հաշված ժամերի ընթացքում ՀՀ ՀՔԾ-ում հարուցվել է քրեական գործ՝ ՀՀ քրեական օրենսգրքի 154.2-րդ հոդվածի 4-րդ մասի 2-դ կետի հատկանիշներով, որի շրջանակներում նախ բերման են ենթարկել Չարչյանին և տեղափոխել ՀՔԾ, ապա ձերբակալելու որոշում կայացրել։ Պաշտպանները բողոք են ներկայացրել Չարչյանին ձերբակալելու մասին որոշման դեմ, ինչը բավարարվել է քվեարկության օրը և նա դատարանի որոշմամբ ազատ է արձակվել։

Հունրսի 21-ին դատախազությունը հաղորդագրություն տարածեց՝ նշելով, որ ԿԸՀ-ն բավարարել է Արմեն Չարչյանի նկատմամբ հետապնդում իրականացնելու և նրան ազատությունից զրկելու համաձայնություն տալու վերաբերյալ միջնորդությունները, ինչից հետո ՀՔԾ-ն շտապեց մեղադրանք առաջադրել Արմեն Չարչյանին՝ ՀՀ քրեական օրենսգրքի 154.2-րդ հոդվածի 4-րդ մասի 2-դ կետի հատկանիշներով և նրա նկատմամբ կալանավորումը որպես խափանման միջոց ընտրելու մասին միջնորդություն ներկայացրել դատարան, որը մասնակի բավարարվել է։

Հեղինակ՝ Իզաբել Սահակյան

Աղբյուր` Փաստինֆո