Փաստ ինֆո

Ուրանի հարստացմանն ուղղված Իրանի հետագա ջանքերը կարող են խանգարել դրա շուրջ նախնական տեսքով պայմանավորվածությունների վերականգնման շուրջ բանակցություններին: Այս մասին ՏԱՍՍ-ի փոխանցմամբ՝ հայտարարել է ԱՄՆ պետքարտուղար Էնթոնի Բլինկենը The New York Times թերթի լրագրողներին տված հարցազրույցում, որը հրապարակվել է ուրբաթ օրը։

«Եթե դա շարունակվի, եթե նրանք շարունակեն շահագործման հանձնել ավելի ու ավելի կատարելագործված ցենտրիֆուգներ՝ հասնելով ուրանի հարստացման ավելի ու ավելի բարձր մակարդակի, ապա ինչ-որ պահի Դա շատ լուրջ դժվարություն կներկայացնի գործնական տեսանկյունից», - ասել է ԱՄՆ արտաքին քաղաքական գերատեսչության ղեկավարը: Խոսելով Վիեննայում ԱՄՆ նախագահ Ջո Բայդենի վարչակազմի կողմից խորհրդակցությունների դադարեցման հնարավորության մասին՝ Բլինկենը նշել է. «Ես չեմ կարող կոնկրետ ժամկետներ սահմանել»: Նրա խոսքով՝ նման հնարավորությունը «մոտենում է»։

Վիեննայում ապրիլից ընթանում են Իրանի և միջազգային «հնգյակի» (Ռուսաստան, Մեծ Բրիտանիա, Գերմանիա, Չինաստան և Ֆրանսիա) միջև առկա բանակցությունները՝ Իրանի միջուկային համաձայնագիրը սկզբնական տեսքով վերականգնելու նպատակով: Փորձագետները երեք աշխատանքային խմբերի կազմում մշակում են Գործողությունների համատեղ համապարփակ ծրագրի (ԳՀՀԾ) կատարման վերսկսման մասին պայմանավորվածության տեքստը՝ Իրանի դեմ ԱՄՆ-ի պատժամիջոցների չեղարկումը (եւ ԱՄՆ-ի հետագա վերադարձը գործարքին) եւ Իրանի միջուկային պարտավորությունների կատարումը:

Աղբյուր` Փաստինֆո