Փաստ ինֆո

Մենք պատրաստել ենք բաց նամակ, որը ստորագրել է բժշկական հանրության 539 ներկայացուցիչ։ Այս մասին լրագրողների հետ զրույցի ժամանակ ասաց բժիշկ Ս. Սահակյանը

Վերջինս ընթերցեց բաց նամակը, որն ուղղված է ՀՀ քաղաքացուն, վարչապետին, նախագահին, Գլխավոր դատախազին, Արդարադատության նախարարին, ՄԻՊ-ին և Առողջապահության նախարարին.

«Մասնագիտական գործունեության բերումով համոզված ենք, որ մարու կյանքը գերակա արժեք պետք է լինի ՀՀ-ում։ Մարդու կյանքի որակի բարելավումը նախապայմանն է բոլոր այլ տեսակի բարեկեցությունների։ Մարդու կյանքի պահպանման և որակի բարելավման սուրբ գործին ենք ծառայում մենք։ Կարծում ենք՝ ոչ ոք և ոչինչ մեզ չպետք է խանգարի՝ շարունակելու ծառայել այդ նպատակին։

Մեր եղբայր, ընկեր, գործընկեր, պրոֆեսոր Չարչյանը կալանավորված է։ Երկար տարիներ տառապում է շաքարային դիաբետով, որի մի շարք ծանր բարդությունների պատճառով տեսողական խնդիրների կապակցությամբ վիրահատվել է։ Սրտամկանի անոթների ծանր ախտահարումների կապակցությամբ վերջերս իրականացվել է 3 մագիստրալ-կորոնալ անոթների ստենդավորում։ Երիկամների սուր անբավարարության կապակցությամբ մի քանի օր առաջ ստացել է ինտենսիվ բուժում։

Պրոֆեսոր Չարչյանի աշխատասենյակի առջև ամեն օր հիվանդների մեծ հոսք է, որոնք, իրացնելով բժշկին ընտրելու իրենց սահմանադրական իրավունքը, ցանկանում են վիրահատվել հատկապես նրա մոտ։

Վերջին 10 օրվա ընթացքում երիկամների սուր անբավարարության առանձին նշանների, սրտամկանի շարունակվող իշեմիայի, զարկերակային զգալի գերճնշման, ախտանիշային ամոքող բուժումների զուգակցումով պրոֆեսոր Չարչյանը չի դադարեցրել զբաղվել կյանքի իմաստ դարձած իր սուրբ գործով, ամեն օր կատարել է բարդ վիրահատություններ։

Բժշկագիտության պատմությունն ապացուցված է համարում, որ ոչ մի դեղ, ոչ մի վիրահատական գործողություն չի կարող առողջացնել հիվանդին, եթե նրա օրգանիզմը պատրաստ չէ դրան։

Ոչ մի պաշտոնյա հավիտենական չէ։ Կարևոր է մարդը, հավիտենական է նրա բարի գործերը։ Դուք, ձեր ընտանիքի անդամները, ձեր ընկեր-բարեկամները եղել են մեր հիվանդները։ Մեզ ոչինչ չի խանգարելու բուժել ու առողջացնել ձեզ։ Հիմա մեր թիմն ալեկոծված է, չենք կարողանում կենտրոնացնել մեր միտքը, մեր մատների դողը խանգարում է մեզ։ Բժիշկը բուժում է հոգով, մեր հոգին խռովված է։

Ենթադրում ենք, որ վաղը, հաջորդ օրերին չենք կարողանալու բուժել հոգով։ Պրոֆեսոր Չարչյանի մարմինն ու հոգին այսօր օգնության կարիք ունեն։ Մեր հիվանդները մեր օգնության կարիքն ունեն։ Օգնեք մեզ, որ մենք էլ օգնենք մեր հիվանդներին։ Քաղաքական կամ քրեաիրավական հարցերը մեր քննելին չեն, մենք երաշխավորում ենք, որ քրեաիրավական ձեր վախերն իրականություն չեն դառնալու։ Պրոֆեսորն իրավապահ մարմինների առաջին իսկ պահանջով ներկայանալու է։ Վերացրե՛ք կալանքը։ Խնդրում, հորդորում, պահանջում ենք։ Վաղը, հաջորդ օրերին ենթադրում ենք, որ հնարավոր է չկարողանանք հավատարիմ մնալ Հիպոկրատի պատգամներին՝ բուժել հոգով և սրտով։

Ենթադրում ենք, որ կարող է հանենք սպիտակ խալաթները և ալեկոծենք փողոցները, հետո երևի շատանանք։ Ոչ մի պաշտոն հավիտենական չէ, կարևոր է մարդը»,-ասաց Ս. Սահակյանը։

Աղբյուր` Փաստինֆո