Փաստ ինֆո

Հայաստանի առջև կանգնած մարտահրավերներն այնպիսինն են, որ դա այն նվազագույն տնտեսական աճն է, որի պարագայում կկարողանանք մեր անվտանգային և հումանիտար բոլոր հարցերը լուծել։ Լրագրողների հետ զրույցի ժամանակ այս մասին ասաց ՀՀ էկոնոմիկայի նախարարի պաշտոնակատար Վահան Քերոբյանը՝ անդրադառնալով իրենց նախընտրական ծրագրում նշված 9 տոկոս տնտեսական աճին, որը խոստացել են ապահովել։

«Ունենք մանրամասն ծրագիր, մի փոքր ճշգրտումներ կանենք։ Իհարկե պետք է ամեն ինչ անենք, որ ներդրումային միջավայրը լավանա, պետք է այնպես անենք, որ բյուրոկրատական բարիերները վերանան, պետք է այնպես անենք, որ լուծենք այդ հարցերը»,-նշեց Վահան Քերոբյանը։

Հարցին՝ ինչպե՞ս են տնտեսական աճ ապահովելու, եթե շատ գործարարներ ասել են, որ եթե իշխանությունները վերընտրվեն, հեռանալու են երկրից, Վահան Քերոբյանն ասաց. «Տնտեսվարողների, բիզնեսմենների 90 տոկոսն ինձ խոստովանում էին, որ եթե իշխանափոխություն տեղի ունենա, ապա կարտագաղթեն։ Կարծում եմ՝ մենք ամեն ինչ պետք է անենք, որ Հայաստանում եղած ամբողջ ներուժը համախմբենք, որովհետև մեր երկիրն այնքան փոքր է և ռեսուրսներն էլ այնքան քիչ են, որ իրավունք չունենք մսխել այդ ռեսուրսները»,-նշեց Վահան Քերոբյանը։

Վերջինս նշեց, որ մարդկանց մի մասը հիասթափված է 44-օրյա պատերազմի արդյունքից, և պետք է այնպիսի միջավայր ստեղծեն, որ այդ հիասթափությունն առիթ չդառնա գնալու։

Դիտարկմանը, որ ընտրության արդյունքներն ավելի են հիասթափեցրել մարդկանց, Վահան Քերոբյանը նկատեց՝ սա հայ ժողովրդի ընտրությունն է, ինչը պետք է հարգել։

«Ընտրություններն այս ձևով անցկացնելը մեր ամենամեծ ձեռքբերումն է։ Մենք բետոնեցինք մեր ժողովրդավարական ճանապարհը։ Ես շատ եմ շփվում նաև միջազգային կառույցների և ընկերությունների հետ, Հայաստանի ամենամեծ մրցակցային առավելությունը տարածաշրջանում ազատ տնտեսություն է»,-ասաց նախարարը։

Աղբյուր` Փաստինֆո