Փաստ ինֆո

Դեռ վաղ է համակերպվել Նիկոլ Փաշինյանի 53.92% -ի հետ և առավել ևս պետք չէ շտապել մեր ժողովրդին տրամաբանությունից զուրկ ամբոխ ներկայացնել, այսօր տեղի ունեցած մամուլի ասուլիսի ժամանակ ասել է ռազմական փորձագետ Դավիթ Ջամալյանը:

«Փաշինյանը չի հավաքել 53.92%, մենք պետք է հասկանանք իրավական առումով ընտրակեղծիքների ապացուցելի ծավալը: Այդ նկարած արդյունքները նվազագույն շեմն է, որը թույլ է տալիս Փաշինյանին ընտրվել վարչապետ: Սակայն, Փաշինյանի թիմը կաշկանդված է լինելու իր աշխատանքում Ազգային Ժողովում և անգամ 2-3 մանդատի պակասը կարող է իրենց ավելի կաշկանդել», - նշել է Ջամալյանը:

Բանախոսի փոխանցմամբ՝ արձանագրվել են բազմաթիվ ընտրակեղծիքներ եւ եթե հաջողվի ընդդիմությանը Սահմանադրական դատարանում ապացուցել դրանց 1/3-ը, ապա որոշ ընտրատեղամասերում կարող են անվավեր ճանաչվել քվեարկության արդյունքները, որոնք կազդեն վերջնական արդյունքների վրա։ Այս պարագայում բացառված չէ երկրորդ փուլի անցկացումը։

«Հայաստան» դաշինքը պետք է դիմի ՍԴ՝ անխոցելի փաստերով և հաշվի առնելով, որ ՍԴ-ի վրա ճնշում է գործադրելու ոչ այնքան լեգիտիմ իշխանությունը, ապա դատարանը կարող է այդ ճնշմանը չտրվել: Եթե այս ամենը գրագետ ձևով մատուցվի ՍԴ-ին կամ մենք կգնանք երկրորդ փուլին, կամ ընտրությունների արդյունքները կչեղարկվեն»,- հայտարարել է փորձագետը:

Ըստ նրա՝ եթե ընդդիմությունը գոնե մասամբ կարողանա վիճարկել ընտրությունների արդյունքները, ապա շատ հնարավոր է, որ Փաշինյանը այլևս չունենա որոշիչ ձայն Ազգային Ժողովում:

Նա արձանագրել է, որ բոլորն էլ գիտեին, որ Փաշինյանն ունի ընտրազանգված, որ կա մի զանգված, որը պատրաստ է հավատալ Փաշինյանի ամեն մի խոսքին, սակայն այդ մարդկանց թիվն ամենեւին էլ 53 տոկոս չէ, այլ՝ 20-25 տոկոս։

«Բոլոր սոցիոլոգիական հարցումների արդյունքները ես համարում եմ ադեկվատ: Երևանում 43% աջակցություն ունեցող քաղաքական գործիչը չի կարող Կոմիտասում 200 հոգանոց երթ անել, չի կարող Հանրապետության հրապարակը լցնել բիրտ ադմինիստրատիվ ռեսուրս կիրառելով: Եվ մի մարդ, ով ունի մարզերում մեծ աջակցություն չպետք է իր հետ մարզեր տանի շրջիկ աջակիցների մեծ խումբ, որը պետք է մասովկա ապահովի: Մենք մի շարք մարզերում տեսել ենք կիսադատարկ հրապարակներ, եթե նա նման մեծ աջակցություն ունենար, կկարողանար յուրաքանչյուր հրապարակ լցնել», - շեշտել է նա:

Մանրամասները՝ տեսանյութում։

Աղբյուր` Փաստինֆո