Փաստ ինֆո

«Լուսավոր Հայաստան» կուսակցության ղեկավար Էդմոն Մարուքյանը լրագրողների հետ զրույցում հայտնեց, որ հետևում են վերահաշվարկի ընթացքին, կարծում է՝ հաշվարկի ընթացքում մեծ տատանումներ տեղի չեն ունեցել։

«ՔՊ-ի ձայներն են ավելացել, Ազգային ժողովրդավարական բեվեռինը, «Հայաստան» դաշինքինը, բայց ընդհանուր ընտրության վրա ազդող տվյալ դեռ չունենք։ Կարծում եմ, որ բոլոր ընտրատեղամասերում, որտեղ խախտումներ են տեղի ունեցել, քվեարկության արդյունքները պետք է անվավեր ճանաչվեն։ Եթե ապացույցներ լինեին զանգվածային, մասսայական խախտումների վերաբերյալ, որը կարող էր ազդել ընտրությունների արդյունքների վրա, ուրեմն ամբողջ ընտրությունները պետք է անվավեր ճանաչվեն։ Մենք նման տվյալներ չունենք։ Որ ուժերը ունեն՝ կասեն, կներկայացնեն»։

Մարուքյանը հայտնեց նաև, որ այն ուժերը, որոնք պատրաստվում են դիմել ՍԴ հայտարարել են, որ մանդատները վերցնում են, հետևաբար ընդունել են արդյունքները։

«Ես տեսնում եմ, որ ընդհանուր դաշտը ընդունում է մեր ժողովրդի որոշումը, հիմա կարող ես որոշման հետ համաձայն չլինել, չես կարող հաշվի չնստել այդ որոշման հետ»։

Մարուքյանը հավելեց, որ համերաշխության, միասնության օրակարգով են հանդես եկել և ընդունում են, որ պարտվել է այդ օրակարգը։

«Հայաստանում հաղթել են մուրճի և մանգաղի օրակարգերը։ Մեր ժողովուրդը որոշել է, որ ութերերդ գումարման խորհրդարանը պետք է բաղկացած լինի Նիկոլ Փաշինյանի, Ռոբերտ Քոչարյանի և Սերժ Սարգսյանի ուժերից։ ժողովրդի որոշումն է։ Ամեն դեպքում, չեմ կարծում, որ այս խորհրդարանը կլինի ավելի լավը, քան նախորդն էր։»։

Աղբյուր` Փաստինֆո