Փաստ ինֆո

ՀՀ երկրորդ նախագահ Ռոբերտ Քոչարյանի և մյուսների գործով մեղադրող դատախազ Գևորգ Բաղդասարյանը միջնորդություն ներկայացրեց վերաքննիչ դատարան՝ ՍԴ դիմելու և քրեական գործի վարույթը կասեցնելու վերաբերյալ։

«Փաստինֆո»-ի թղթակցի հաղորդմամբ՝ Վերաքննիչ քրեական դատարանում՝ դատավոր Նարինե Հովակիմյանի նախագահությամբ, կազմով՝ դատավորներ Սևակ Համբարձումյանի և Կարեն Մարդանյանի, ընթանում է Ռոբերտ Քոչարյանի և մյուսների նկատմամբ ՀՀ քրեական օրենսգրքի 300,1-րդ հոդվածով քրեական հետապնդումը դադարեցնելու և քրեական գործի վարույթը կարճելու մասին որոշման դեմ բողոքների գործով դատական նիստը։ Վերաքննիչ բողոքներ ներկայացրել են թե՛ պաշտպանության, թե՛ մեղադրող և թե՛ տուժող կողմերը, սակայն դատարանի կողմից սահմանված հերթականության համաձայն՝ առաջինը բողոքը պետք է ներկայացներ մեղադրող կողմը։

Մեղադրող դատախազ Գևորգ Բաղդասարյանը մինչ բողոքը ներկայացնելը, ներկայացրեց միջնորդություն՝ ՍԴ դիմելու և քրեական գործով վարույթը կասեցնելու մասին։ Բաղդասարյանի դիտարկմամբ՝ նշված միջնորդությունն ուղիղ կապ ունի դատարան բերված վերաքննիչ բողոքի լուծման հետ, ուստի՝ անհրաժեշտ է նախ քննել միջնորդությունը, ընդ որում՝ նման միջնորդություն ներկայացվել էր նաև առաջին ատյանի դատարանում։

Մեղադրող դատախազի դիտարկմամբ՝ յուրաքանչյուր ոք ունի արդար դատաքննության իրավունք, որը, միջազգային իրավական ակտերի համաձայն, տարածվում է նաև տուժող կողմի վրա, տուժողի՝ արդար դատաքննության իրավունքը պետք է պաշտպանվի ռեալ, ոչ թե՝ թղթի վրա, մինչդեռ՝ վիճարկվող դատական ակտը հակասում է նշված սկզբունքներին;

Նրա խոսքով՝ սույն գործով տուժողները հայտնվել են մի իրավիճակում, երբ ճիշտ իրավաբանական որակում ստացած նորմը ՍԴ որոշմամբ չի համապատասխանում Սահմանադրությանը, իսկ նույն արարքի այլ որակման հնարավորությունից տուժողները չեն կարող օգտվել, քանի որ համապատասխան կառուցակարգեր գոյություն չունեն։ Այլ խոսքով՝ մեղադրող դատախազը պահանջում է դիմել ՍԴ՝ Ռոբերտ Քոչարյանի և մյուսների գործով ՀՀ ՔՕ 300.1-րդ հոդվածով որակված արարքը վերաորակելու հնարավորություն ստանալու համար՝ պնդելով, որ հակառակ դեպքում խախտվում է տուժող կողմի՝ արդար դատաքննության իրավունքը։

Բաղդասարյանը միջնորդեց դատարանին՝ ՍԴ դիմել ոչ միայն Քրեական դատավարության օրենսգրքի համապատասխան հոդվածների սահմանադրականության հարցով, այլև՝ ՀՀ քրեական օրենսգրքի 309․1-րդ հոդվածի՝ Սահմանադրությանը համապատասխանության հարցը որոշելու համար։ Բաղդասարյանի խոսքով՝ ՀՀ քրեական օրենսգրքի 309.1-րդ հոդվածի սահմանադրականության համապատասխանության հարցով դատարանը պետք է դիմի ՍԴ, քանի որ այլ իրավասու մարմին չկա, որը կարող է դիմել ՍԴ, հակառակ դեպքում՝ նշված հոդվածը կմնա «անտեր»։

Մեղադրող դատախազ Գևորգ Բաղդասարյանը գտնում է, որ Ռոբերտ Քոչարյանի և մյուսների գործով մեղադրանքը պետք է վերաորակվի ՀՀ քրեական օրենսգրքի 309-րդ հոդվածի հատկանիշներով։

Ինչպես արդեն տեղեկացրել ենք՝ մարտի 26-ին ՍԴ-ն ՀՀ քրեական օրենսգրքի 300.1-րդ հոդվածը ճանաչել է Սահմանադրության 78-րդ և 79-րդ հոդվածներին հակասող և անվավեր՝ բավարարելով ՀՀ երկրորդ նախագահ Ռոբերտ Քոչարյանի և Երևանի ընդհանուր իրավասության դատարանի դատավոր Դավիթ Գրիգորյանի դիմումները։

ՍԴ որոշումից հետո ՀՀ գլխավոր դատախազ Արթուր Դավթյանն այս գործով դիմել է ՍԴ, իսկ ՀՀ երկրորդ նախագահի և մյուսների գործով մեղադրանքը պաշտպանող դատախազները միջնորդություն են ներկայացրել՝ քրեական գործի վարույթը կասեցնելու մասին, իսկ պաշտպանական կողմը միջնորդություն էր ներկայացրել՝ քրեական հետապնդումը ՀՀ քրեական օրենսգրքի 300.1-րդ հոդվածով դադարեցնելու և այդ մասով քրեական գործի վարույթը կարճելու մասին։

Բացի այդ՝ Ռոբերտ Քոչարյանի պաշտպանները նաև միջնորդություն էին ներկայացրել՝ Ռոբերտ Քոչարյանի նկատմամբ ընտրված խափանման միջոց գրավի չափը նվազեցնելու կամ անազատության հետ կապ չունեցող այլ խափանման միջոցով փոխարինելու մասին։

Ապրիլի 6-ին Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, արդարացման հիմքով դադարեցրել է Ռոբերտ Քոչարյանի, Յուրի Խաչատուրովի, Արմեն Գևորգյանի, Սեյրան Օհանյանի նկատմամբ քրեական հետապնդումն ՝ ՀՀ քրեական օրենսգրքի 300.1-րդ հոդվածի հատկանիշներով։ Միևնույն ժամանակ դատարանը մերժել է Ռոբերտ Քոչարյանի պաշտպանների՝ խափանման միջոցի վերաբերյալ միջնորդությունը։

«Փաստինֆո»-ի հաղորդմամբ՝ դատախազ Գևորգ Բաղդասարյանը վերաքննիչ բողոք է ներկայացրել՝ պահանջելով բեկանել առաջին ատյանի դատարանի որոշումը, Ռոբերտ Քոչարյանի և մյուսների նկատմամբ քրեական հետապնդումը դադարեցնելու մասին դատարանի որոշումը բողոքարկել է նաև տուժող կողմը։ Բացի դա՝ պաշտպանության կողմը ևս վերաքննիչ բողոք է ներկայացրել՝ վիճարկելով Ռոբերտ Քոչարյանի խափանման միջոցը փոխելու կամ գրավի չափը նվազեցնելու միջնորդությունը մերժելու մասին որոշման մասով։

Վերաքննիչ բողոքները կքննվեն համատեղ՝ Վերաքննիչ քրեական դատարանի դատավոր Նարինե Հովակիմյանի նախագահությամբ, կազմով՝ դատավորներ Սևակ Համբարձումյանի և Կարեն Մարդանյանի։

Հեղինակ՝ Իզաբել Սահակյան

Աղբյուր` Փաստինֆո