Փաստ ինֆո

Պրոֆեսոր Արմեն Չարչյանը գտնվում է բժշկական վերահսկողության ներքո, վիճակն առնվազն անհանգստացնող է։ Այս մասին «Փաստինֆո»-ի հետ զրույցում ասաց «Իզմիրլյան» ԲԿ տնօրեն, «Հայաստան» դաշինքի պատգամավորի թեկնածու Արմեն Չարչյանի պաշտպանական խմբի անդամ Արամ Վարդևանյանը։

Ինչպես արդեն տեղեկացրել ենք՝ Երևանի ընդհանուր իրավասության դատարանը՝ դատավոր Արմինե Մելիքսեթյանի նախագահությամբ, մասնակի բավարարել է «Իզմիրլյան» ԲԿ տնօրեն, պրոֆեսոր Արմեն Չարչյանի նկատմամբ կալանավորումը որպես խափանման միջոց ընտրելու մասին քննիչի միջնորդությունը՝ նրան մեկ ամսով կալանավորելու որոշում կայացնելով։ Մինչ դատարանը կհրապարակեր խափանման միջոցի վերաբերյալ որոշումը, պրոֆեսոր Չարչյանը շտապ օգնության միջոցով տեղափոխվել է հիվանդանոց։ Պաշտպանության կողմը միջնորդություն է ներկայացրել ՀՀ գլխավոր դատախազ Արթուր Դավթյանին՝ խնդրելով իրացնել հայեցողական լիազորությունը և վերացնել կալանավորումը որպես խափանման միջոց։

Պաշտպան Արամ Վարդևանյանը «Փաստինֆո»-ի հետ զրույցում նշեց, որ վստահ է, որ դատախազությունն ստացել է իրենց  ներկայացրած միջնորդությունը, վստահ է, որ դատախազությունը տեղեկացված է պրոֆեսորի առողջական վիճակի մասին։ Առ այս պահը պաշտպանության կողմը դատախազության կողմից որեւէ պատասխան չի ստացել, թեև Վարդևանյանն ընդգծեց, որ բոլոր հիմքերն ու հնարավորությունները կան՝ անհապաղ նշված հարցը քննության առարկա դարձնելու։

Ի դեպ, պրոֆեսոր Չարչյանի առողջական խնդիրների վերաբերյալ պաշտպանության կողմը բազմիցս է բարձրաձայնել՝ դեռևս մինչև կալանավորման միջնորդության քննությունը, դա դատարանում  ևս քննության առարկա դարձվել է։

«Դատարանում այդ հարցը ոչ միայն քննարկվել է, այլև՝ անհրաժեշտ բժշկական փաստաթղթերն են ներկայացվել, ինչպես նաեւ  պրոֆեսոր Չարչյանի անձը բնութագրող ողջ տվյալները, բոլոր հանգամանքները»,- նշեց Վարդևանյանը։

Փաստաբանը հիշեցրեց նաև հայտնի ձայնագրության չմոնտաժված, ամբողջական տարբերակը, որտեղ պրոֆեսորն ուղիղ ասում է, որ բացառվում է որևէ ճնշում, ռեպրեսիա ցանկացած աշխատողի նկատմամբ, նույնիսկ եթե վերջինս մասնակցում է կամ չի մասնակցում ընտրություններին, ընտրում է ընդհուպ «Քաղաքացիական պայմանագիր» կուսակցությանը, այնուհետև, խոսակցությունն ավարտվում է հումորով և ծափողջույններով։

«Պատկերացրեք՝ այդ միջավայրի վերաբերյալ քննիչը և դատախազը գտնում էին, որ առկա է հանցակազմ, այն էլ՝ «սպառնալիք», «հարկադրանք», այսաստիճան եզրույթներ օգտագործելով։ Այս պայմանները ևս դատարանն ուսումնասիրել էր և բոլոր հնարավորություններն ուներ առնվազն կալանավորումը որպես խափանման միջոց բացառելու համար։ Դա կլիներ առնվազն կիսաիրավաչափ գործողություն, որովհետև հիմնավոր կասկածի մասին տվյալ դեպքում խոսք անգամ լինել չի կարող։ Բոլոր դեպքերում՝ Արմինե Մելիքսեթյանն իրեն բնորոշ վարքագծի մեջ գտնվեց։ Նորություն չեմ ասի, որ բոլորն, ում հետ ես խոսակցություն ունեցել եմ, անխտիր ասել են, որ Արմինե Մելիքսեթյանի դեպքում արդարադատություն ակնկալելը միամտություն է»,- նշեց Արամ Վարդևանյանը։

Հիշեցնենք, որ տելեգրամյան մի ալիքում հրապարակվել է ձայնագրություն, համաձայն որի՝ «Իզմիրլյան» բժշկական կենտրոնի տնօրեն Արմեն Չարչյանը հունիսի 18-ի առավոտյան աշխատակիցների հետ հանդիպմանը հորդորել է, որ աշխատակիցները պարտադիր կարգով մասնակցեն ընտրություններին։ Չարչյանը նշել է, որ եթե որևէ մեկը չմասնակցի ընտրություններին, ապա կիմանա այդ մասին։

Ձայնագրության հրապարակումից հետո հաշված ժամերի ընթացքում ՀՀ ՀՔԾ-ում հարուցվել է քրեական գործ՝ ՀՀ քրեական օրենսգրքի 154.2-րդ հոդվածի 4-րդ մասի 2-դ կետի հատկանիշներով, որի շրջանակներում նախ բերման են ենթարկել Չարչյանին և տեղափոխել ՀՔԾ, ապա ձերբակալելու որոշում կայացրել։ Պաշտպանները բողոք են ներկայացրել Չարչյանին ձերբակալելու մասին որոշման դեմ, ինչը բավարարվել է քվեարկության օրը և նա դատարանի որոշմամբ ազատ է արձակվել։

Հունրսի 21֊ին դատախազությունը հաղորդագրություն տարածեց՝ նշելով, որ ԿԸՀ-ն բավարարել է Արմեն Չարչյանի նկատմամբ հետապնդում իրականացնելու և նրան ազատությունից զրկելու համաձայնություն տալու վերաբերյալ միջնորդությունները։ ԿԸՀ համաձայնությունը ստանալուց հետո ՀՔԾ֊ն մեղադրանք է առաջադրել Արմեն Չարչյանին՝ ՀՀ քրեական օրենսգրքի 154.2-րդ հոդվածի 4-րդ մասի 2-դ կետի հատկանիշներով և նրա նկատմամբ կալանավորումը որպես խափանման միջոց ընտրելու մասին միջնորդություն ներկայացրել դատարան։

Հեղինակ՝ Իզաբել Սահակյան

Աղբյուր` Փաստինֆո