Փաստ ինֆո

Երկուշաբթի օրը Ստեփանակերտի Վերածննդի հրապարակում տեղի է ունեցել ինքնաբուխ մեծ հանրահավաք, 1988 թվականից հետ առաջին անգամ էր նման մեծ հանրահավաք տեղի ունենում։ Այս մասին «Փաստինֆո»-ի հետ զրույցում ասաց «Արդարություն» կուսակցության պատգամավոր Մետաքսե Հակոբյանը:

Նշենք, որ հունիսի 21-ից Ստեփանակերտում սկսվել են բողոքի ակցիաներ՝ Արայիկ Հարությունյանի հրաժարականի պահանջով, սակայն հունիսի 22-ին Հարությունյանը ակնարկեց, որ հրաժարական տալ չի պատրաստվում, որպեսզի իր հրաժարականը պահանջող քաղաքական ուժերը չմնան պետականության փլատակների տակ:

Պատգամավորը նկատեց, որ մարդիկ դուրս էին եկել իշխանությունների դեմ, կազմակերպիչները ժողովրդի միջից էին, նրանք ելույթներ չունեին նախատեսված, պարզապես դուրս էին եկել՝ պահանջելու Արայիկ Հարությունյանի հրաժարականը:

«Դրանից հետո Արայիկ Հարությունյանը վերադարձավ Արցախ և հայտարարեց, որ ժամը 6-ին իր համակիրներին հրավիրում է Վերածննդի հրապարակ՝ շատ լավ իմանալով, որ ժամը 7-ին այնտեղ այլ հանրահավաք է նախատեսված: Երեք ընդդիմադիր քաղաքական խմբակցություններով հանդիպեցինք Հարությունյանի հետ՝ նրան հորդորելով հանրահավաք չանցկացնել, որպեսզի դա չբերի բախումներին: Արայիկ Հարությունյանը չընդունեց մեր առաջարկը և ասաց, որ հավաքը կարճ է լինելու և ժամը 7-ին նա իր համակիրների հետ այլևս չի լինելու հրապարակում», - պատմեց պատգամավորը՝ ավելացնելով, որ Արցախի նախագահը գործադրել էր ողջ վարչական ռեսուրսը՝ իր հանրահավաքին հնարավորինս շատ մարդու ներկայությունն ապահովելու համար, սակայն ներկայացած համակիրներն այդքան էլ շատ չէին:

Ըստ պատգամավորի՝հանդիպման ժամանակ Ա.Հարությունյանից պարզաբանում են պահանջել, թե Արցախի նախագահը ինչ գործ ուներ ՔՊ-ի գրասենյակում՝ հաշվի առնելով, որ նա այդ քայլով նախագահից վերածվել է ՔՊ-ական ակտիվիստի՝ վերջինս հավաստիացրել է, թե հանդիպել է ոչ միայն ՔՊ ներկայացուցիչների, այլ ՀՀ 6 քաղաքական ուժերի հետ:

«Երբ ես հանդիպել եմ Հարությունյանի հետ, նա ինձ պատասխանեց, որ եղել է 6 նախընտրական շտաբերում, իսկ հաջորդ հանդիպումը, ըստ նրա, պետք է անցկացներ Ռոբերտ Քոչարյանի և Սերժ Սարգսյանի հետ, սակայն, ես նրա այս խոսքերին չեմ հավատում: Նաև հարց է առաջանում, թե ինչու լրագրողները չեն տեսել Հարությունյանին՝ այլ նախընտրական շտաբերում», - ասաց Արցախի ԱԺ պատգամավորը՝ նշելով, որ ՔՊ-ին օգնելու համար աշխատել է ոչ միայն Հարությունյանը, այլ նաև Սամվել Բաբայանը և Կամո Աղաջանյանը: «Մենք դեռ տեսնելու ենք մի շարք բացահայտումներ»,- ընդգծել է Մ.Հակոբյանը:

«Երեկ հավաքի ողջ տրամաբանությունը կորավ: Արայիկ Հարությունյանը ասաց, որ իր խոսքից հետո շատ արագ մեր ժողովրդի ցասումը կմարի եւ նրա հեռանալուց հետո բարձրախոսը զավթեցին «Վաղվա Արցախ» կուսակցության ղեկավար Տիգրան Պետրոսյանը և «Հեղափոխական» կուսակցության ղեկավար Արթուր Օսիպյանը: Այս մարդիկ ունեն արևմտամետ հայացքներ, և աշխատում էին սորոսական թեկնածու Մասիս Մայիլյանի համար: Նրանք ասացին, որ ոչ մի քաղաքական ուժ չպետք է օգտվի այս իրավիճակից։ Աբսուրդ է , երբ դա ասում է քաղաքական ուժի ղեկավարը: Եվ տեղի ունեցավ այն, ինչ ասաց Արայիկ Հարությունյանը, քանի որ շատերը արագ լքեցին Վերածննդի հրապարակը », - ասաց Հակոբյանը:

Պատգամավորը ասաց, որ հանրահավաքի կազմակերպիչներից մեկը՝ բժիշկ Մարատ Հարությունյանը իր ֆեյսբուքյան էջում գրել է, որ ոչ մի կապ չունի Օսիպյանի արածի հետ, և եթե այսօր հանրահավաք լինի, ապա իրենք չեն մասնակցելու այդ հանրահավաքին և հորդորում են ժողովրդին նույնպես չմասնակցել:

«Սակայն, հանրահավաքները չեն դադարելու և ժողովրդի պահանջը չի մարելու: Երբ Հարությունյանը հրաժարական տա, այնպես չէ որ Արցախը վերանալու է, կան մի շարք լուծումներ: Պետք է ստեղծվի ճգնաժամից մեզ դուրս բերող խումբ, ժողովրդի ակտիվ ներկայացուցիչների ներգրավմամբ և պետք է լինեն քաղաքական այնպիսի ուժեր, որոնք գործել են հանուն Արցախի: Նաև պահանջ է լինելու կազմակերպել արտահերթ խորհրդարանական ընտրություններ: Այդ ընտրությունները շատ հեշտ է անցկացնել, բոլորը, ովքեր ասում են հակառակը, պարզապես իրականացնում են Ադրբեջանի պատվերը, քանի որ Ադրբեջանն ասում է նույն բանը: Իսկ Արայիկ Հարությունյանը պատրաստվում է անցկացնել հանրաքվե՝ ապացուցելու իր լեգիտիմությունը:

Որևէ օրենքում չկա այսպիսի հարց ամրագրված, դա նշանակում է սուբյեկտայնության վրա խաչ քաշելը, դա նշանակում է բոլոր պետական ինստիտուտների վերացումը, քանի որ նախագահը իր լեգիտիմությունը ապացուցելու համար հանրաքվե է պատրաստվում անցկացնել: Մենք նման բան թույլ չենք տա, քանի որ այս քայլով նրանք կկատարեն Ադրբեջանի մեծագույն ցանկությունը»,- եզրափակեց Հակոբյանը:

Հեղինակ՝ Անի Մշեցյան

Աղբյուր` Փաստինֆո