Փաստ ինֆո

Աջափնյակ վարչական շրջանում դեկտեմբերից մինչ օրս իրավախախտման վերաբերյալ կազմվել է վարչական 60 արձանագրություն, որից 45-ը՝ համայնքային հողամասի վրա, իսկ 15-ը՝ սեփական հանդիսացող հողամասի վրա։ Երևանի ավագանու նիստի ժամանակ այս մասին ասաց Երևանի քաղաքապետ Հայկ Մարությանը՝ անդրադառնալով ապօրիների կրպակների, շինությունների հարցին։

Նրա խոսքով քանդում և ապամոնտաժում է իրականացվել թվով 34 հասցեում. «Այնտեղ գործում են հանցավոր խմբեր, ուղղակի ինչ-որ մարդիկ չեն։ Նամակներ են ուղարկվել և՛ ՀՀ գլխավոր դատախազին, և՛ ԱԱԾ տնօրենին, և՛ ոստիկանապետին, որտեղ կետ առ կետ նկարագրվում են սխեմաները։ Այդ սխեմաների մեջ ներգրավված են բազմաթիվ մարդիկ՝ տարբեր պետական մարմիններից, դատական համակարգից, թաղային հեղինակություններ։ Մի մեծ բանդա է գործում և մենք մեր լիազորությունների սահմանում ամեն ինչ անում ենք։ մեր աշխատակիցների կյանքին նաև վտանգ է սպառնում։ 40-50 հոգի ոչ սթափ վիճակում, զինված հարձակվել են մեր աշխատակիցների և ոստիկանների վրա։ Սա արդեն աբսուրդի է հասնում»,-նշեց Հայկ Մարությանը՝ ընդգծելով, որ այս ամեն ինչն այսպես չի շարունակվելու և իրենք հստակ գծել են իրենց անելիքը։

Հայկ Մարությանն ասաց, որ քիչ է մնացել մինչ այն պահը, որ շատ կտրուկ գործողություններ անեն և իրավական մասով պինդ լինեն. «Աբսուրդն այն է, որ մերոնք գնում են մի բան քանդելու, այդ կրպակի տերը զանգում է ոստիկանություն, ոստիկանները գալիս են ու սկսում են պաշտպանել այդ մարդկանց»,-նշեց քաղաքապետը։

Աղբյուր` Փաստինֆո