Փաստ ինֆո

ԱՀ նախագահ Արայիկ Հարությունն այսօր Ստեփանակերտի Վերածննդի հրապարակում հանդես է եկել ուղերձով՝ հայտարարելով, թե կառչած չէ աթոռից, բայց նաեւ հասկացրել, որ հրաժարական տալ չի պատրաստվում։

«Հիմարություն է կարծել, թե ես որեւէ անձնական շահագրգռվածություն ունեմ շարունակել պաշտոնավարումս, թե կառչած եմ աթոռից: Ամենեւին ոչ: Ես պարզապես ինձ պատասխանատու եմ զգում մեր ժողովրդի ու հաջորդ սերունդների առջեւ: Այնքան պատասխանատու, որ հանկարծ իմ հուզական ու անհեռատես փախուստով չկործանեմ մեր պետականությունը, որ հանկարծ իմ ժողովուրդը, ներառյալ հրաժարականս պահանջող անձինք չմնան պետականության փլատակների տակ»,- ասել է նա ու ընդգծել, թե ինքը փախչող տեսակ չէ ու մեր նահատակների ու պայծառ գալիք սերունդների առջեւ պատրաստված ալեկոծված ծովում մնալ ու նավը չթողել առանց նավապետի»:

Նշենք, որ երեկվանից Արցախում հանրահավաքներ են տեղի ունենում Հարությունյանի հրաժարականի պահանջով: Ստեփանակերտում բողոքի ալիքներ անցած ամիսներին միշտ էլ եղել են, բայց այն ավելի սրվեց Արայիկ Հարությունյանին ՔՊ-ի շտաբում տեսնելով։ Արցախցիները հայտարարում են, որ չեն ցանկանում Հայաստանի ազգակործան իշխանությունները մասնակցություն ունենան Արցախի կյանքում։

Արցախի նախագահը ասել է, թե պատրաստ է երկխոսության գնալ այն մարդկանց հետ, որոնք պահանջում են իր հրաժարականը: «Դա մեր քույրերն ու եղբայրներն են: Ես պատրաստ եմ խոսել բոլորի հետ: Այս օրերի ակտիվ շահարկում են Արցախի և Հայաստանի իշխանությունների փոխհարաբերությունները: Կուզեի նկատել, որ մեր իշխանությունները պարտավոր են իրար հետ լավ հարաբերություներ պահպանել, ով էլ լինի իշխանության: ՀՀ-ն առանցքային դեր ունի հետպատերազմյան Արցախի սոցիալ և տնտեսական զարգացման գործում:

Արայիկ Հարությունյանն անդրադարձել է նաեւ այն քննադատություններին, որ նախագահականի շենքի վրա անհասկանալի պատճառներով չեն կրակել. «Փախուստի մասին, դավաճանության մասին, Ղարաբաղում մնալ-չմնալու մասին, այս շենքի հրետակոծության ու չհրետակոծության մասին: 44 օրվա մեջ 38 հատ այց ունեմ առաջնագծի ամենածանր կետերը: Ովքեր եղել են առաջնագծում, շատերը գիտեն դրա մասին: Քարվաճառից, Եղնիկներից մինչեւ Ջաբրայիլ, առաջնագծի բոլոր ուղղություններում ամեն տեղ եղել եմ: Եվ մարդ, որը մտածում է իր կյանքի մասին, երբ հրետանակոծվում էր, ԱԹՍ-ներից, ամեն ինչ շարժվող, չշարժվող, երեւացող-չերեւացող հարվածի տակ էր, 44 օրից 38 օրը եղել եմ առաջնագծում: Ասում են՝ շենքին չեն կրակել: Շենքում եղե՞լ եմ, որ կրակեն»:

Վերջում նա առողջություն է մաղթել իր հրաժարականի պահանջով հացադուլ հայտարարածներին ու առաջարկել, որ իր հանրահավաքի համար բերված տեխնիկան՝ բարձրախոսները, մնան Վերածննդի հրապարակում, որպեսզի այն կարողանան օգտագործել իր հրաժարականը պահանջող արցախցիներն իրենց ակցիայի ժամանակ։

Աղբյուր` Փաստինֆո