Փաստ ինֆո

«Գործընթացներն ընթանում են, երբ որ կլինի վերջնական որոշում, անպայման տեղյակ կպահենք, այս պահին վերջնական որոշում չկա»,- լրագրողների հետ զրույցում, անդրադառնալով ռուս սահմանապահների տեղակայմանը, ասաց Զինված ուժերի Գլխավոր շտաբի պետ Արտակ Դավթյանը:

Ավելի վաղ Գեղարքունիքի մարզպետը հայտնել էր, թե որոշում է ընդունվել, որ սահմանին պետք է տեղակայվեն ռուս սահմանապահներ, իսկ հայկական և հակառակորդի զորքերը պետք է հետ քաշվեն։

«Վերջնական որոշումը միայն մեր կողմից ցանկությունը չէ, դրան մասնակցում են նաև այլ կողմեր, դրա համար բանակցություններն ընթանում են։ Լինելու է այդպես, ինչպես նշեցիք, բայց վերջնական երբ որ կլինի՝ տեխնիկական հարցերով լրացուցիչ կասենք», - ասաց Արտակ Դավթյանը։

Հարցին, թե ադրբեջանական կողմից համաձայնություն կա՞, ԳՇ պետը պատասխանեց, թե մենք մեր տարածքում Ադրբեջանին հարցնելու ոչինչ չունենք։

«Բանակցություններն ընթանում են ռուսական կողմի հետ, որովհետև կան հարցեր, մեր նպատակն է առանց բախումների՝ մեր տարածքում հայտնված ադրբեջանական ստորաբաժանումների հետ քաշումն է և ամբողջությամբ մեր տարածքում պետք է իրականացվեն միջոցառումներ», - ասաց Դավթյանը։

Ճշտող հարցին՝ միայն ռուսական սահմանապահների՞, թե այլ երկրների սահմանապահների տարբերակները կարող է դիտարկվել, Դավթյանը նշեց, որ միայն ռուս սահմանապահների մասին է խոսքը. «Այլ երկրների հարցը դեռևս չի քննարկվել»։

Պատերազմից հետո հայ-ադրբեջանական սահմանը 420 կմ-ով երկարել է. Արդյոք որևէ աշխատանք տարվում է սահմանները կահավորելու հարցում, ԳՇ պետը հայտնեց, որ աշխատանքները տարվել և տարվում են։

«Մեր նախկին շփման գիծը 25-30 տարի կահավորում էինք։ 6-7 ամսում հասցնենք այն մակարդակի, որը եղել է նախկինում ՝ 30 տարվա մեջ, դա ֆիզիկապես իրատեսական չէ։ Մեծ ծավալի աշխատանքներ տարվել են և ներկայումս նույնպես տարվում են»։

Աղբյուր` Փաստինֆո