Փաստ ինֆո

Այսօր լրանում է նացիստական Գերմանիայի` Խորհրդային Միության վրա հարձակման և Հայրենական մեծ պատերազմի սկիզբի 80 տարին: Այս մասին լրագրողներին տված հարցազրույցում ասաց Հայաստանում Ռուսաստանի դեսպան Սերգեյ Կոպիրկինը:

Դեսպանը նշեց, որ այս պատերազմում մեր ժողովուրդներն ունեցել են 28 միլիոն զոհ: Պետք է հարգել այն մարդկանց հիշատակը, որոնք զոհվել են, որպեսզի մենք խաղաղ և արժանապատիվ ապրենք, ՍՍՀՄ ժողովուրդների մեծագույն սխրանքի հիշատակը, անօրինակ քաջության, հերոսության, միասնության, չարիքի դեմ պայքարի հիշատակը:

«Այս հիշողությունը վառ պահելը մեզ ուժ է տալիս դիմակայելու մարտահրավերները, որոնց բախվում ենք այսօր: Նրանք, ովքեր չեն ցանկանում հիշել իրենց պատմությունը, դատապարտված են կրկնել նույն սխալները: Սա շատ կարևոր է, քանի որ այժմ մենք տեսնում ենք մոռացության տալու կամ մեր պատմությունը խեղաթյուրելու փորձեր: Նվազեցնել դերը, որը սովետական ժողովուրդը խաղաց այս պատերազմում ֆաշիզմի դեմ տարած հաղթանակում: Մեզ համար պատվի խնդիր է պաշտպանել մեր նախնիների հիշատակը, ովքեր տվել են այն ամենը, ինչ ունեցել են ոչ միայն ԽՍՀՄ-ի, այլ ամբողջ մարդկության հաղթանակի հասնելու համար: Խաղաղությունը բացարձակ արժեք է, և մենք պետք է ամեն ինչ անենք, որպեսզի խաղաղությունն ու ներդաշնակությունը տիրեն ամբողջ աշխարհում»,-ասաց Կոպիրկինը:

Ըստ նրա, այսօր եվրոպական որոշ երկրներում, ինչպես նաև ԽՍՀՄ-ի կազմում եղած մի շարք երկրներում փորձեր են արվում ոչ միայն մոռացության մատնել մեր ժողովուրդների սխրանքը, այլև սպիտակեցնել նրանց, ովքեր օգնում են ֆաշիստներին:

«Այժմ մենք չենք կարող պնդել, որ վտանգ չկա: Այն գոյություն ունի, և դա ստիպում է մեզ ավելի զգոն լինել և ավելի շատ ուշադրություն դարձնել այս պատերազմի հիշատակին»,- ասաց Կոպիրկինը:

Դեսպանը նաև հայտարարեց, որ հայ ժողովրդի ներդրումը Խորհրդային Միության հաղթանակում հսկայական է: «Շատ կարևոր է, որ Հայաստանում և Ռուսաստանում պատերազմի հիշողությունը սուրբ է, սա վկայում է այն մասին, որ մենք շատ ընդհանրություններ ունենք, ընդհանուր հոգևոր արժեքներ ունենք», - եզրափակեց Կոպիրկինը:

Աղբյուր` Փաստինֆո