Փաստ ինֆո

«Ես այս իրավիճակում լավ ապագա չեմ տեսնում մեր երկրի, մեր սահմանների համար։ Մեծ մտավախություն ունեմ»,- «Փաստինֆո»-ի հետ զրույցում ասաց Գեղամասար համայնքի ղեկավար Հակոբ Ավետյանը՝ նշելով, որ չի ընդունում արտահերթ խորհրդարանական ընտրությունների արդյունքները։ 

Գեղարքունիքի մարզում Նիկոլ Փաշինյանը հավաքել է 63 տոկոս ձայն։ Գեղամասար համայնքի ղեկավարը հույս ուներ, որ սահմանային խնդիրների առջև կանգնած բնակիչները առաջինը կմերժեին իրենց նման խնդիրների առաջ կանգնեցրած իշխանությանը։

«Գեղարքունիքի մարզը՝ մանավանդ Վարդենիսի շրջանը, հայտնվել է սահմանային խնդիրների մեջ, թուրքերը ամիջապես մեր տարածքում են նստած։ Հիմա մտածում եմ, որ դա ոչ թե մարդկանց չի մտահոգում, այլ հակառակը՝ շատ շատերի համար ողջունելի է այս վիճակը, որ ունենք... ես տենց եմ համարում արդեն։ Ուրիշ պատկեր չեմ տեսնում»։

Ավետյանը, կառավարության հետ ունենալով լավ հարաբերություններ, ընդդիմացավ նույն կառավարությանը՝ մտահոգվելով սահմանում ստեղծված իրավիճակով։ Նա համայնքի անվտանգությունն այսօր համարում է առաջնային խնդիր։

«Ես իմ բոլոր անձնական հարցերը դրեցի մի կողմ ու հայրենիքի հանդեպ ունեցած սերը ինձ համար առաջնահերթ համարեցի, բայց մեր շրջանում մենք ունեցանք լրիվ հակառակ պատկերը։ Վարդենիսի տարածքում ակնկալում էի ուրիշ բան՝ ստացանք լրիվ հակառակ պատկերը։

Չեմ ուզում բաժանում անել, բայց իմ համար անհասկանալի էր, թե ոնց կարող են մարդիկ այս իրավիճակը հանդուրժել։ Դրա համար եմ ասում՝ երևի շատերի մոտ ավելի շատ ողջունելի է, որ այս վիճակին ենք»։

Ընտրությունների ընթացքի ու խախտումների մասին ահազանգեր ու թերացումներ եղել են, բայց այս պահին չի կարող ասել՝ դրանք կարո՞ղ էին ճակատագրական լինել, թե ոչ։ Դիտարկմանը, որ քարոզարշավի ընթացքում Փաշինյաննը սպառնացել էր ընտրություններից հետո անդրադառնալ համայնքապետերին, ազատել պաշտոններից՝ Ավետյանը նշեց, որ պաշտոնն առաջնային չէ.

«Իմ համար պաշտոնը բացառապես զրո արժեք ունի, դա որպես պատասխանատվություն եմ համարում։ Իմ պաշտոնում՝ 18 գյուղի համար, ես ինձ համարում եմ մեծ պատասխանատվություն կրող անձ։ Այդքան բան։ Վենդետա ու տարբեր արտահայտություններին բացարձակ ուշադրություն չեմ դարձնում այդ խոսքերին, ես մտավախություն չունեմ իմ պաշտոնից, ոչ էլ կատարվող հետևանքներից։ Համարում եմ, որ ճիշտ քայլ եմ արել, հայրենասիրական քայլ եմ արել։ Ես ինձ արժանապատիվ եմ զգում»։

Ավետյանը փաստում է՝ կառավարությունը դիվանագիտական թույլ ունակություններ ունի՝ դրա արդյունքում էլ մեր երկիրն այս վիճակին է։ Ավետյանի սրտով չէ, որ այսօր նույն կերպ շարունակվի ղեկավարվել երկիրը։

«Ես նորից մնում եմ իմ կարծիքին, որ մեր երկիրը այս վիճակից կարող է հանել Ռոբերտ Քոչարյանը՝ իր թիմով։ Էս կառավարության հետ ես բացարձակ հույս չեմ կապում, որ կարող է այս վիճակը շտկեն։ Ավելի է խորանալու, 99 տոկոսով վստահ եմ, որ գնալով ավելի ծանրանալու է երկրի վիճակը»։

Համայնքի ղեկավարը նշեց նաև, որ համախմբվածությունը կարող էր ավելի լավ արդյունքներ տալ։

Արդյոք Ավետյանը զրուցել է համայնքի բնակիչների հետ՝ իրենց մտավախությունների մասին, Գեղամասարի համայնքապետը նշեց, որ իրենց քայլերի համար հիմնավորում չունեցող անձինք չեն կարող մտավախություն ունենալ.

«Շատ մարդիկ նույնիսկ եթե մի բան անում են՝ դրա հիմնավորումն էլ չունեն, եթե հիմնավորում չունեն՝ չեմ կարծում, որ մարդը կարող է մտավախություն ունենալ։ Երևի կմտածեն՝ լավ է լինելու, թող աստված տա լավ լինի։ Ոչ մեկ իմ համար երկնքից չի իջել, ես ամենաշատը պաշտում եմ իմ ընտանիքը, համայնքը ազգը։ Շատ մարդ կա, որ չգիտեմ ոնց են մտածում՝ իրենց գործն է»։

Աղբյուր` Փաստինֆո