Փաստ ինֆո

Անկիրթ մարդկանց, ժողովրդի հաղթանակն էր՝ ազգի նկատմամբ,- «Փաստինֆո»-ի հետ զրույցում ասաց միջազգային անվտանգության հարցերի փորձագետ Արմեն Մանվելյանը՝ անդրադառնալով 2021թ հունիսի 20-ին կայացած արտահերթ խորհրդարանական ընտրությունների արդյունքներին։

Ինչպես արդեն տեղեկացրել ենք՝ երեկ կայացած քվեարկության նախնական արդյունքների համաձայն խորհրդարան կանցնի երեք ուժ, ընդ որում՝ իշխանություն կձևավորի Նիկոլ Փաշինյանի գլխավորած կուսակցությունը։ Մանդատները կբաշխվեն հետեւյալ կերպ՝ «Քաղաքացիական պայմանագիր» - 71 մանդատ, «Հայաստան» դաշինք 27 մանդատ, «Պատիվ ունեմ» դաշինք– 7 մանդատ:

Արմեն Մանվելյանը «Փաստինֆո»-ի հետ զրույցում նշեց, որ նոր գործընթացի սկիզբ է դրվել՝ Հայաստանի պետականության ավարտը, բոլորը շատ լավ հասկանում են, որ հաջորդ քայլը լինելու է Ադրբեջանի և Թուրքիայի հետ խայտառակ կապիտուլյացիոն պայմանագրերի ստորագրումը, կդրվի, այսպես կոչված, Զանգեզուրի միջանցքի հարցը և մի շարք այլ հարցեր։

«Մարդն իր՝ Հայաստանը հանձնելու ծրագիրն ուղղակի լեգիտիմացրեց և հիմա 100 տոկոսով օգտվելու է դրանից»,- նշեց Մանվելյանը։

ԻՆչ վերաբերում է մարզերում, հատկապես, Սյունիքի մարզում «Քաղաքացիական պայմանագիր» կուսակցության օգտին կատարված քվեարկության բարձր ցուցանիշներին, Մանվելյանը նշեց, որ դա առանձին հետաքննության առարկա է։ Ըստ Մանվելյանի՝ այդ երևույթը սոցիոլոգների և հոգեբանների տիրույթում է, թե ինչու սահմանամերձ գյուղերը ձայներ են տալիս Նիկոլ Փաշինյանին։ Դա երևույթ է, որը խոսում է ժողովրդի դեգրադացման մասին։ Փորձագետը համեմատության համար մատնանշեց դեռևս 300 տարի առաջ Մխիթար Սպարապետի գլխատման դեպքը՝ նշելով, որ ինքնապաշտպանական բնազդը ոչնչացվում է, իսկ թե դա ինչով կավարտվի, ապա դրա մասին խոսելու համար փորձագետ լինել պետք չէ, իրավիճակը շատ տխուր է։

Հարցին՝ արդյոք ընտրությունների նման արդյունքները չի վկայում այն մասին, որ միջազգային խաղացողներին, այդ թվում՝ Ռուսաստանին եւս ձեռնտու է Նիկոլ Փաշինյանի իշխանությունը, Մանվելյանը պատասխանեց, որ շատ հնարավոր է, Թուրքիայի, արևմուտքին, Ռուսաստանին՝ բոլորին էլ ձեռնտու է, որովհետև վերջինս բոլորի ասածն էլ անում է։ Փորձագետը չի կարծում, որ Ռուսաստանը ռեսուրս ուներ՝ ընտրական գործընթացներին միջամտելու, ի տարբերություն՝ արևմտյան, աղանդավորական կառույցների, որոնք հարյուր հազարավոր ձայների են տիրապետում։ Բացի այդ՝ փաստը մնում է փաստ, որ շրջաններում, մարզերում մարդկանց մի մասը, որը թքած ունի ամեն ինչի վրա՝ թե իր ապագայի, թե՛ իր երեխաների ապագայի, որն ինչ-որ աղանդավորական ազդեցության ներքո է գտնվում։ Փորձագետի խոսքով՝ Նիկոլի անունով կարող է ինչ-որ տոտալիտար աղանդ փոխվի, որը կարողանում է կառավարել մարդկանց։

«Միջազգային խաղացողներն ընդամենն օգտվում են այդ ամենից։ Այսօր հանրությունն ավելի պառակտված է, քան՝ նոյեմբերի 9-ին»,- նշեց Մանվելյանը՝ հավելելով. «Ռուսներին պետք էր զորք մտցնել Արցախ՝ զորք մտցրեց։ Թուրքիային և Ադրբեջանին պետք է միջանցք բացել Սյունիքում, իրենք դա էլ են անելու»։ Միջազգային խաղացողները կարողանում են այս իրավիճակը գնահատել և օգտվել, բայց, նրա կարծիքով, իրենք չէ, որ ազդում են այս գործընթացի վրա։

Փորձագետի դիտարկմամբ՝ մեր ամենամեծ խնդիրն այն է, որ պետականամետ քաղաքացու տեսակը ՀՀ-ում չի ձևավորվել և այս ընտրությունները ցույց տվեցին, որ այդ տեսակի մարդիկ կազմում են մոտ 25 տոկոս, իսկ 50 տոկոսից ավելին անգամ չի մասնակցել ընտրություններին։ Ընտրություններին չմասնակցող քաղաքացիների մի մասը ՀՀ-ում չէ, ինչից օգտվել է գործող ռեժիմը։

«Բայց անկախ կեղծարարության չափից՝ պարզ է, որ մի ահռելի զանգված ձայն է տվել մի մարդու, որը համակարգված կերպով տանում է պետությունը ոչնչացման»,- նշեց Մանվելյանը՝ հավելելով, որ դա է մտահոգիչը։

Աղբյուր` Փաստինֆո