Փաստ ինֆո

ԿԸՀ-ի տեղեկատվական կենտրոնում Ոստիկանության պետի տեղակալ Արա Ֆիդանյանը ներկայացրեց  քվեարկության օրվա ընթացքում արձանագրված  խախտումների վերաբերյալ  ամփոփիչ տվյալներ։ 

Նա հայտնեց, որ ՀՀ ոստիկանության պետի հրամանով ՀՀ ոստիկանությունում ստեղծվել է օպերատիվ շտաբ ԱԺ արտահերթ ընտրությունների օրվա ընթացքում կարգ ու կանոն հաստատելու , ընտրությունների բնականոն ընթացքն ապահովելու, ինչպես նաև ընտրական իրավունքի իրականացմանը խոչընդոտելու դեպքերը  հայտնաբերելու համար։ «Ոստիկանությունը ձեռնամուխ է եղել , որպեսզի պատշաճ կարգով ընթանա ընտրական ողջ գործընթացը»,-հայտնեց Ֆիդանյանը։

Նա վստահեցրեց, որ օպերատիվ շտաբի կողմից այսօր առավոտյան ժամը 8-ից մինչ այս պահը վերլուծվել, քննարկվել և սահմանված կարգով ընթացք են տրվել քվեարկության ընթացքում տեղի ունեցած իրավախախտումների վերաբերյալ քաղաքացիներից, ոստիկաններից, հանձնաժողովի անդամներից, կուսակցություններից, դաշինքներից, վստահված անձանցից, դիտորդներից, ԶԼՄ-ներից ստացված տեղեկությունները։

«Արձանագրված 141 դեպքերից որպես հանցագործության մասին հաղորդում ՀՀ քրեական դատավարության օրենսգրքի 180-րդ և 181-րդ հոդվածների կարգով ընթացք է տրվել 47 դեպքի, իսկ 94-ը չեն պարունակել առերևույթ հանցագործության հատկանիշներ և ստուգվում են որպես պատաահար։ Վերոնշյալ 47 դեպքերից 3-ը գրանցվել են Երևան քաղաքում, իսկ մնացած  44-ը՝ մարզերում»,-տեղեկացրեց Ոստիկանության պետի տեղակալը։ 

2021թ. հունիսի 20-ին ժամը 08:00-20:30 ընթացքում ՀՀ ոստիկանությունում «Թեժ գիծ» ստացվել է 87 ահազանգ, իսկ ԱՊՀ և միջազգային դիտորդներից ահազանգեր չեն ստացվել:

Ահազանգերը վերաբերվել են` 2-ը՝ ընտրակաշառքին, 3-ը՝ քվեարկությանն ուղղորդելուն, 36-ը՝ ընտրատեղամասերում տեխնիկական բնույթի խնդիրներին, 46-ը՝ տեղեկատվական բնույթի հաղորդումներին:

Աղբյուր` Փաստինֆո