Փաստ ինֆո

Մինչև քվեարկության նախորդ օրը ներառյալ ստացվել է ընդհանուր 338 հաղորդում և ահազանգ, որոնցից 133-ը ԶԼՄ հրապարակումներ են, 91-ը՝ ներկայացված ֆիզիկական անձանց կողմից , 2-ը ՄԻՊ-ի գրասենյակից, 65-ը՝ սոցիալական ցանցերում օգտատերերի կողմից արված գրառումներ, իսկ 57-ը՝ ոստիկանության օպերատիվ տվյալներ են։ Այս մասին ԿԸՀ մամուլի կենտրոնում ասել է դատախազ Էդգար Արսենյանը։ 

«Ստացված հաղորդումներից և ահազանգերից 155-ը վերաբերել են ընտրակաշառքին, 59-ը՝ ընտրական իրավունքի իրականացմանը խոչընդոտելուն, 64-ը՝ քարոզչությանը մասնակցելուն հարկադրելուն կամ խոչընդոտելուն, 42-ն՝ ընտրական քարոզչության և նման բնույթի այլ պաստառների հետ կապված կամ այլ գույքային վնաս հասցնելուն, մնացած 18-ն՝ այլ հանցատեսակներին»,- նշեց Արսենյանը։

Նրա փոխանցմամբ՝ ենթադրյալ ընտրական իրավախախտումների վերաբերյալ 212 հաղորդում, որոնք բնույթով եղել են վերացական և ընդհանուր բնույթի, ուղարկվել են ՀՀ ոստիկանություն՝ անհրաժեշտ ստուգողական գործողություններ կատարելու համար։
«Իրականացված օպերատիվ-հետախուզական միջոցառումների արդյունքում նշված հաղորդումներից 77-ում առկա տեղեկատվությունները չեն հաստատվել և թողնվել են անհետևանք, իսկ 135-ով ստուգողական աշխատանքները շարունակվում են»,- նշեց Արսենյանը։

Նրա փոխանցմամբ՝ ընդհանուր 338 հաղորդումներից 126-ն ուղարկվել են հետաքննության և նախաքննության մարմիններին՝ ՀՀ քրեական դատավարության օրենսգրքի 180-181-րդ հոդվածներով նախատեսված կարգով նյութեր նախապատրաստելու նպատակով, որի արդյունքում 35-ով որոշում է կայացվել քրեական գործի հարուցումը մերժելու մասին, 65-ով նյութերի նախապատրաստման գործընթացը շարունակվում է։ Ինչ վերաբերում է հարուցված քրեական գործերին, Արսենյանը հայտնեց, որ նշված հաղորդումների քննարկման արդյունքում հարուցվել է 26 քրեական գործ, որից 17-ը՝ կաշառք տալու-ստանալու դեպքերի առթիվ, 3-ը՝ նախընտրական քարոզչությանը մասնակցելուն հարկադրելու կամ խոչընդոտելու դեպքերի առթիվ, 1-ը՝ ընտրական իրավունքի իրականացմանը, 5-ը՝ կապված պաստառների վնասման հետ։ Հարուցված քրեական գործերով 14 անձի մեղադրանք է առաջադրվել։

Աղբյուր` Փաստինֆո