Փաստ ինֆո

Ընտրությունների նախընտրական քարոզարշավի ընթացքում տեղի ունեցած իրավախախտումների վերաբերյալ ՝ մինչև քվեարկության օրը ՀՀ ոստիկանությունում արձանագրվել է 246 ահազանգ, որոնցից որպես հանցագործության վերաբերյալ հաղորդում՝ ՀՀ քրեական դատավարության օրենսգրքի 180-181-րդ հոդվածների կարգով ընթացք է տրվել 124 դեպքի, իսկ 120-ը չեն պարունակել առերևույթ հանցագործության հատկանիշներ։ Այս մասին ԿԸՀ մամուլի կենտրոնում ասուլիսի ընթացքում ասել է ոստիկանության շտաբի պետ Արմեն Մկրտչյանը։

Ըստ նրա՝ առերևույթ հանցագործության 124 դեպքերից 30-ը գրանցվել են Երևան քաղաքում, իսկ մնացած 94-ը՝ մարզերում, մասնավորապես՝ Սյունիքի մարզում 20 դեպք, Շիրակում՝ 13 դեպք, Գեղարքունքում՝ 12 դեպք, Արարատում՝ 12 դեպք, Վայոց Ձորում, Արագածոտնում՝ 7-ական, Լոռու մարզում՝ 11, Կոտայքում՝ 6, իսկ Տավուշում և Արմավիրում երեքական դեպք։

Հաղորդումներից 35-ը վերաբերում է ընտրակաշառքին 15-ը՝ ընտրողի ազատ կամքի իրականացմանը խաչընդոտելուն, 16-ը՝ նախընտրական քարոզչությանը մասնակցելուն կամ հարկադրելուն, 2-ը՝ լրագրողի մասնագիտական գործունեությանը խոչընդոտելուն, 27-ը՝ գույքի դիտավորությամբ վնասելուն, որոնցից 25-ը քարոզչական պաստառների վնասման դեպքերն են, 15 դեպք՝ խուլիգանության, ծեծի և սպառնալիքի վերաբերյալ, այլ բնույթի դեպքերը՝ 13։

Մկրտչյանի փոխանցմամբ՝ արձանագրված դեպքերից 67-ն ընտրական իրավախախտումներ են, 57-ը՝ այլ բնույթի։

«124 դեպքերից ոստիկանությունում հարուցվել է 9 քրեական գործ, 2-ով որոշում է կայացվել քրեական գործի հարուցումը մերժելու մասին, 25-ն ուղարկվել է նախաքննության, 95 դեպքով նյութեր են նախապատրաստվում».- նշեց Մկրտչյանը։

Ինչ վերաբերում է պատահարների դեպքերին, Մկրտչյանը նշեց, որ 122 դեպքերից Երևանում արձանագրվել է 29, Լոռում 29, Սյունիքում և Գեղարքունիքում 12-ական, Արարատում՝ 9 դեպք, Արմավիրում՝ 5 դեպք, Արագածոտնի մարզում՝ 3, Կոտայքում ՝ 1 դեպք։

Մկրտչյանը հայտնեց, որ նշված պատահարի դեպքերից 24 թողնվել է անհետևանք՝ անհիմն լինելու պատճառաբանությամբ, 5-ը վերագրանցվել են որպես հանցագործության մասին հաղորդում, 95-ը գտնվում են ստուգման փուլում։

Աղբյուր` Փաստինֆո