Փաստ ինֆո

Դիտորդական առաքելությունը վաղը կներկայացնի ընտրությունների վերաբերյալ նախնական եզրակացություններն այս ողջ դիտարկման ժամանակահատվածի համար։

Այս մասին այսօր հայտարարեց Հայաստանի խորհրդարանական ընտրությունների ԵԱՀԿ-ԺՀՄԻԳ առաքելության ղեկավար Օուեն Մերֆին, որն ընտրությունները դիտարկել է թիվ 55 դպրոցում տեղակայված ընտրատեղամասում։

«4 շաբաթ առաջ մենք երկարատև դիտորդներ ենք տեղակայել երկրի բոլոր 10 մարզերում։ Եվ 2 օր առաջ 100-ից ավել կարճատև դիտորդների թիմեր՝ կրկին բոլոր մարզերում։Նրանք անում են նույնը, ինչ մենք են հիմա անում՝ այցելում են ընտրատեղամասեր և դիտարկում գործընթացը։ Նրանք իրականացնելու են դիտորդություն և իրական ժամանակում զեկուցելու են հիմնական թիմի անդամներին։

Երբ մեկ տեղամասում վերջացնում են, մեկնում են հաջորդ տեղամաս։ Սա շարունակվելու է ողջ օրը՝ մինչև ընտրատեղամասերը կփակվեն։ Գործընթացը շարունակվում է ձայների հաշվարկի ժամանակ, այնուհետ երբ արդյունքները տեղափոխվում են տարածքային ընտրական հանձնաժողովներ, ապա կենտրոնական ընտրական հանձնաժողով։

Այսպիսով, մեր թիմերը տեղակայված են լինելու ընտրատեղամասերում ողջ օրը, տվյալներ ու տեղեկատվություն են հավաքելու, որոնք մենք կհաղորդենք վաղը»,-ասաց Մերֆին։

Նա ձեռնպահ է մնացել խոսել օրինախախտումների մասին եւ թե արդյոք այդպիսիք արձանագրել են՝ նշելով, որ իրավասու չէ այս պահին նման տեղեկություններ հաղորդել։ Այդ ամենի մասին կհաղորդվի վաղը՝ նախնական եզրակացություններում։

Քարոզարշավի ընթացքի դիտարկման հետ կապված դիտորդական առաքելության ղեկավարը նշեց, որ հրապարակել են միջանկյալ զեկույց, որը ծածկել է մինչև մայիսի 31-ը ժամանակահատվածը։

«Հաջորդ արդեն մեր մեկնաբանությունները թե քարոզարշավի մասին, թե ընտրությունների օրվա մասին՝ կլինի վաղը՝ մեր նախնական դիտարկումներում»,-ասաց Մերֆին։

Աղբյուր` Փաստինֆո