Փաստ ինֆո

Քվեարկում եմ հանուն արժանապատիվ, բարեկեցիկ Հայաստանի, հանուն մեր մեծ հայրենիքի, հանուն Արցախի և Հայաստանի ապագայի։ Այսօր ընտրություն է Հայաստանի լինելու և չլինելու միջև։ Լրագրողների հետ զրույցի ժամանակ ասաց «Պատիվ ունեմ» դաշինքի վարչապետի թեկնածու Արթուր Վանեցյանը։

«Իշխանությունը հոգեվարքի մեջ է, և նրանց բոլոր քայլերը միտված են ընդդիմության դիրքերը թուլացնելուն։ Նրանք հասկանում են, որ այլևս երբեք Հայաստանում վերարտադրվելու կամ իշխանություն կազմելու հնարավորություն չունեն, ուստի վերջին ճիգերն են գործադրում իրենց իշխանական աթոռներից կառչած մնալու համար»,-ասաց Արթուր Վանեցյանը։

Հարցին, թե հետընտրական ինչ զարգացումներ է սպասում, Արթուր Վանեցյանն ասաց, որ դրա պատասխանատուն իշխանությունն է. «Կարծում եմ՝ հետընտրական զարգացումներ չեն լինի, որովհետև ընտրությունների արդյունքները կփաստեն, թե Հայաստանում ով է կազմելու իշխանություն»,-ասաց Արթուր Վանեցյանը։

Նա նշեց, որ այս պահի դրությամբ բազմաթիվ խախտումների վերաբերյալ ահազանգեր կան։ Արթուր Վանեցյանի խոսքով իրենց քվեաթերթիկների վրա կան նշումներ, կան նաև ընտրատեղամասեր, որտեղ իրենց քվեաթերթիկները չեն տալիս։ Արթուր Վանեցյանն ասաց, որ այս պահին հստակ չի կարող նշել, թե որ ընտրատեղամասում չեն տալիս «Պատիվ ունեմ» դաշինքի քվեաթերթիկները։

Հարցին՝ իրենց թիմակիցներից ձերբակալվածներ կա՞ն, Արթուր Վանեցյանն ասաց. «Երեկ ձերբակալվել են մեր Եղեգնաձորի շտաբի ներկայացուցիչները։ Որևէ հիմնավոր ապացույց ներկայացված չէ փաստաբանական թիմին, և կարծում եմ՝ դա արվել է բացառապես մեկ նպատակով՝ ընտրությունների ընթացքում մեր թիմակիցներին հեռվացնելու ընտրական գործընթացներից»,-ասաց Արթուր Վանեցյանը։

Անդրադառնալով «Պատիվ ունեմ» դաշինքի պատգամավորի թեկնածու Աննա Մկրտչյանի հոր մասնակցությամբ ձայնագրությունը, որում վերջինս Քասախում պարտադրում է քաղաքացիներին չքվեարկել ՔՊ-ի օգտին, Արթուր Վանեցյան ասաց. «Որևէ աղմկահարույց բան չկա։

Եթե աննորմալ բան լինի, կլինի քրեական գործ և կլինեն պատժվողներ։ Անկեղծ ասած ձայնագրությունը չեմ լսել, կարդացել եմ լրատվամիջոցներում, բայց որևէ աղմկահարույց բան չեմ տեսնում։ Վարչապետի պաշտոնը մինչև այսօր բոլոր իշխանական լծակներն օգտագործելով պահած կապիտուլյանտը երեկ առավոտյան ուղիղ եթեր էր մտել և խոսում էր ինչ-որ բաների մասին։ Աղմկահարույցն ու աննախադեպը դա էր»,-ասաց Արթուր Վանեցյանը։

Աղբյուր` Փաստինֆո