Փաստ ինֆո

«Իզմիրլյան» ԲԿ տնօրեն, «Հայաստան» դաշինքի պատգամավորի թեկնածու Արմեն Չարչյանի նկատմամբ խայտառակ քաղաքական հետապնդում է իրականացվում։ Հանրային հավաքից, որի մարդաքանակը կարծես թե այնպիսին էր, որ հոգեկան հուզմունքի գերբարձր աստիճանի լարում է առաջացրել, բայց դա որևէ հետևանք չի ունենալու։ Այս մասին «Փաստինֆո»-ի հետ զրույցում ասաց «Իզմիրլյան» ԲԿ տնօրեն Արմեն Չարչյանի պաշտպան Արամ Վարդևանյանը։

«Արմեն Չարչյանի տրամադրությունը բարձր է, ինչպես այլ դեպքերում, երբ նման ռեպրեսիաներ էին իրականացնում, հակառակ էֆեկտն էր տալիս, սա էլ ավելի մեծ մասշտաբի հակառակ էֆեկտ տվեց։ Ժամերի հարց է, ի վերջո, այս հեռացող իշխանության հարցը։ Ես պարզապես ցավում եմ իրավապահների նման միամտության և պատվերի նկատմամբ իմունային համակարգի իսպառ բացակայության համար»,- նշեց Արամ Վարդևանյանը։

Ինչպես արդեն տեղեկացրել ենք՝ այսօր իշխանամերձ փաստերի ստուգման հարթակը հրապարակել է ձայնագրություն, համաձայն որի՝ «Իզմիրլյան» բժշկական կենտրոնի տնօրեն Արմեն Չարչյանը հունիսի 18-ի առավոտյան աշխատակիցների հետ հանդիպմանը հորդորել է, որ աշխատակիցները պարտադիր կարգով մասնակցեն ընտրություններին։ Չարչյանը նշել է, որ եթե որևէ մեկը չմասնակցի ընտրություններին, ապա նա կիմանա այդ մասին։ Ձայնագրության հրապարակումից հետո հաշված ժամերի ընթացքում ՀՀ ՀՔԾ-ում հարուցվել է քրեական գործ՝ ՀՀ քրեական օրենսգրքի 154.2-րդ հոդվածի 4-րդ մասի 2-դ կետի հատկանիշներով, որի շրջանակներում նախ բերման են ենթարկել Չարչյանին և տեղափոխել ՀՔԾ, որտեղ արդեն նրան ձերբակալելու մասին որոշում է կայացվել։

Նրա մյուս պաշտպան Էրիկ Ալեքսանյանը «Փաստինֆո»-ի հետ զրույցում նշեց, որ Արմեն Չարչյանը ձերբակալվել է ՀՀ քրեական օրենսգրքի 154.2-րդ հոդվածի 4-րդ մասի 2-դ կետով նախատեսված արարք կատարելու կասկածանքով, իսկ որպես ձերբակալման հիմք նշված է հանցանք կատարելուց անմիջապես հետո բռնվելը, որպես նպատակ՝ հանցագործությունը կատարելուց հետո Արմեն Չարչյանի փախուստը կանխելու, ինչպես նաև նրա կողմից ընտրողների ազատ կամքի իրականացմանն ապօրինի խոչընդոտելու առկա վտանգը չեզոքացնելու նպատակներով։ Մինչդեռ՝ Չարչյանն ընդհանրապես չի ընդունում ձերբակալման հիմնավոր կասկածը, քանի որ որևէ տեսակի հանցագործություն չի կատարել։

Փաստաբանի նկատեց, որ Չարչյանին վերագրվող արարքը չափազանց անորոշ է, ինչը նրան զրկում է նաև արդյունավետ պաշտպանվելու իրավունքից։ Ալեքսանյանը հայտնեց, որ Չարչյանն ընդգծել է, որ այդ չարաբաստիկ կասկածանքը որևէ աղերս չունի իրավաբանության հետ, այդ ամենը նման չէ իրավական գործընթացի և ողջամտորեն դիտարկում է որպես իր նկատմամբ իրականացվող բացառապես քաղաքական հետապնդում, քանի որ հանրահայտ փաստ է, որ ինքը հանդիսանում է ՀՀ երկրորդ նախագահ Ռոբերտ Քոչարյանի ղեկավարած «Հայաստան» դաշինքի պատգամավորի թեկնածու։ Չարչյանը դիրքորոշում է հայտնել առ այն, որ պարզ տրամաբանությունը հուշում է, որ այս ամենը կատարվում է բացառապես երկրորդ նախագահի թիմակիցների նկատմամբ ճնշում գործադրելու նպատակով, ինչպես նաև՝ խոչընդոտի իր՝ Սահմանադրությամբ նախատեսված ընտրվելու իրավունքի իրացումը։

Ինչ վերաբերում է ձերբակալման իրավական հիմքերին, ապա Ալեքսանյանն ընդգծեց, որ այն իրավաչափ չէ այնքանով, որքանով Չարչյանը չի ձերբակալվել ենթադրյալ հանցանքը կատարելուց անմիջապես հետո, ինչը ենթադրում է ենթադրյալ հանցանք կատարելուց հետո ողջամիտ ժամկետում, մինչդեռ՝ Չարչյանն իր աշխատակիցների հետ զրուցել է այսօր՝ ժամը 09։30-ի սահմաններում, իսկ փաստացի արգելանքի տակ է վերցվել դրանից մոտ 9 ժամ և 10 րոպե հետո, ինչը բավարար է արձանագրելու, որ խոսք չի կարող գնալ ենթադրյալ հանցավոր արարքը կատարելուց հետո բռնելու մասին։

Անդրադառնալով ձերբակալման նպատակին՝ փախուստը կանխելուն, ապա պաշտպանության կողմի դիտարկմամբ, այն նույնպես իրավաչափ չէ, ավելին՝ անգամ իրատեսական չէ, քանի որ Արմեն Չարչյանը որևէ գործողություն չի կատարել, որոնք ուղղված կլինեին վարույթն իրականացնող մարմնի տեսադաշտից դուրս գտնվելուն կամ նրանց կողմից չնկատվելուն։ Հակառակը՝ Չարչյանն այսօր ամբողջ օրվա ընթացքում գտնվել է աշխատանքային պրոցեսում և իր հարազատ քաղաքում։ Բացի դա՝ հանցանք կատարելու կասկածանքով բերման ենթարկելը քննիչի ոչ թե իմպերատիվ, այլ՝ հայեցողական իրավունքն է, ինչը ենթադրում է, որ քննիչը կարող էր հրավիրել քննություն իրականացնող մարմին, ինչը ևս հայեցողական է, բայց ստեղծվել է իրավիճակ, որ երկու հայեցողական իրավունքներից ընտրվել է ոչ բարենպաստը, ինչը Չարչյանի համար անհասկանալի է, քանզի՝ որևէ մեկից խուսափելու միտում չունի, չի ունեցել և չի ունենա, ուստի՝ եթե Չարչյանին հրավիրեին, ապա ինքն, անշուշտ, կներկայանար նախաքննական մարմին։ Փաստաբան Էրիկ Ալեքսանյանի խոսքով՝ չի ներկայացվել նաև բավարար հիմնավորում առ այն, թե ինչ փաստական տվյալներով է հիմնավորվում նախ փախուստի դիմելու հանգամանքը, ինչպես նաև փաստ առ այն, թե որն է այն հիմնավոր ռիսկը, որ եթե Արմեն Չարչյանին ոչ թե բերման ենթարկեին, այլ՝ հրավիրեին, չէր ներկայանա։

Ինչ վերաբերում է որպես ձերբակալման նպատակ նշված՝ ընտրողների ազատ կամքի իրականացմանն ապօրինի խոչընդոտելու առկա վտանգը չեզոքացնելը, ապա փաստաբանը նշեց, որ նման նպատակ օրենսդիրն առհասարակ չի նախատեսել, դա ավելի շատ նման է կալանավորման խափանման միջոցի հիմքին, իսկ տվյալ դեպքում նման հարկադրանքի միջոցի մասին խոսք չի գնում, հետևաբար՝ հարց է առաջանում, թե որն է նպատակը՝ որպես ձերբակալման նպատակ նշել մի հանգամանք, որն իրավաբանորեն գոյություն չունի։

«Եթե այն ուղղված է զուտ ձերբակալման արձանագրությունը ճոխացնելուն, ապա դա ևս մեկ անգամ հաստատում է, որ այս ամենը կապ չունի իրավական գործընթացի հետ, ինքնանպատակ են և իրենց մեջ պարունակում են բացառապես քաղաքական երանգներ»,- նշեց Ալեքսանյանը՝ հավելելով, որ չի կարծում, որ կառույցը, ունենալով պրոֆեսիոնալ քննիչների կազմ, չգիտակցի, որ արգելանքի տակ վերցնելու վերաբերյալ նշվում է մի նպատակ, որն ուղղակի գոյություն չունի օրենսդրորեն։

Պաշտպաններ Էրիկ Ալեքսանյանը և Արամ Վարդևանյանը բողոք կներկայացնեն դատարան՝ Արմեն Չարչյանին ձերբակալելու մասին որոշման դեմ։

Հեղինակ՝ Իզաբել Սահակյան

Աղբյուր` Փաստինֆո