Փաստ ինֆո

Մեր անկախության 30 տարվա ընթացքում մեր դիվանագիտությունը լուրջ հաջողություններ է գրացել շատ բարդ խնդիրների լուծման հարցում: Այս մասին ֆեյսբուքյան ուղիղ եթերում Կառավարության երկրորդ մասնաշենքի դիմաց ասաց Լեհաստանում Հայաստանի նախկին դեսպան, ՍԴ աշխատակազմի նախկին ղեկավար Էդգար Ղազարյանը:

Արձանագրած հաջողություններից էդգար Ղազարայանն առանձնացրեց խաղաղությունը, Հայոց ցեղասպանության ճանաչումն ու դատապարտումը, տարբեր պետությունների հետ երկկողմ և բազմակողմ հարաբերությունների հաստատումը, երկրի ակնհայտ զարգացումը:

«Իսկ ինչ եղավ 2018 թվականից հետո, երբ իշխանության եկավ անփորձ և անհավասարակշռված մի արարած: Չհասկանալով ոչինչ դիվանագիտությունից և միջազգային հարաբերություններից, Փաշինյանը ԱԳՆ-ի ղեկավար նշանակեց Սերժ Սարգսյանի և Ռոբերտ Քոչարյանի ամենաթույլ կադրերից մեկին` Զոհրաբ Մնացականյանին: ԱԳՆ-ի գլխավոր գերակայությունը դա Լեռնային Ղարաբաղի խաղաղ կարգավորումն է, մեզ համար ընդունելի երեք հիմնական սկզբունքների պահպանումը: Մնացականյանի պաշտոնավարման ժամանակ դադարեցվել են հայ-ադրբեջանական բանակցությունները»,-ասաց Ղազարյանն ու ավելացրեց,-«Զոհրաբ Մնացականյանը հանդուրժեց Հայաստանի դիվանագիտության տապալումը, մեր պետության գլխավոր հարցի վերաբերյալ: Մնացականյանը հանդուրժեց, որ Փաշինյանը փոխնարար նշանակեց Ռուբեն Ռուբինյանին, որի համար դա իր առաջին աշխատանքն էր: Եվ նա փաստացի կառավարում էր ԱԳՆ-ն, մինչև ԱԺ պատգամավոր դառնալը»։

Ըստ Ղազարյանի, հաջորդ ԱԳ նախարարը՝ Արա Այվազյանը վերջնականապես տապալել է հայ դիվանագիտությունը,  հնարավորություն տալով Փաշինյանին  ուղիղ բանակցությունների մեջ մտնել Ադրբեջանի հետ և նախապատրաստել նոր կապիտուլյացիոն փաստաթղթեր:

«Դրանցից մեկն ականապատված տարածքների քարտեզները թշնամուն փոխանցելն էր: Այս գործընթացը որևէ կապ չունի գերիների վերադարձման գործընթացի հետ: 15 գերու վերադարձը պարզապես պատրվակ է եղել թշնամուն այդ քարտեզները փոխանցելու համար»,- ասաց Ղազարյանը:

Վերջում Ղազարյանը շեշտեց, որ դիվանագետները պետք է ոչ թե հեռանան համակարգից, այլ իշխանությունից հեռացնեն Նիկոլ Փաշինյանին:

Աղբյուր` Փաստինֆո