Փաստ ինֆո

Նիկոլ Փաշինյանի համար ամենացանկալի ուժերը Արամ Սարգսյանի գլխավորած «Հանրապետություն» կուսակցությունն է և Շիրինյան-Բաբաջանյան դաշինքը: Նրա համար ցանկալի կլիներ, որ այս ուժերը հայտնվեին խորհրդարանում, որովհետև այդ ուժերի հետ որևէ խնդիր չի լինի կոալիցիա ձևավորել և միավորել մանդատները՝քաղաքական մեծամասնություն ձևավորելու և սեփական իշխանությունը վերարտադրելու համար:

Իրականանալի՞ է այս ցանկությունը, թե՞՝ ոչ, երեք օրից պարզ կդառնա, ինձ թվում է շատ բարդ խնդիր է: «Փաստինֆո»-ի հետ զրույցում ասաց քաղտեխնոլոգ Վիգեն Հակոբյանը և վստահեցրեց, որ եթե այս ուժերը անցնեն խորհրդարան, կհամագործակցեն իշխանության հետ և կփորձեն կոալիցիա ձևավորել, սակայն նրա դիտարկմամբ՝ այս ուժերի խորհրդարան անցնելը քիչ հավանական է։

«Այս պահի դրությամբ դեռևս հավանական չեմ համարում, որ նրանք կանցնեն խորհրդարան, բայց եթե նրանցից մեկն էլ անցավ, անխոս կփորձի ՔՊ-ի հետ կոալիցիա կազմել: Իսկ այն ուժերը, որոնք հավանական է, որ կանցնեն խորհրդարան՝«Հայաստան», «Պատիվ ունեմ» դաշինքները և ԲՀԿ-ն բացառել են գործող իշխանության հետ համագործակցությունը: ԼՀԿ-ն էլ փաստ չէ, որ անցողիկ է, բայց նույնիսկ ԼՀԿ-ն հայտարարել է, որ անցնելու դեպքում ՔՊ-ի հետ չի համագործակցի»,-ասաց Վիգեն Հակոբյանը:

Փորձագետի համոզմամբ՝ Նիկոլ Փաշինյանն ամեն ինչ կանի, որ իր համար ցանկալի այս ուժերն անցնեն խորհրդարան.

«Ինքը մեծ ցանկություն կունենա, որ նույն Արամ Սարգսյանի կուսակցությունն անցնի խորհրդարան, այս ուղղությամբ, որքան հնարավոր է, կօժանդակի, բայց ինքն իր խնդիրներն էլ ունի:Նիկոլ Փաշինյանը դեռևս իր հարցերը պետք է լուծի, այնպես չի, որ իր հարցերը լուծել է, հիմա էլ պոտենցիալ դաշնակիցների հարցը լուծի: Ինքն իր առջև խնդիր է դրել հաղթելու, քանի որ խորհրդարան անցնելու խնդիր չունի, ինքն ունի բավական շատ ձայներ, որպեսզի անցնի խորհրդարան, բայց դա շատ հեռու է, որ ինքը լինի հաղթող: Այն ռեսուրսները, որոնք պետք է օգտագործվեն սատելիտ կուսակցություն անցկացնելու համար, դա կօգտագործի, որպեսզի իր ձայներն ավելացնի»,-ասաց Վիգեն Հակոբյանը:

Տարբեր սոցհարցումների համաձայն՝ Նիկոլ Փաշինյանն ունի 25-30 տոկոս ձայն, ինչը իշխող ուժի համար պարտություն է ու կառավարություն ձեւավորել չի կարող։ Շրջանառվող տեղեկությունների համաձայն՝ Նիկոլ Փաշինյանը իրեն չընտրող ընտրազանգվածին ուղղորդում է դեպի Բաբաջանյանի դաշինքը կամ Արամ Զավենի Սարգսյանի կուսակցությունը, որ գոնե նրանցից մեկը անցնի խորհրդարան։

«Փաստինֆո»-ի հետ զրույցում՝ քաղտեխնոլոգը նկատեց, որ այս երկու ուժերը Նիկոլ Փաշինյանի հետ գաղափարական և մեթոդաբանական տարբերություններ չունեն, միևնույն ժամանակ ունեն ընդհանուր հակառակորդներ՝ ի դեմս «Հայաստան» և «Պատիվ ունեմ» դաշինքների.

« Չեմ կարծում, որ ԲՀԿ-ին էլ շատ են սիրում, բայց երկու դաշինքների նկատմամբ կա հրապարակային քաղաքական դրսևորում: Նրանք որևէ լուրջ տարաձայնություն չեն ունեցել գործող իշխանության հետ, երբեմն ունեցել են միայն տակտիկական կամ մասնավոր բնույթի տարաձայնություններ:

Եթե դուք հիմա իրենց էլ հարցնեք՝ խորհրդարան անցնելու դեպքում հավանական համարում եք համագործակցությունը, բոլորն էլ կասեն՝ այո, այստեղ ետկուլիսային էլ ոչինչ չկա, իսկ նախընտրական շրջանում իրենց քայլերը համադրելը համարում եմ շատ բնական»,-ասաց Վիգեն Հակոբյանը:

Աղբյուր` Փաստինֆո