Փաստ ինֆո

Ես չեմ հավատում, որ այս տարի ընտրությունները իսկապես լինելու են արդար և թափանցիկ: Այս մասին «Փաստինֆո»-ի հետ զրույցում ասաց քաղաքագետ Սերգեյ Շաքարյանցը՝ նշելով, որ Կենտրոնական ընտրական հանձնաժողովը գործում է այն նույն կազմով, որը հաստատել է 2018 թ. Կեղծված ընտրությունների արդյունքները։

«Եթե ԿԸՀ-ի անդամները չեն փոխվում, որտեղից վստահություն, որ իրենք քաղաքական պատվեր չեն կատարի: Ես ինքս եմ հետևել 2018 թվականի ընտրություններին: Ու այդ ժամանակ մեկ ժամվա ընթացքում շատ տարօրինակ բան է տեղի ունեցել: «Դաշնակները» հավաքում էին 9%, իսկ վերջնահաշվարկի ժամանակ՝ մեկ ժամվա ընթացքում, նվազեց արդյունքներն ու 5%-ից պակաս հայտարարվեց, - շեշտել է Շաքարյանցը:

Նրա դիտարկմամբ՝ այս ընտրություններում ոչ մի դաշինք և կուսակցություն ի վիճակի չէ հաղթահարել 50+1 շեմը և ինքնուրույն ձևավորել կառավարություն: «Այդ պատճառով պետք է պատրաստվել այս ընտրությունների երկրորդ փուլին: Կարծում եմ խորհրդարան կանցնեն 4 քաղաքական ուժ: Ընտրություններին մասնակցող քաղաքական ուժերի մեծամասնությունը, կհավաքեն 2-3 տոկոս, ոչ ավել: Իհարկե, խորհրդարանում լինելու է ընդդիմություն, սակայն, այն ընդդիմությունից , որը այսօր խորհրդարանում է որևէ ակնկալիք չկա: Եթե նրանք անգամ չլինեին խորհրդարանում, դրանից ոչինչ չէր փոխվի: Նրանք ոչ մի ազդեցություն չեն ունեցել քաղաքական պրոցեսների վրա», - արձանագրել է քաղաքագետը:

Ըստ նրա, Ազգային Ժողով կանցնեն Ռոբերտ Քոչարյանի «Հայաստան» դաշինքը և Նիկոլ Փաշինյանի «Քաղաքացիական պայմանագիր» կուսակցությունը: Երրորդը կլինի «Պատիվ ունեմ» դաշինքը:

««Հանրապետական» կուսակցությունն անգամ 2018 թվականին շատ մոտ էր խորհրդարան անցնելուն, սակայն այն ժամանակ մանդատ չտվեցին։ Կարծում եմ արհեստական են իջեցրել ՀՀԿ-ի ձայների թիվը: Իմ կարծիքով, դաշինքով իրենց շանսերը անցնել խորհրդարան նույնպես բավականին բարձր են: Նաև չեմ բացառում, որ Ազգային Ժողովում կլինի «Բարգավաճ Հայաստան» կուսակցությունը»,- ասաց Շաքարյանցը:

Նա նաև չբացառեց, որ Տեր-Պետրոսյանի և Փաշինյանի մինչև կան անդրկուլիսյան պայմանավորվածություններ: «Տեր-Պետրոսյանը իր բոլոր ելույթներում հանդես է գալիս որպես Փաշինյանի փաստաբան և արդարացնում իր աշակերտի բոլոր սխալները: Իրականում Ղարաբաղի հարցում Փաշինյանը իրականացրեց այն պլանը, որն ուներ Տեր-Պետրոսյանը 1992 թվականին: Սակայն, աշակերտը գերազանցեց իր ուսուցչին, Ադրբեջանին հանձնելով Շուշին և Հադրութը: Ես կարծում եմ, որ իրենք միասնաբար են գործում», - ասաց քաղաքագետը:

Փորձագետի կարծիքով՝ մարզերի եւ Երեւանի ընտրողների ձայների քվեարկության արդյունքները կլինեն խիստ տարբեր։ Օրինակ՝ Սյունիքում և Գեղարքունիքում մարդիկ շատ լարված են՝ հաշվի առնելով այն փաստը, որ թուրքերն իրենց տներին են մոտեցել:

«Ես վստահ եմ, որ սահմանամերձ մարզերի, Սյունիքի և Գեղարքունիքի բնակիչները ընտրելու են այն քաղաքական ուժերին, որոնք կարող են ապահովել սահմանների անվտանգությունը, այլ ոչ թե այն մարդկանց, որոնք առաջարկում են մեզ ընկերություն անել թուրքի հետ: Այդ մարդիկ հարցնում են, եթե մենք ընկերություն անենք թուրքի հետ, ինչ կլինի: Եթե նրանք ուզում են տեսնել, թե ինչ է լինելու, թուրքի հետ խաղաղ ապրելու արդյունքում, կարող են գնալ Արցախ և տեսնել քանդված գերեզմանները: Կարող են հիշել 1915 թվականի ցեղասպանությունը: Սահմանամերձ մարզերի բնակիչները տեսնում են թշնամուն և գիտակցում են այն ռիսկերը, որոնք կարող են տեղի ունենալ, եթե ընտրություններում հաղթի թուրքի հետ ընկերություն անելու մեծ ցանկություն ունեցող քաղաքական ուժը»,- եզրափակել է Շաքարյանցը:

Հեղինակ՝ Անի Մշեցյան

Աղբյուր` Փաստինֆո