Փաստ ինֆո

Իրավապահ մարմինների աշխատողների ճնշող մեծամասնությունը բարեխիղճ իրենց պարտականությունը կկատարեին, եթե հիմար հրահանգներ չստանային։ Մարտունիում քաղաքացիների հետ հանդիպման ժամանակ ասաց ՀՀ երկրորդ նախագահ, «Հայաստան» դաշինքի վարչապետի թեկնածու Ռոբերտ Քոչարյանը։

«Այն ոստիկանները, որոնք 2000 հոգով անընդհատ մեկ մարդու անվտանգություն են ապահովում, ինչն իրենց գործառույթի մեջ չի մտնում, նրանք էլ են դժգոհ։ Բավարար չափով տեղեկացված ենք՝ ինչ է կատարվում այդ ոլորտներում։ Չեմ հիշում ՀՀ որևէ ղեկավար, որի տեղաշարժն այդքան մարդ պետք է ապահովեր։ Ամենահետաքրքիրն այն է, որ սա անում է մի իշխանություն, որն ասել է՝ ժողովրդի իշխանություն է և սկսել է հեծանիվ քշելուց։ Հիմա հասանք նրան, որ 2000 հոգով, սնայպերներով կառավարության մի շենքից մյուսը տեղափոխվող իշխանավոր ունենք։ Սա ամենից արագ փոխվող հարցն է և պատժվելու են այն մարդիկ, որոնք ավելորդ ջանասիրություն էին ցուցաբերում այս ամենի մեջ»,-ասաց Ռոբերտ Քոչարյանը։

Անդրադառնալով ԱԱԾ-ին՝ Ռոբերտ Քոչարյանը նշեց, որ նրանք իրենց գործառույթներով չեն զբաղվում։ Երեք տարվա ընթացքում ԱԱԾ 5 պետ է փոխվել, ինչը խոսում է այն մասին, որ պետերին ինչ-որ բան են հանձնարարում, մի քանի անգամ անում են, բայց հետո ասում, որ չեն կարողանում կատարել այդ հանձնարարությունը։

«Այդ նախկին պետերի հետ հիմա շփում ունենք։ Գիտենք՝ ինչ ձևով էին հանձնարարում, և բոլորը դուրս են եկել մի պատճառով։ Մի գիծ էր, որի տակ արդեն չէին մտնում։ Հանձնարարականներն նամակներով էին գնում։ Գիշերը մարդը կարող է հանձնարարական ստանա, սքրինշոթ ուղարկեն ու ասեն՝ այս մարդն այսպիսի պոստ է գրել ֆեյսբուքում, գնացեք ականջը քաշեք։ Սա է վիճակը։ Այդ կադրային փոփոխությունը սրա պատճառով է»,-ասաց Ռոբերտ Քոչարյանը՝ նկատելով, որ անվտանգությունն այսօր փորձում են սարքել քաղաքական ոստիկանություն։

Աղբյուր` Փաստինֆո