Փաստ ինֆո

Փաշինյանի խոստումներից ոչ մեկը չի կատարվել. քաղաքացիները խաբվել են և ճնշող մեծամասնությունը դա գիտակցում է,-ուկրաինական հեղինակավոր Страна պարբերականին տված հարցազրույցում ասել է «Պատիվ ունեմ» դաշինքի վարչապետի թեկնածու, «Հայրենիք» կուսակցության նախագահ Արթուր Վանեցյանը՝ պատասխանելով լրագրողի հարցին, թե 2018 թվականից հետո մինչև պատերազմը ի՞նչ փոփոխություններ են Հայաստանում տեղի ունեցել կոռուպցիայի, տնտեսական զարգացման առումով։ 

Վանեցյանը շեշտել է, որ Փաշինյանը իշխանության եկավ փոփոխությունների, լավ ապրելու ակնկալիքների ալիքի վրա՝ խոստանալով արդարություն հաստատել։ Վանեցյանը շեշտել է, որ կարևոր է տարբերել պոպուլիստական հայտարարությունները և իրական կյանքի փոփոխությունները։ «Բարի մտադրությունները վերածվեցին դժոխքի ճանապարհի»,- ասել է գործիչն ու ավելացրել. «Մեզ մոտ, ցավոք, հենց այդ դեպքն է։ Հանցավորության, կոռուպցիայի դեմ պայքարը սպեկուլյատիվ հայտարարություններ էին»։

Նա ընդգծել է, որ երկրում քաղաքական կոռուպցիան աննախադեպ չափերի է հասել։

«Օրինակ՝ քաղաքական հավատարմության դիմաց պետական ծառայողներին, խորհրդարանականներին չհիմնավորված միլիոնների պարգևավճարներ են բաժանվել։ Կամ պետական բարձր պաշտոնների նշանակումը ՝ նվիրվածության սկզբունքով և այլն։ Կարելի է երկար թվարկել»,- ասել է Արթուր Վանեցյանը։

«Պատիվ ունեմ» դաշինքի վարչապետի թեկնածուն նկատել է, որ այս տարիների ընթացքում ոչ ոք, բացի իշխանության մերձավորներից ավելի լավ չի սկսել ապրել։ Փոխարենը նկատելի է գնաճ, գործազրկության մակարդակի աճ։ Նկատելի է ծայրահեղ աղքատությունը, տնտեսության կոլապսը, շանտաժն ու ճնշումը դատական իշխանության վրա, իրավապահ համակարգը այլակարծության դեմ պայքարի գործիք դարձնելը, բոլոր ոլորտներում ծայրահեղ ոչ կոմպետենտությունը։ Վանեցյանը նշել է, որ ցանկը կարելի է ևս երկար թվարկել։

Փաշինյանի կողմից քարոզվող «Պետությունը ես եմ» բանաձևի պատճառով ժողովրդավարության մակարդակի անկում է գրանցվել, մարդու իրավունքները, խոսքի ազատությունը համատարած ոտնահարված են։

«Այս և նմանատիպ այլ երևույթները, որոնք ոչ մի ընդհանուր բան չունեն 2018 թվականին փողոց դուրս եկած մարդկանց երազանքների հետ, ստացել են «նիկոլիզմ» անվանումը։ Սա Նիկոլի անունից առաջացած տերմին է։ Նիկոլիզմը, կամ, ինչպես նրան այլ կերպ անվանում են Հայաստանում պանդեմիայից հետո, «նիկոլավիրուսը» պոպուլիզմի յուրօրինակ մուտացիա է, որը երկիրը և հասարակությունը հանգեցրել է պատերազմի, անկման և ավերածությունների»,- ասել է Արթուր Վանեցյանը։

Աղբյուր` Փաստինֆո