Փաստ ինֆո

Ընտրակաշառքի մասին վկայող տեսանյութի համար գումար առաջարկելու Նիկոլ Փաշինյանի հայտարարությունն ինքնին վկայում է, որ մեր երկրում Նիկոլ Փաշինյանը և նրա շրջապատն ինչ-որ գումարների են տիրապետում, որտեղի՞ց 1000 դոլար, ի՞նչ ֆոնդերի մասին է խոսքը գնում։ Այս մասին «Փաստինֆո»-ի հետ զրույցում ասաց իրավապաշտպան, Ընտրությունների վերահսկման կոմիտեի ներկայացուցիչ Ռուբեն Մելիքյանը։

Ինչպես արդեն տեղեկացրել ենք՝ արտահերթ խորհրդարանական ընտրությունների քարոզարշավի շրջանակներում Նիկոլ Փաշինյանն այսօր հայտարարել է, որ ՔՊ-ն ընտրակաշառքի մասին վկայող տեսանյութի համար 1000 դոլար պարգև է խոստանում: Քաղաքացիները 500 հազար ՀՀ դրամ կստանան՝ յուրաքանչյուր նման հայտարարության համար։

Ռուբեն Մելիքյանը «Փաստինֆո»-ի հետ զրույցում հայտնեց, որ դեռևս 10 օր առաջ բարձրաձայնել են պետական միջոցների հաշվին ընտրակաշառքի մասին, սակայն առ այս պահը պարզաբանում չի ստացվել։ Խոսքը, մասնավորապես, Վանաձոր բժշկական կենտրոնում տարվա կեսին շուրջ 300 անձի աշխատավարձ է բարձրացվել՝ հարկատուների միջոցներով, մինչդեռ բյուջետային հիմնարկներում դա հնարավոր չէ, քանի որ նման հաստատությունները նախապես պլանավորվող բյուջե են ունենում։ «Մենք դրա մասին բարձրաձայնել ենք, հարցումներ ենք ուղարկել, բայց պատասխաններ չենք ստացել։ Եթե շատ մեծ ցանկություն ունի, կարող է 1000 դոլարը փոխանցել անձամբ ինձ»,- նշեց Մելիքյանը։

Դիտարկմանը՝ փորձ է արվում պետական բյուջեի հաշվին ընտրակաշառք բաժանե՞լ՝ Մելիքյանը նշեց, որ բազմաթիվ տեղեկություններ են ստացել, այս դեպքը շատ հստակ էր, քանի որ այդ մասին ֆեյսբուքյան էջում նշվել է և հիմնարկի ղեկավարը «Քաղաքացիական պայմանագիր» կուսակցության ցուցակում է, պաշտոնապես նրանք շնորհակալություն էին հայտնել «ՔՊ» ցուցակում գտնվող Առողջապահության նախարարին և մարզպետին, դա ակնհայտ ընտրակաշառքի դրսևորում է, այն էլ՝ պետական միջոցների հաշվին։ Բացի դա՝ Մելիքյանն ընդգծեց, որ եթե նման տեսանյութեր չլինեն կամ լինի 1-2 տեսանյութ, ապա դա կնշանակի, որ ընտրակաշառք մեր երկրում ընդհանրապես չի բաժանվել ընդդիմադիրների կողմից, որովհետև մարդիկ ավելի մեծ ցանկություն կունենան 1000 դոլարի չափով գումար վաստակել, քան՝ մանր-մունր ընտրակաշառքներ։

«Կարծում եմ՝ այդտեղից մենք ևս հետևություն կանենք, եթե, իհարկե, մարդիկ դեռևս վստահում են իր կողմից տրված խոստումներին»,- նշեց Մելիքյանը։

Հարցին՝ արդյոք կարող ենք արձանագրել, որ դա քաղաքական կոռուպցիայի դրսևորում է, Մելիքյանը պատասխանեց՝ նշելով, որ քաղաքական կոռուպցիան չսահմանված երևույթ է և կան դեպքեր, երբ ընդդիմությունը նման հայտարարություններ է անում, ինչ-որ ֆոնդ է հավաքում՝ փորձելով պայքարել ընտրակաշառքների դեմ, բայց չի հիշում, որ նման դրսևորումներ լինեն իշխանության ուժի կողմից, որովհետև իշխանությունն ունի լայն գործիքակազմ, օրինակ՝ ոստիկանություն։

«Եթե մինչ այս մենք կարող էինք հայտարարել, որ ՔՊ տրամադրության տակ է Ոստիկանությունը, ԱԱԾ-ն և մյուս իրավապահ մարմինները և եթե ընտրակաշառքի մասին է խոսքը, ապա նրանք պարտավոր են դա բացահայտել, հիմա դրան գումարվեց նաև չգիտես ինչ գումարներով խոստացված դրամական լուրջ փոխհատուցում» ,- նշեց Մելիքյանը՝ հավելելով, որ հիմա կկարողանան հետևություններ անել՝ արդյոք ընտրակաշառքի մասին խոսք գնացել է, թե ոչ։

Թեև վերջին շրջանում պարբերաբար բարձրաձայնվում է ընտրակաշառքի հարցը, սակայն նախընտրական գործընթացներում կան առավել կարևոր հարցեր, ինչպիսիք են արցախցիների՝ քվեարկությանը մասնակցելու գործընթացում առկա խոչընդոտներին։

Այս խնդրին անդրադառնալով՝ Ռուբեն Մելիքյանը հայտնեց, որ Վարդենիսում «Քաղաքացիական պայմանագիր» կուսակցության պատասխանատուն Արցախի երեք նախկին բնակիչների տարել է Ոստիկանություն, գրանցել տվել, որ նրանք կարողանան մասնակցել քվեարկությանը, իսկ մյուս մարդիկ, որոնք ՔՊ հովանու ներքո չեն, մերժումներ են ստանում։

Ինչ վերաբերում է նշված խնդրով դատարան ներկայացված հայցադիմումներին՝ Մելիքյանը հայտնեց, որ դատարան է ներկայացվել շուրջ 100 հայցադիմումներ, կան տեղեկատվություններ՝ հայցադիմումների բավարարման վերաբերյալ, իսկ մերժումների վերաբերյալ դեռևս տեղեկատվություն չունեն։ Մելիքյանը հնարավոր է համարում թե բավարարումները, թե՛ մերժումները տարբեր պատճառներով, այդ թվում նաև՝ չի բացառվում դատավորները կարող են տարբեր մոտեցումներ ունենալ հարցի շուրջ։ Նրա խոսքով՝ իրավական տեսանկյունից ինքը չի պատկերացնում, թե ինչպես է հնարավոր մերժել ՀՀ քաղաքացու անձնագիր ունեցող մարդկանց, իսկ ՀՀ օրենսդրությամբ՝ ՀՀ անձնագիր ունեցող անձինք երկու սորտի չեն բաժանվում։

Հեղինակ՝ Իզաբել Սահակյան

Աղբյուր` Փաստինֆո