Փաստ ինֆո

Ցանկացած տեղեկատվություն, որը վերաբերում է բանակին, տեղակայման, անձնակազմին, հրամկազմին, պետական գաղտնիք է համարվում։ Այս մասին «Փաստինֆո»-ի հետ զրույցում ասաց «Ազգային անվտանգություն» կուսակցության նախագահ Գառնիկ Իսագուլյանը։

Ինչպես արդեն տեղեկացրել ենք՝ հունիսի 12-ին հայրենիք է վերադարձել Ադրբեջանում գերության մեջ պահվող 15 հայորդի։ Նույն օրը հայտնի դարձավ, որ հայկական կողմը Ադրբեջանին է փոխանցել Ակնայի ականապատ դաշտերի վերաբերյալ քարտեզը, ինչը համարվում է պետական գաղտնիք։ Ավելին՝ Փաշինյանը հայտարարել է, թե դա քարտեզի մի մասն էր միայն՝ այդ կերպ վտանգի տակ դնելով Ադրբեջանում գտնվող հայ ռազմագերի վերադարձի հարցը։

Գառնիկ Իսագուլյանը մեզ հետ զրույցում նշեց, որ հարցը բավականին նուրբ է և այս պարագայում խոսքը գնում է այն տարածքների մասին, որոնք գտնվում են ադրբեջանական վերահսկողության տակ, միևնույն ժամանակ Ադրբեջանի ձեռքում են գտնվում նաև հայ գերիները։ Նրա խոսքով՝ ցանկացած իշխանություն ինքն է որոշում, թե որն է առավել կարևոր՝ պետական գաղտնիքը թե հումանիտար խնդիրը։

«Բնականաբար մեր գերիների կյանքը շատ ավելի կարևոր է, քան արդեն թշնամու թիկունքում մնացած ինչ-որ ականապատ տարածքներ, որովհետև իրենք, միևնույնն է, կարող են այդ տարածքներն ականազերծել։ Բավականին երկար ժամանակ և ֆինանսական ռեսուրսներ ծախսել, բայց կարող են անել և եթե նրանք առաջարկում են այդ քարտեզների փոխարեն վերադարձնել մեր գերիներին, կարծում եմ, որևէ իշխանություն բարոյական առումով նույնիսկ չի կարող չգնալ այդ գործողությանը։ Եթե մարդիկ չեն կարողանում այլ ձևով վերադարձնել մեր գերիներին և նրանց համար ամեն մի օր գերության մեջ մնալը, բավականին լուրջ հարց է՝ թե այդ մարդկանց համար, թե նրանց հարազատների, թե՛ պետության համար»,-նշեց Իսագուլյանը՝ հավելելով, որ եթե վերջին տարբերակը մնացել է թշնամու թիկունքում գտնվող ականապատ տարածքի քարտեզներով գերիներին վերադարձնելը, ապա կարելի է գնալ նման քայլի, այդտեղ որևէ դավաճանություն չկա։

Նրա խոսքով՝ Իսրայելում ընդունված է, որ ցանկացած զինվորի դաստիարակում են այնպես, որ, եթե գերի է ընկնում, պետք է ասի ամենը՝ ինչ գիտի, որովհետև ամենակարևորը նրանց կյանքն է։

«Իսրայելում այդպես է ընդունված։ Հիմա գերիների փրկության համար թշնամու թիկունքում մնացած ականապատ տարածքի քարտեզն ի՞նչ գաղտնիք է»,- նշեց նա՝ հավելելով, որ կարևոր է գերիների հարցը և չի կարծում, որ դա պետք է դարձնել շահարկման թեմա, եթե դրանով մենք գոնե մեկ գերու կյանք կարողանում ենք փրկել, այլ հարց է, որ պետությունը պետք է բանակցի, որ հնարավորինս շատ գերիներ կարողանա վերադարձնել հայրենիք՝ դրա դիմաց։

Հարցին՝ արդյո՞ք Նիկոլ Փաշինյանի հայտարարությունը, թե կան այլ քարտեզներ ևս, չի վտանգում Ադրբեջանում գտնվող մեր մյուս գերիների վերադարձի գործընթացը, վերածում՝ քաղաքական առևտրի, Իսագուլյանը պատասխանեց, որ իրեն բնավ չի հետաքրքրում, թե Նիկոլ Փաշինյանը ինչ է մտածում և ինչու է նման հայտարարություն անում, այս երեք տարիների ընթացքում համոզվել ենք, որ Նիկոլ Փաշինյանը ցանկացած հայտարարություն կարող է անել, որոնք մեկը մյուսից ավելի սահմռկեցուցիչ են, ազգակործան։

Նրա խոսքով՝ թշնամին էլ գիտի, թե ինչ ականապատված տարածքներ կան և որի քարտեզներն են իրենց տրված, այսինքն՝ կարևոր չէ, թե Նիկոլ Փաշինյանն ասում է դա, թե ոչ, ազերիները շատ լավ գիտեն, թե որ տարածքների քարտեզները կարող են լինել մեզ մոտ, եթե իհարկե նահանջի ժամանակ այդ քարտեզները համապատասխան շտաբերում չեն մնացել և այժմ իրենց ձեռքում չէ։

Դիտարկմանը, որ նախկինում հայկական կողմը պնդում էր, որ հստակ քարտեզներ չկան, Իսագուլյանը նշեց, որ եթե խոսքը նախկին իշխանությունների մասին է, ապա նրանց օրոք այդ տարածքը Արցախի Հանրապետության տարածք էր, հայկական տարածք էր և բնականաբար որևէ պետություն իր տարածքում տեղակայված ականապատ տարածքների քարտեզներն այլ պետության չի տրամադրի, մինչդեռ, հիմա բոլորովին այլ իրավիճակ է և այդ տարածքները գտնվում են Ադրբեջանի վերահսկողության ներքո։

«Նախկինում իշխանությունները կարող էին նման բան ասել, այսօր արդեն պարզ է, որ կան ականապատ տարածքներ և, եթե ասեն՝ ինչ-որ մարդիկ ականապատել են, մենք չգիտենք, թե ով է ականապատել և երբ, ավելի ծիծաղելի իրավիճակում կհայտնվեն»,- նշեց Իսագուլյանը՝ հավելելով, որ խոսքը մեր վերահսկողության տակ չգտնվող տարածքի մասին է, իսկ ցանկացած գերու կյանք շատ ավելի թանկ է, քան՝ այդ քարտեզները։

Աղբյուր` Փաստինֆո