Փաստ ինֆո

ՆԱՏՕ-ի գագաթնաժողովի շրջանակներում Թուրքիայի նախագահ Ռեջեփ Թայիփ Էրդողանի հետ անցկացված բանակցություններն անցել են լավ մթնոլորտում։ Այս մասին Ֆրանսիայի նախագահ Էմանուել Մակարոնը հայտնել է երկուշաբթի՝ ելույթ ունենալով հանդիպման մեկնարկի եւ ավարտի արդյունքներին նվիրված մամուլի ասուլիսում, փոխանցում է ՏԱՍՍ-ը։

«Մեր այդ բանակցություններն անցել են խաղաղասիրական մթնոլորտում», - ընդգծել է Ֆրանսիայի նախագահը: Միեւնույն ժամանակ, նկատի ունենալով Էրդողանի նախկին վիրավորական արտահայտություններն իր հասցեին եւ ծագած բանավեճը, նա նշել է, որ ներկա բանակցություններում «ոչ մի ներողություն չի խնդրվել եւ ոչ մի կողմը դրանք չի էլ պահանջել»: «Բայց հստակ ցանկություն է դրսեւորվել վերսկսել բնականոն աշխատանքը», - հայտարարել Է Մակրոնը:

Նա հատուկ ընդգծել է, որ «վերջին ամիսները նշվել են որպես կողմերի ավելի հանգիստ հրապարակային հայտարարություններով ամիսներ»: «Եվ ես այդ կապակցությամբ իմ գոհունակությունն եմ հայտնում», - ասել է Մակրոնը: «Բանակցությունների ընթացքում մենք երկուստեք արձանագրել ենք, որ անհրաժեշտ է, ելնելով մեր ընդհանուր նպատակներից, բոլոր ուժերը ներդնել՝ համատեղ աշխատանք ապահովելու համար», - ասել է նա:

«Մի կողմից Ֆրանսիայի կառավարությունը եւ ֆրանսիացի ժողովուրդը պայքարում են ահաբեկչության բոլոր ձեւերի, այդ թվում՝ իսլամիստական ահաբեկչության դեմ։ Եվ մյուս կողմից, Ֆրանսիան ուժեղացնում է ծայրահեղական խմբերի դեմ ուղղված իր քաղաքականությունը, որոնք խեղաթյուրում եւ օգտագործում են կրոնը իրենց նպատակների համար, որպեսզի դրդեն մի շարք քաղաքացիների խախտել օրենքները «...» »,- զրույցի ժամանակ նշել է Մակրոնը։

«Նախագահ Էրդողանը ըմբռնումով է ընդունել այս բոլոր բացատրություններն իմ կողմից և հասկացրել, որ իր համար կարևոր են ինչպես Ֆրանսիայի անվտանգությունը, այնպես էլ նրա բնակչության համախմբվածությունը»: «Ես նրան հիշեցրել եմ, որ Ֆրանսիայի համար կարեւոր նպատակ է՝ հարգել բոլոր կրոնները», - ասել է Մակրոնը:

«Սա այն ճանապարհն է, որով մենք կարող ենք համագործակցության եզրեր ստեղծել Թուրքիայի հետ և օգտակար գործողություններ իրականացնել։ Այդ պատճառով շատ կարեւոր է դրա շուրջ առաջխաղացում ապահովել», - եզրափակել է Ֆրանսիայի նախագահը։

Աղբյուր` Փաստինֆո