Փաստ ինֆո

Ընտրակաշառքի գործով «Բարգավաճ Հայաստան» կուսակցության պատգամավորի թեկնածու Արամայիս Ապրոյանին կալանավորելու որոշման դեմ վերաքննիչ բողոք է ներկայացվել։ Այս մասին «Փաստինֆո»-ի հետ զրույցում ասաց փաստաբան Էմին Խաչատրյանը։ 

Ինչպես արդեն տեղեկացրել ենք՝ Երևանի ընդհանուր իրավասության դատարանը՝ դատավոր Արտուշ Գաբրիելյանի նախագահությամբ, բավարարել է Արամայիս Ապրոյանի նկատմամբ կալանավորումը որպես խափանման միջոց ընտրելու մասին քննիչի միջնորդությունը։
Փաստաբան Էմին Խաչատրյանը «Փաստինֆո»-ի հետ զրույցում հայտնեց, որ դատարանի որոշման դեմ վերաքննիչ բողոք է ներկայացվել՝ վիճարկելով, թե հիմնավոր կասկածի առկայությունը, թե՛ կալանավորման հիմքերը։ Պաշտպանության կողմը գտնում է, որ հիմնավոր կասկածի մասով բավարար շեմը հաղթահարված չէ, քանի որ ապացույցների բավարար համակցություն՝ հիմնավոր կասկածի շեմի հաղթահարման համար՝ առկա չէ, իսկ առկա աշխատանքային վարկածը պետք է բազմակողմանի քննությամբ հաստատվի կամ հերքվի։ Ինչ վերաբերում է կալանավորման հիմքերին, ապա քննիչը ներկայացված միջնորդությամբ մատնանշել էր գործի քննությանը խոչընդոտելու և քննությունից թաքնվելու ռիսկերը, որը և դատարանը հաստատված է համարել, մինչդեռ, փաստաբանի պնդմամբ առհասարակ հիմքեր գոյություն չունեն։ Մասնավորապես, գործի նյութերում կա գաղտնալսման դրվագ, որտեղ Ապրոյանը՝ իմանալով, որ իր շտաբի աշխատակցին բերման են ենթարկել, գտնվելով Երևան քաղաքում չի թաքնվում, վերադառնում է Գավառ քաղաք, որ գնա ոստիկանություն՝ հասկանալու, թե ինչ է կատարվում։

«Այսինքն՝ ինքը գնում էր Ոստիկանություն, որտեղ ճանապարհին իրեն բերման են ենթարկում»,- նշեց փաստաբանը՝ հավելելով, որ անձն ունի պատգամավորի թեկնածուի կարգավիճակ, ուստի՝ պետք է շփվի քաղաքացիների հետ, քարոզարշավ իրականացնի, հետևաբար՝ թաքնվելու տրամաբանություն չկա։ Ինչ վերաբերում է խոչընդոտման ռիսկին, փաստաբանը նշեց, որ անձն ունի բավականաչափ իրավագիտակցություն և չի կարող խոչընդոտել քննությանը, հակառակը՝ ցուցմունք է տվել։

«Անձն՝ իր ցուցմունքով ևս աջակցում է քննությանը, չի հրաժարվում իր իրավունքից՝ ցուցմունք տալուց հրաժարվելու։ Այսինքն՝ խոչընդոտելու որևէ հիմք չեմ տեսնում»,- նշեց Խաչատրյանը՝ հավելելով, որ դատարանը որոշում է կայացրել՝ իրավիճակային լուծումներով։

Էմին Խաչատրյանը նշեց, որ իր համար դատական ակտը զարմանալի է, որովհետև այս պայմաններում՝ վերջին շրջանում նույնիսկ անհիմն դատական ակտեր կայացնելու դեպքում փորձում են գոնե որևէ կերպ պատճառաբանել, մինչդեռ՝ այս 15 էջից բաղկացած որոշման մեջ որպես պատճառաբանական մաս ընդամենը չորս տող է նշված, ինչը տարակուսանք է առաջացնում որոշման ոչ միայն հիմնավորվածության, այլև՝ օրինականության վերաբերյալ։ Փաստաբանը գտնում է, որ նախընտրական շրջանում դատավորն իր մեջ համարձակություն չի գտել օրինական և օբյեկտիվ որոշում կայացնելու համար, կայացրել է իրավիճակային որոշում։ Բացի այդ՝ առաջին ատյանի դատարանում պաշտպանության կողմից մի շարք իրավական խնդիրներ են բարձրացվել, այդ թվում՝ պատգամավորի թեկնածուի կարգավիճակից բխող անձեռնմխելիությանը և դրա հաղթահարված լինել-չլինելու վերաբերյալ, սակայն բարձրացված հարցերին դատական ակտում անդրադարձ չի եղել։

Ըստ փաստաբանի՝ ԿԸՀ նիստը ձևական բնույթ է կրում, քանի որ մի շարք հարցեր են բարձրացվել, սակայն հասկանում են, որ անձինք պարզապես չեն կարողանում մերժել, քանի որ նման ընթացակարգ չունեն։

«Այսինքն՝ ստացվում է, որ ում վերաբերյալ միջնորդություն ներկայացնեն՝ իրենք ձեռք են բարձրացնելու և թույլտվություն տան, բայց չէ՞ որ իրենք են երաշխիքը՝ անձի կարգավիճակն ապահովելու համար»,- նշեց Խաչատրյանը։
Ինչ վերաբերում է Ապրոյանի մասնակցությամբ քննչական գործողություններին, փաստաբանը հայտնեց, որ կալանավորման միջնորդության վերաբերյալ նիստից հետո իր պաշտպանյալի մասնակցությամբ որևէ գործողություն չի կատարվել։ Արամայիս Ապրոյանն այժմ գտնվում է «Արմավիր» ՔԿՀ-ում։

Հիշեցնենք, որ հունիսի 9-ին ՀՀ գլխավոր դատախազությունը հաղորդագրություն տարածեց՝ նշելով, որ նույն օրը ՀՀ ոստիկանության Գեղարքունիքի մարզային վարչության Գավառի բաժնում օպերատիվ տեղեկություններ են ստացվել այն մասին, որ հունիսի 20-ին կայանալիք ԱԺ արտահերթ ընտրություններին մասնակցող կուսակցություններից մեկի ներկայացուցիչների կողմից Գավառի տարածաշրջանի ընտրողներին բնամթերային տեսքով կաշառք է տրվել՝ նշված կուսակցության օգտին կողմ քվեարկելու համար: ՀՀ ոստիկանության Գեղարքունիքի մարզային վարչության Գավառի բաժնում դեպքի առթիվ հարուցվել է քրեական գործ՝ ՀՀ քրեական օրենսգրքի 154.2-րդ հոդվածի 1-ին մասով և նույն հոդվածի 4-րդ մասի 1-ին և 2-րդ կետերով նախատեսված հանցագործության հատկանիշներով։

Քրեական գործի շրջանակներում ի սկզբանե ձերբակալվել էր երկու անձ, այդ թվում՝ Արամայիս Ապրոյանը։ Քրեական գործով ևս 6 անձի նկատմամբ կիրառվել է նույն խափանման միջոցը։Քրեական գործի շրջանակներում մեղադրանք է առաջադրվել Արամայիս Ապրոյանին՝ ՀՀ քրեական օրենսգրքի 154.2-րդ հոդվածի 4-րդ մասի 1-ին և 2-րդ կետերով նախատեսված այն հանցավոր արարքի կատարման համար, որ վերջինս Գավառի տարածաշրջանի ընտրողներին սննդամթերքի տեսքով կաշառք է տվել նշված կուսակցության օգտին կողմ քվեարկելու համար:

Ըստ առաջադրված մեղադրանքի` Ա. Ա.-ն, ընդգրկված լինելով կուսակցության պատգամավորի թեկնածուների ցուցակում և համակարգելով Գավառի տարածքային գրասենյակի աշխատանքները, նույն գրասենյակի քարտուղար Ս. Զ.-ի հետ, համաձայն նախապես կազմված ցուցակի, 2021թ. հունիսի 9-ին ՀՀ Գեղարքունիքի մարզի Գավառի տարածաշրջանի մի շարք ընտրողների տվել է 7000-ական ՀՀ դրամ արժողությամբ սննդամթերքի տեսքով կաշառք` 2021թ. հունիսի 20-ին նշանակված ՀՀ ԱԺ արտահերթ ընտրություններին կուսակցության օգտին կողմ քվեարկելու համար: Վարույթ իրականացնող մարմինը միջնորդություն է ներկայացրել դատարան՝ Արամայիս Ապրոյանի նկատմամբ կալանավորումը որպես խափանման միջոց ընտրելու մասին, որը բավարարվել է։

Հեղինակ՝ Իզաբել Սահակյան

Աղբյուր` Փաստինֆո